သမီးတော်ရာဇ၀င်(၃) (ရေတွေရေတွေ စိုကုန်ပြီ)
ပို့စ်တင်ချိန်
- 7/17/2014 10:06:00 AM
- လက်စောင်းထက်
အရင်ခေတ်က စစ်တက္ကသိုလ် ကျောင်းဆင်းပွဲဟာ အခုလို ဆောင်းတွင်းမှာ ဆင်းတာမဟုတ်ဘဲ မတ်လ နောက်ဆုံးအပတ် ဒါမှမဟုတ် ဧပြီလ ပထမပတ်ထဲမှာ ဆင်းလေ့ရှိပါတယ်။ အစဉ်အလာ အရလည်း အရင်ခေတ်က သမ္မတတို့၊ တပ်မတော် ကာကွယ်ရေး ဦးစီးချုပ်တို့က ကျောင်းဆင်းပွဲမှာ တက်ရောက် ချီးမြှင့်ကြပါတယ်။ အာဏာရှင်ကြီး လက်ထက်မှာတော့ ကျောင်းဆင်းပွဲကို သမီးတော်တွေ၊ မြေးတော်တွေနဲ့ ကြွချီချီးမြှင့်လေ့ရှိတယ်။ ရန်ကုန်ဆိုတာ အဲဒီ့ကာလမှာ အလွန်ပူလေတော့ အပူရှောင်တာလည်း ပါသပေါ့လေ။ အဲဒီမှာပဲ များသောအားဖြင့် သင်္ကြန် ကျလေ့ရှိတယ်။
သင်္ကြန်ဆိုတော့ ရေလောင်းဖို့၊ ရေပက်ခံဖို့ လိုလာပြီ မဟုတ်လား။ ကာချုပ်ကြီး သမီးတော်တွေက ရေပက်ခံ ထွက်လို့လည်းမဖြစ်၊ မတော် ရေပက်သလိုနဲ့ အက်ဆစ်နဲ့ ပက်သွားရင် ဘယ့်နှယ်လုပ်မလဲ။ အလှတွေ ပျက်ကုန်မှာပေါ့။ ပြီးတော့ အရပ်ရပ် နေပြည်တော် ကြားလို့မှ မတော်၊ ကာချုပ်သမီး အက်ဆစ်နဲ့ အပက်ခံရခြင်းဆိုပြီး ဂျာနယ်တွေထဲ ပါလာဦးမယ်။ စာပေစိစစ်ရေးက ဖြုတ်လို့ ဂျာနယ်တွေမှာ မပါသည့်တိုင်အောင် အကောက်ဉာဏ် ခလောက်ဆန်နဲ့ သွေးခွဲနေသည်တို့၊ ဂုံးတိုက်နေသည်တို့စတဲ့ တံဆိပ်များရှင် ပြည်ပရောက် မြန်မာမီဒီယာတွေက ဖွလိုက်ရင် ဘယ့်နှယ်လုပ် မလဲ။ ပြည်သူတွေ ၀မ်းသာစရာ ဖြစ်နေဦးမယ်။ အဲဒီထက် ဆိုးတာက ရေပက်တာနဲ့ရောပြီး နာနတ်သီး လို့ခေါ်တဲ့ လက်ပစ်ဗုံးတစ်လုံး ပစ်သွင်းသွားရင် ဒုက္ခများကုန်ကြဦးမယ်။ ဒီတော့ သမီးတော်တွေလည်း ရေပက်လို့ရအောင်၊ အန္တရာယ်လည်း ကင်းအောင် အလိုက်တသိ စီစဉ်ပေးဖို့က အထက် တာဝန်ရှိသူတွေ အပေါ် ကျရောက် လာခဲ့ပြီပေါ့။
ဒါကြောင့် ကာချုပ်ကြီး မိသားစုမလာခင် ပြင်ဦးလွင် တပ်နယ်ထဲမှာ အရပ်ရှည်ရှည်၊ အသားဖြူဖြူ၊ အသက်ငယ်ငယ်၊ ရုပ်ချောချော အရာရှိငယ်တွေကို ရွေးထုတ်ရပါတယ်။ သူတို့ကို တပ်မတော် ဧည့်ဂေဟာလို့ခေါ်တဲ့ အိမ်တော်မှာ ကာချုပ်ကြီးရဲ့ မိသားစုကို သင်္ကြန် ကာလ အလုပ်အကျွေးပြုဖို့ တာဝန်ချထားလိုက်ပါတယ်။ တာဝန်ကတော့ သင်္ကြန်တွင်းမှာ ယူနီဖောင်းနဲ့ဖြစ်ဖြစ်၊ စမတ်ကျကျ ၀တ်ထားတဲ့ အရပ်ဝတ် အရပ်စားနဲ့ဖြစ်ဖြစ် သမီးတော်တွေ တည်းနေတဲ့ အဆောင် အောက်ကနေ ဖြတ်လျှောက်ဖို့ ဖြစ်ပါတယ်။
သင်္ကြန်လည်း ကျပါပြီ။ ကာချုပ်ကြီး မိသားစုလည်း ပြင်ဦးလွင်မှာ ကျောင်းဆင်းပွဲတွေပြီးလို့ သင်္ကြန်ကာလ အနားယူချိန်လည်း ရောက်နေပါပြီ။ တပ်မတော် ဧည့်ဂေဟာ အပေါ်ထပ်မှာလည်း သမီးတော်တွေက ရေပုံးတွေနဲ့ အလုပ်ရှုပ်နေပါပြီ။ ဟော…. အရာရှိငယ်လေး တစ်ယောက် အဆောင်ရှေ့ကနေ စမတ်ကျကျ လမ်းလျှောက် လာနေပါပြီ။ လက်ထဲမှာလည်း ဖိုင်တစ်ထပ်ကြီး ကိုင်လို့၊ ဘယ်သူ့ကို ဘာများ သွားသတင်းပို့မလို့ပါလိမ့်။ အဲဒီအချိန်မှာ ဗွမ်းကနဲ အသံနဲ့အတူ အဲဒီ့ အရာရှိလေး အပေါ်ကို ရေတွေကျလာပါတယ်။ မထင်မှတ်ဘဲ ရေလောင်းခံလိုက်ရတဲ့ အရာရှိလေးက လန့်သွားပါတယ်။ ဖိုင်တွေတောင် လက်ထဲက လွတ်ကျလို့ ပြန်ကောက်ရပါတော့တယ်။ လူရော ဖိုင်တွေရော ရွှဲရွှဲစိုကုန်ပါပြီ။ အပေါ်ထပ်မှာတော့ တိုင်ကွယ်ပြီး တခစ်ခစ်ရယ်နေတဲ့ သမီးတော်တွေ ရှိပေမယ့် အဲဒီအရာရှိလေးမှာ မော်ဖူးစေ အမိန့်မရထားတဲ့အတွက် အပေါ်ကို မော့မကြည့်ဝံ့ပါဘူး။ ဒါပေသိ ဘေးဘယ်ညာကိုကြည့်ရင်း သူ့ကို ဘယ်နေရာက ဘယ်သူတွေ ပက်လိုက်ပါလိမ့်လို့ ခေါင်းကုတ်ရင်း ရေတွေကို လက်နဲ့အသာခါချလို့ ဆက်ထွက်သွားပါတော့တယ်။
ရုပ်ရှင်သာ ဆိုရင်တော့ အကယ်ဒမီရမယ့် အခန်းပေါ့ဗျာ။ အဲဒီလိုနဲ့ သင်္ကြန်ကာလမှာ တပ်မတော် ဧည့်ဂေဟာ ရှေ့ကနေ အရာရှိလေးတွေ ဖြတ်သွားလိုက်၊ အပေါ်က ရေတွေလောင်းချလိုက်၊ ရေလောင်းခံရတဲ့ အရာရှိလေးတွေ လန့်သွားလိုက်နဲ့ သင်္ကြန်ကာလကို ကာချုပ်ကြီးရဲ့ သမီးတော်တွေက ပျော်ပျော်ကြီး ဖြတ်သန်းကြပါတော့တယ်။ သူတို့က အဆောင်အပေါ်ကနေ ရေတွေ ပက်လိုက်၊ အောက်က အရာရှိလေးတွေက သူတို့ကို ဘယ်သူပက်မှန်း မသိရှာဘူးဆိုပြီး သဘောတွေ ကျလိုက်နဲ့ပေါ့။ ဒါပေမဲ့ တစ်ချိန်တည်းမှာပဲ အရာရှိလေးတွေရဲ့ ညနေခင်း အရက်ဝိုင်းမှာတော့ “မင်းကလည်း အိုဗာအိုက်တင် လုပ်လိုက်တာ၊ လန့်ပြရင် တော်ရောပေါ့။ အောင်မယ်လေးဗျဆိုပြီး ထခုန် ပြနေသေးတယ်တို့၊ ဟဒီလိုမလုပ်ရင် သူတို့ အပေါ်ကနေ ရေပက်မှာကို ကြိုသိနေလို့ မကြောက်တာပါ။ မလန့်တာပါဆိုရင် အမှုက ပိုကြီးဦးမယ်။ ခုတော့ ပြီးကရော၊ သူတို့လည်း သဘောကျ တိုင်ကြားက ချောင်းကြည့်နေတဲ့ တပ်နယ်မှူးကြီးက ငါ့ကို လက်မထောင်ပြပြီး ချီးကျူး သွားသေးတယ်ဆိုတဲ့ အသံတွေ၊ ဟေ့ကောင် ငါ့ဖိုင် ရေစိုသွားပြီနော်။ အသစ်ပြန်ဝယ်ပေးဦးဆိုတဲ့ အသံတွေ၊ တော်ရုံပဲ အိုက်တင်ပေးကြဦး ဟ၊ မတော်လို့ တော်ကောက်ပြီး ပန်းခွေစွပ်သွားရင် ငါတို့ရဲ့ လက်ရှိရည်းစားတွေက သူတို့ကိုယ်သူတို့ သတ်သေသွားဦးမယ်တို့” စတဲ့ အသံတွေ ကြားရမှာ ဖြစ်ပါတယ်။
၁၉၉၂ ခုနှစ်မှာ တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး စောမောင်ဆီကနေ ဒုတိယ တပ်မတော် ကာကွယ်ရေး ဦးစီးချုပ် သာဂေါင်ကြီးက အာဏာသိမ်းခဲ့ပါတယ်။ အဲဒီ့အချိန်က အစိုးရ ကက်ဘိနက်မှာ သာဂေါင်ကြီးဟာ တိုင်းပြည်အပေါ် စိတ်သဘောထားကောင်းနဲ့ အုပ်ချုပ်မယ့်သူ ဖြစ်တယ်။ သူ့ကို ပြန်ငြင်းခုံရင်လည်း လက်ခံတယ်ဆိုပြီး ၀န်ကြီးတွေကြားမှာ အမှတ်ရခဲ့ပါတယ်။ အမှန်ကတော့ ထောက်လှမ်းရေး အကူအညီနဲ့ အာဏာသိမ်းထားပြီး အခြေမခိုင်သေးလို့ သူ့ကို ဝေဖန်တာတွေကို သည်းခံနေတာ ဖြစ်တယ်။ တစ်ချိန်တည်းမှာ အဲဒီအချိန်က ၀န်ကြီးတွေကလည်း သူနဲ့ မတိမ်းမယိမ်းတွေ၊ သူ့ထက်နာမည်ပိုကြီးပြီး လက်ရဲဇက်ရဲတွေကလည်း စစ်တိုင်းမှူးတွေဆိုတော့ မနိုင်၍ သည်းခံရခြင်းသည် လည်းကောင်းဆိုပြီး ဟဲဟဲဟဲဟဲနဲ့ အရူးဇာတ်နင်းခဲ့တာ ဖြစ်တယ်။ တဖြည်းဖြည်းနဲ့ အခြေကျလာချိန်မှာ သူနဲ့မတိမ်းမယိမ်း တိုင်းမှူးတွေကို စစ်တပ်ကနေ ဆွဲထုတ်ပြီး ၀န်ကြီးတွေ ခန့်လိုက်တယ်။ ပြီးတော့ ထောက်လှမ်းရေးကို မျက်စပစ်ပြီး သူ့ကို လုံးဝ မကြောက်တဲ့ တိုင်းမှူး လူထွက် ၀န်ကြီးတွေကို ဖြုတ်ပစ်လိုက်တယ်။ အနောက်ဖက် ၀က်တဲလို့ လူတွေ လှောင်ခေါ်တဲ့ န၀တ နေရာမှာ နယကဆိုပြီး အမည်ပြောင်းလိုက်တယ်။ မြို့နယ်အဆင့်ကတော့ မယကပေါ့။ အများက မယားကြောက်လို့ ခေါ်ခဲ့ကြတယ်။ သူနဲ့ မတိမ်းမယိမ်း ၀န်ကြီးတွေကို သုတ်သင်အပြီးမှာ သူ့တပည့်တွေ ဖြစ်ခဲ့ပေမယ့် အရင် ဦးစောမောင် ခန့်သွားတဲ့ ၀န်ကြီးတွေကို ရှင်းလင်းလိုက်တယ်။ ဒါတွေနဲ့ ပြီးရောလားဆိုတော့ မပြီးသေးပါဘူး။ သူ့ကို ငယ်နိုင်လို ဖြစ်နေတဲ့ စစ်ထောက်လှမ်းရေး တစ်ခုလုံးကိုလည်း အမြစ်ကနေ လှန်ပစ်လိုက်ပါတယ်။
ထိပ်ဆုံးကနေ အောက်ခြေ ရဲဘော်အထိ ကျူပင်ခုတ် ကျူငုတ်မကျန် ရှင်းပစ်ခဲ့တာဖြစ်တယ်။ အဲဒီလို အဆင့်ဆင့် ရှင်းပြီးတဲ့ အချိန်ကစလို့ သမီးတော်တွေလည်း ထင်တိုင်းကဲလို့ရတဲ့ ဘ၀ကို ရောက်သွားတော့ တာပါပဲဗျာလို့ ခရိုနီ လက်ဟောင်းကြီးက သူ့စကားကို ဒီတစ်ပတ် အတွက် အဆုံးသတ်လိုက် ပြန်ပါတော့တယ်။ ပရိသတ်အတွက် ရှေ့တစ်ပတ် ခင်ဗျား ပြောပြမယ့် ခေါင်းစဉ်လေး ပေးဦးလေဆိုတော့ နောက်တစ်ပတ်လည်း အသောလေးတစ်ခု ဆက်ပြောမယ်ဗျာ။ မချေဖြစ်ခဲ့သော ယတြာနှင့် ညမအိပ် လိုက်ရသော တိုင်းမှူးလို့ ခေါင်းစဉ်ပေးထားလိုက်။ ဒီမှာလည်း ဇာတ်လိုက်တွေ ကတော့ သမီးတော်တွေပဲပေါ့ဗျာတဲ့...။
- လက်စောင်းထက်
Tomorrow
