လစာ သိန်း ၃၀ သာရသည့် အားကစားဝန်ကြီး တစ်လ သိန်း ၆၀၀ စိုက်ထုတ်သုံးစွဲနေဟုဆို
ပို့စ်တင်ချိန်
- 6/10/2014 10:03:00 AM
သောကြာ
၂၀၁၅ ခုနှစ် စင်ကာပူဆီးဂိမ်းပြိုင်ပွဲအတွက် မြန်မာအားကစားအဖွဲ့မှ ကစားသမားများ လေ့ကျင့်ပေးရန် နိုင်ငံခြားသား နည်းပြများ ခေါ်ယူလျက်ရှိပြီး နည်းပြခေါ်ယူရာတွင် နိုင်ငံတော်မှချပေးသည့် ဘတ်ဂျက် ငွေနှင့်မလုံလောက်၍ အားကစားဝန်ကြီး ဦးတင့်ဆန်းမှ လစဉ် ကျပ် သိန်း ၆၀၀ ခန့် စိုက်ထုတ်သုံးစွဲနေရသည်ဟု အားကစားဝန်ကြီးဌာန ညွန်ကြားရေးမှူး ဦးဋ္ဌေးအောင်က မဇ်္ဈိမသို့ ပြောသည်။
အားကစားဝန်ကြီးဌာနအနေဖြင့် လာမည့် စင်ကာပူဆီးဂိမ်းပြိုင်ပွဲတွင် ၀င်ရောက်ယှဉ်ပြိုင်မည့် မြန်မာအားကစားအဖွဲ့များအတွက် နိုင်ငံခြားသားနည်းပြများ ငှားရမ်းခဲ့ခြင်းဖြစ်ပြီး ၎င်းကုန်ကျစရိတ်အတွက် နိုင်ငံတော်မှ ကျခံမှုမှာ အနည်းငယ်သာ ရှိခဲ့သည်။
မြန်မာအားကစားအဖွဲ့များအတွက် ငှားရမ်းထားသော နိုင်ငံခြားနည်းပြ အရေအတွက်မှာ ဦးရေ ၆၀ ကျော်ရှိမည်ဖြစ်ပြီး လစာမှာလည်း တစ်လအတွက် ဒေါ်လာ ၁,၅၀၀ မှ ၂,၀၀၀ ကြားတွင် အသုံးပြုနေရသည်။
သို့သော်လည်း နိုင်ငံတော်အစိုးရအနေဖြင့် သုံးလတာကာလအတွက် နည်းပြ အယောက် ၃၀ ကိုသာ ငှားရမ်းရန် ဆုံးဖြတ်ချက်ချခဲ့ပြီး ကျန်ရှိနေသေးသည့် ငှားရမ်း စရိတ်များကို ဦးတင့်ဆန်းက စိုက်ထုတ် သုံးစွဲရန် စီစဉ်ခဲ့ခြင်း ဖြစ်သည်။
“၂၀၁၄-၁၅ နှစ်မှာ နည်းပြအင်အား ၃၀ ကို သုံးလစာပဲ ငှားခွင့်ရပါတယ်။ သို့သော်လည်းပဲ တကယ်တမ်း သုံးလနဲ့ နည်းပြ တစ်ယောက်ကို ဘယ်လိုမှ လုပ်လို့မရတဲ့အတွက် ၀န်ကြီးက ထပ်ငှားပါ။ လိုရင် ကျွန်တော် စိုက်မယ်လို့ ပြောပါတယ်” ဟု ဦးဌေးအောင်က ဆိုသည်။
မြန်မာ အားကစားအဖွဲ့များအနေဖြင့် စင်ကာပူဆီးဂိမ်းကာလ မတိုင်မီအထိ နိုင်ငံခြားနည်းပြများကို ငှားရမ်းမည်ဆိုပါက ၁၂ လ နီးပါး ငှားရမ်းအသုံးပြုရမည်ဖြစ်သောကြောင့် အစိုးရဘတ်ဂျက် ကုန်ဆုံးသည့် အချိန်တွင် အားကစားဝန်ကြီး စိုက်ထုတ်သုံးစွဲရမည့်ငွေမှာ တစ်လအတွက် သိန်းတစ်ထောင်ကျော် ပမာဏသို့ ရောက်ရှိသွားမည် ဖြစ်သည်။
“၀န်ကြီးက သူ့လက်ထက်မှာ လုပ်နိုင်သလောက် အကောင်းဆုံးဖြစ်အောင်လုပ်မယ်လို့ ပြောတယ်။ နိုင်ငံတော်က ဘတ်ဂျက် ခွင့်မပြုလည်း သူ့အိတ်ထဲက စိုက်လုပ်မယ်လို့ ပြောတယ်။ နောင်ကာလဆိုရင် နောက်လူတွေ ဆက်လုပ်ကြပေါ့။ ဒီနည်းပြ ၆၀ မှာလည်း သန်းကို ရာနဲ့ချီပြီး စိုက်ရမှာပါ။ လူ ၆၀ ကျော်ကို တစ်လ နှစ်ထောင်နဲ့ပဲ တွက်ကြည့်ဦး တစ်လကို ဘယ်လောက်ကျ သွားမလဲ။ လာမယ့် (၆) လပိုင်း စင်ကာပူ ဆီးဂိမ်းအထိ တောက်လျှောက်ငှားမယ်ဆိုရင် နောက်ထပ် ၁၂ နှစ်လ ကျန်သေးတယ်။ အဲဒါတွေအတွက် ၀န်ကြီးက နိုင်ငံတော် ဘတ်ဂျက်မပေးလို့ ကျွန်တော် စိုက်လှူမယ်လို့ ပြောပါတယ်” ဟု ဦးဌေးအောင် က ထပ်မံပြောသည်။
ယခုနှစ် ဧပြီလ ၁ ရက်မှစ၍ ပြည်ထောင်စုဝန်ကြီးတစ်ဦးအတွက် တစ်လလျှင် လစာငွေမှာ သိန်း ၃၀ ခံစားခွင့်ရရှိထားသည့် အခြေအနေတွင် အားကစားဝန်ကြီးက တစ်လအတွက် သိန်းပေါင်းရာချီ၍ စိုက်ထုတ်သုံးစွဲခဲ့ခြင်းလည်း ဖြစ်သည်။
လက်ရှိအချိန်တွင် စင်ကာပူဆီးဂိမ်းပြိုင်ပွဲအတွက် မြန်မာ့လက်ရွေးစင် အားကစားသမားများအား လေ့ကျင့်သင်ကြားပေးမည့် နိုင်ငံခြားသား နည်းပြ ၄၆ ဦး ဧပြီလအတွင်းက ရောက်ရှိခဲ့ခြင်းဖြစ်ပြီး ၁၈ ဦး ထပ်မံ ရောက်ရှိရန် ကျန်ရှိနေသေးသည်။ နိုင်ငံခြားသားနည်းပြ အများစုမှာ တရုတ်နိုင်ငံမှဖြစ်ပြီး ကျန်နည်းပြများမှာ ထိုင်းနှင့် ကိုရီးယားနိုင်ငံတို့မှ နည်းပြများ ဖြစ်ကြသည်။
Mizzima Burmese
