လူတွေရဲ့စိတ်ဓာတ်
ပို့စ်တင်ချိန်
- 6/29/2014 09:15:00 PM
ကျွန်မသည် အငြိမ်းစားပညာရေးဝန်ထမ်းတစ်ဦး ဖြစ်ပါသည်။ အငြိမ်းစားမယူခင်က တာဝန်ထမ်း ဆောင်ရသည့် ရန်ကုန်အဝေးသင်တက္ကသိုလ် ရုက္ခဗေဒဌာနသို့ အိမ်မှကားမအားလျှင် ‘Taxi’ ဖြင့် လည်းကောင်း၊ လိုင်းကားဖြင့်လည်းကောင်း နေထိုင်ရာဒဂုံမြို့သစ် (မြောက်ပိုင်း) မှ ၈ မိုင်၊ ၈ မိုင်မှ အဆင်ပြေသည့်ကားဖြင့် သွားရပါသည်။ ကျွန်မလိုင်းကားစီးသည့်အခါတိုင်း သက်ကြီးရွယ်အိုများ၊ ကိုယ်ဝန်ဆောင်အမျိုးသမီးများ၊ ကလေးများနှင့်သူများကို နေရာဖယ်ပေးလေ့ရှိပါသည်။ တစ်နေ့တွင် ကိုယ်ဝန်ဆောင် အမျိုးသမီးတစ်ဦးနှင့် အဖော်များတက်လာ၍ ကျွန်မနေရာဖယ်ပေးလိုက်ပါသည်။ ထမင်းဘူး၊ ရေဘူး၊ စာအုပ်များပါသည့်ခြင်းကို ဘေးမှ အမျိုးသမီးတစ်ဦးက ယူထားပေးပါသည်။
ကျွန်မဆင်းမည့်မှတ်တိုင် အများကြီးလိုပါသေးသည်။ ကိုယ်ဝန်ဆောင်ထားသည့် မပေါ့မပါးကလေးမ ကလေးကို နေရာဖယ်ပေးရ၍ ကျွန်မများစွာ ဝမ်းသာနေမိပါသည်။ နှစ်မှတ်တိုင်ကျော်တွင် နေရာဖယ် ပေးထားသော ကလေးမကလေး၏ ဘေးတွင်ခရီးသည်ဆင်းသွား၍ ကျွန်မလည်း ခြင်းကိုလှမ်းယူကာ ထိုင်မည်ဟုစဉ်းစားနေမိပါသည်။ ကိုယ်ဝန်ဆောင်ကလေးမကလေးသည် အနည်းငယ်လှမ်းသောနေ ရာတွင် ရောက်နေသည့် သူ့အဖော်ကို အတင်းလှမ်းခေါ်ပြီး လွတ်သွားသောနေရာ၌ ထိုင်စေပါသည်။ ဘေးကလူများက တအံ့တသြကြည့်နေကြတာ သူမမှုပါ။ နေရာဖယ်ပေးလိုက်တာက ‘ကျွန်မ’၊ ယခုနေ ရာလွတ်သွား၍ ထိုင်နေသူက ဒီကလေးမကလေးရဲ့ ‘အဖော်’။
သြော်-လောကကြီးထဲက လူတွေရဲ့ . . . . စိတ်ဓာတ်ပါလား။ ကျွန်မနေရာဖယ်ပေးမိတာ ‘နောင်တ’ မရပါ။ ‘ကုသိုလ်’ စိတ်ပဲလေ။ သူ့စိတ်နဲ့သူ၊ ကိုယ့်စိတ်နဲ့ကိုယ်ပါပဲ။ ကျွန်မ ‘အကုသိုလ်’ စိတ်မဖြစ်လို တော့ပါ။
ပြီးခဲ့သည့်အတိတ်ကာလကလည်း ကျွန်မခုလိုကြုံခဲ့ဖူးပါသည်။ ကျွန်မအမျိုးသားသည် အထူးကုဆရာ ဝန်တစ်ဦးဖြစ်ပြီး အိမ်တွင်ဆေးခန်းဖွင့်ထားပါသည်။ ကိုယ့်ရပ်ကွက်ထဲမှ သူများ၊ ရဟန်းသံဃာတော် များ၊ သီလရှင်များကို ကုသိုလ်ဖြစ်ကုသပေးသူဖြစ်ပါသည်။ ကျွန်မတို့အိမ်ပြောင်း၍ရပ်ကွက်အသစ်သို့ ရောက်လာသောအခါ ပထမရပ်ကွက်မှ အမျိုးသမီးနှစ်ဦး လာရောက်ပါသည်။ ကျွန်မသည် မီးဖိုထဲမှာ ထမင်းဟင်းချက်ရင်း သမီးကြီးကို “သမီးရေ၊ အဲဒီအမျိုးသမီးတွေက အရင်ရပ်ကွက်ကနော်၊ ဖေဖေကြီး မမှတ်မိမှာစိုးလို့ သွားပြောလိုက်အုံး” ဟု ကျွန်မပြောလိုက်၍ ဆေးဖိုးရော ကုသစရိတ်ပါ မယူလိုက်ပါ။
နောက်နေ့ ကျွန်မဈေးထဲတွင် ထိုအမျိုးသမီးများဖွင့်ထားသည့် ထန်းလျက်ဆိုင်သို့ သွားဝယ်ပါသည်။ ယခင်ကလည်း အားပေးချင်သည့်စိတ်ဖြင့် ကျွန်မအမြဲဝယ်နေကြပါ။ ထိုအမျိုးသမီးက “ဆရာမရေ၊ ထန်းလျက်တွေဈေးတက်သွားပြီ၊ အရင်ဈေးနဲ့ မရတော့ဘူးနော်” ကျွန်မသူတို့ဆိုင်မှာ တစ်ခါမှဈေးမ ဆစ်ခဲ့ဘူးပါ။ ကျွန်မလည်းဘာမှမပြောတော့ဘဲ ပိုက်ဆံပေးပြီး ထွက်လာခဲ့ပါသည်။
ကျွန်မသာဈေးရောင်းသူဖြစ်ပါက ကိုယ့်ကိုစေတနာဖြင့် ကုသပေးလိုက်သည့် မေတ္တာတွေကို ကျေးဇူးပြန်ဆပ်မိမှာပါ။ ကျွန်မကိုယ့်ကိုယ်ကိုယ် သတိပေးနေပါသည်။ ဆေးကုပေးလိုက်တာက ကုသိုလ်စိတ်၊ နောက်ဖြစ်ပေါ်နေတာတွေက အကုသိုလ်စိတ်တွေပါလား။ ကိုယ်ပေးနိုင်တာပေးပြီး ဘာမှပြန်မလိုချင်ဘဲ အရာရာကိုစွန်လွှတ်နိုင်ရပါမယ်။ ကိုယ်ပထမကုသိုလ်စိတ်ပဲ အစွန်းအထင်းမဖြစ် စေလိုဘဲ ဆက်လက်ပီတိဖြစ်နေရာမှာပါ။ ကိုယ်သေရင် ကိုယ့်နောက်ကိုကိုယ်ပြုခဲ့တဲ့ ကုသိုလ်တွေသာ ပါသွားမှာပါ။ အားလုံးကိုစွန့်ခဲ့ရမှာပဲ ဘာပဲလုပ်လုပ် အတတ်နိုင်ဆုံး မြတ်စွာဘုရားရှင်ကိုသာ စံနမူနာ ယူပြီးလုပ်ဆောင်ပါ။
“ဘုရားမို့လို့ စွန့်နိုင်တာမဟုတ်ဘူး။ စွန့်နိုင်လို့ဘုရားဖြစ်သွားတာ။ မြတ်စွာဘုရားကို တကယ်ကြည်ညို တယ်ဆိုရင် သူခင်းတဲ့လမ်းအတိုင်း တတ်နိုင်သမျှကြိုးစားပြီး လျှောက်ရမှာပေါ့” ဟု လမ်းညွှန်မိန့်ကြား ခဲ့သောသန်လျင်သဘာဝရိပ်သာ ဆရာတော်ဦးဥတ္တမကျေးဇူးကြောင့် ကျွန်မစိတ်ကိုကျွန်မ ‘ကုသိုလ် စိတ်’ ဖြစ်အောင်စွမ်းဆောင်နိုင်ပါပြီ။
ကျွန်မငယ်ငယ်တုန်းက နှစ်သက်ခဲ့ရသော ကဗျာဆရာကြီး ‘တိုးဝေ’ ၏ ‘စိတ်ဓာတ်’ ကဗျာကို မျှဝေပေး ပါရစေ။
အကျည်းတန်သူ
ဘီးမှန်ကူ၍ သနိုင်၏။
အိုဇာမှုအသွင်
လိုရာပြုပြင်၍ ရနိုင်၏။
စိတ်ဓာတ် ယိမ်းယိုင်သွားရင်ဖြင့် မိတ်ကပ်မလိမ်းနိုင်ပါ
တကား . . . ။
ဤဆောင်းပါးဖြင့် ကဗျာဆရာကြီး ‘တိုးဝေ’ အား ဂါရဝပြု၏။
ကြေးမုံသတင်းစာ
ဇွန် (၁၅) ရက်၊ ၂၀၁၄ ခုနှစ်
