ဖိနပ်ချုပ်သမားတစ်ဦး ငွေကြေးအခက်အခဲကြောင့် မိမိကိုယ်ကို သတ်သေ

ပို့စ်တင်ချိန် - 6/18/2014 02:34:00 PM

ဖိနပ်ချုပ်သည့် အလုပ်လုပ်ကိုင်သည့် အမျိုးသားတစ်ဦး ငွေကြေးအဆင်မပြေသဖြင့် မိမိကိုယ်ကိုယ် ကြိုးဆွဲချ သတ်သေခဲ့သည့် ဖြစ်စဉ်တစ်ခု ဇွန်လ ၁၇ ရက်၊ နံနက် ၅ နာရီဝန်းကျင်က သာကေတမြို့နယ်တွင် ဖြစ်ပွားခဲ့သည်ဟု ရန်ကုန်တိုင်း ရဲတပ်ဖွဲ့ရုံးက သတင်းထုတ်ပြန်ထားသည်။

ဖြစ်ပွားပုံမှာ သာကေတမြို့နယ်၊ ၃/ မာန်ပြေရပ်ကွက်အတွင်း နေထိုင်သည့် အောင်မျိုးသူ(၃၅)နှစ်သည် ၎င်း၏ နေအိမ်အရှေ့ခန်း အမြင့်ပေ ရှစ်ပေခန့်ရှိသည့် ခေါင်မိုးထုပ်တန်းတွင် ပုခက်ဆင်ထားသည့် တစ်မတ်လုံးခန့်ရှိသော ပလတ်စတစ်ကြိုးကို ကြိုးကွင်းပြုလုပ်ကာ ကြိုးဆွဲချ သေဆုံးခဲ့ခြင်း ဖြစ်သည်။

အထက်ပါအမျိုးသားမှာ သာကေတမြို့ နယ်၊ (၅) ရပ်ကွက်တွင် ဖိနပ်ချုပ်သည့် အလုပ်လုပ်ကိုင်ရာ ငွေကြေး အဆင်မပြေသဖြင့် စိတ်ဓာတ်ကျနေသူ တစ်ဦးဖြစ်ပြီး အလောင်းတွင် ပြင်ပဒဏ်ရာတစ်စုံတစ်ရာ မတွေ့ရှိသဖြင့် ရန်ကုန်ဆေးရုံကြီးသို့ ပို့အပ်ရာ ပီအာရ်-၀၃၅ ဖြင့် လက်ခံထားသည်ဟု ရဲမှတ်တမ်းတွင် ဖော်ပြထားသည်။

အဆိုပါဖြစ်စဉ်နှင့် စပ်လျဉ်း၍ ဒု-ရဲမှူး ရွှေဇံ၏ တရားလိုပြုတိုင်တန်းချက်ကို သာကေတမြို့နယ် ရဲစခန်းက သေမှုသေခင်း အမှတ်စဉ်(၁၃/၂၀၁၄)ဖြင့် အမှုဖွင့်ဆောင်ရွက်လျက် ရှိသည်။ ပြီးခဲ့သည့် မေလ တတိယပတ်ကလည်း လမ်းမတော်မြို့နယ်မှ ဈေးရောင်းသည့် အလုပ် လုပ်ကိုင်နေသည့် အမျိုးသမီး တစ်ဦးသည် စီးပွားရေးအဆင်မပြေသဖြင့် အရက်ပျံပုလင်းအသေး သုံးပုလင်းသောက်၍ သေကြောင်း ကြံစည်မှုတစ်ခု ဖြစ်ပွားခဲ့သေးသည်။

ဖြိုးဝေလင်း
Mizzima Burmese