ပါတီဝင်များ ဥပဒေ မလိုက်နာပါက ပါတီက ကာကွယ်ပေးမည်မဟုတ်ဟု ဒေါ်အောင်ဆန်းစုကြည် သတိပေး

ပို့စ်တင်ချိန် - 6/08/2014 04:46:00 AM

ရန်ကုန်၊ မဇ္ဈိမ။ ။ အမျိုးသားဒီမိုကရေစီအဖွဲ့( NLD) ပါတီဝင်များ၊ ကိုယ်စားလှယ်များအနေဖြင့် ပါတီကိစ္စရပ်များ၊ နိုင်ငံရေးဆိုင်ရာကိစ္စရပ်များ
ဆောင်ရွက်ရာတွင် ဥပဒေနှင့် အညီဆောင်ရွက်ရန်နှင့် လေးစားလိုက်နာကြရန် အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်က ဇွန်လ ၇ ရက်တွင် ကျင်းပပြုလုပ်သည့်
ပါတီ၏ ပထမအကြိမ် ဗဟိုကော်မတီဝင် အစည်းအဝေးတွင် ပါတီဝင်ကိုယ်စားလှယ်များကို ပြောဆိုလိုက်သည်။

“ ကျွန်မတို့ပါတီဝင်တိုင်းကို အဆင့်မြင့်တဲ့ နိုင်ငံရေးကို လုပ်စေချင်ပါတယ်၊ အဆင့်မြင့်တဲ့ နိုင်ငံရေးဆိုတာက ဥပဒေဘောင်အတွင်းကနေ လုပ်တာကို ဆိုလိုတာပါ"ဟု ဒေါ်အောင်ဆန်းစုကြည်က ပြောသည်။

NLD အနေဖြင့် အဖွဲ့ဝင်မည်သူမဆို အဖွဲ့ချုပ်မှ ပြဋ္ဌာန်းချက်များနှင့် နိုင်ငံတော်မှ ပြဋ္ဌာန်းထားသည့် ဥပဒေများကို လိုက်နာပါက အမြဲတစေ အကာအကွယ် ပေးသွားဖြစ်ပြီး ဥပဒေဘောင်အတွင်း မရှိသည့် သူများအား ကာကွယ်မှု ပြုပေးမည် မဟုတ်ဟု ဒေါ်အောင်ဆန်းစုကြည်က ပြောသည်။

လွတ်လပ်စွာ ပါတီသို့ အဖွဲ့ဝင်နိုင်သော်လည်း ပါတီမှ ချမှတ်ထားသည့် စည်းမျဉ်းစည်းကမ်း၊ မူဝါဒများကို လိုက်နာရမည်ဟု ပြောသည်။ NLD၏ မူဝါဒများမှာ ပါတီ၏ ရည်မှန်းချက် ဖြစ်သဖြင့် လိုက်နာရန် လိုအပ်သည်ဟုလည်း ဆိုသည်။

NLD အနေဖြင့် ယခင်ကာလများတွင် လူဟောင်းများအား နေရာပေးထားသော်လည်း ယခုအခါ ပါတီတွင်း တာဝန်ပေးအပ်မှု နေရာများ ရွေးချယ်ရာတွင် နိုင်ငံအပေါ်တွင်
ထားသည့် စေတနာ၊ ဒီမိုကရေစီစံနှုန်းစံထားများအား လေးစားလိုက်နာမှု၊ ပါတီပေါ်ထားရှိသည့် စေတနာတန်ဖိုးထားမှုများ ပေါ်တွင် မူတည်ကာ လူသစ်၊ လူဟောင်း မခွဲခြားဘဲ ရွေးချယ်သွားမည်ဟု ဒေါ်အောင်ဆန်းစုကြည်က ဆိုသည်။

ထို့ပြင် မိမိတို့ပါတီ၌ ပါတီဝင်များပြားလွန်းပြီး တစ်နိုင်ငံလုံးကို အခြေခံထားသွားနေသော်လည်း ငွေကြေးပိုင်းဆိုင်ရာတောင့်တင်းမှု မရှိခြင်း၊ အာဏာ မရှိခြင်းတို့ကြောင့် ပါတီဝင်တစ်ဦးချင်းစီမှ အဖွဲ့တစ်ခုလုံး၏ အရည်အချင်းကို အဓိက အားထားသွားရန် လိုအပ်သည်ဟု ဆိုကာ ဒေါ်အောင်ဆန်းစုကြည်က “ကျွန်မတို့က ပါတီရဲ့
အရည်အချင်းကို အားကိုးပြီးတော့ ကျွန်မတို့ ဖြစ်စေချင်တဲ့ နိုင်ငံရေးပုံစံကို ဖော်ဆောင်နေတာမို့လို့ စည်းမျဉ်းစည်းကမ်းတွေ လိုက်နာဖို့က အင်မတန် အရေးပါ ပါတယ်"
ဟုပြောသည်။

အစည်းအဝေးသို့ တစ်နိုင်ငံလုံးရှိ ပြည်နယ်နှင့်တိုင်းအသီးသီး ကိုယ်စားလှယ် ၁၁၀ဦးရေ တတ်ရောက်ခဲ့သည်။ အစည်းအဝေးကို ဇွန်လ ၇ ရက်နှင့် ၈ ရက်ကျင်းပမည်ဖြစ်ပြီး ပါတီရုံးအသီးသီးတို့မှ ရင်ဆိုင်နေရသည့် ပြဿနာများ၊ ကိစ္စအရပ်ရပ်တို့အား တံခါးပိတ်ဆွေးနွေးမည်ဖြစ်သည်။

လက်ရှိ မြန်မာ့နိုင်ငံရေးမှာ အသွင်ကူးပြောင်းဆဲကာလ ဖြစ်သဖြင့် စစ်မှန်သည့် ဒီမိုကရေစီအမြစ်တွယ် ရန်လိုအပ်သဖြင့် ပါတီအနေဖြင့် မိမိပါတီတစ်ခုတည်း ကောင်းစားရေးသာ မဟုတ်ဘဲ နိုင်ငံ၏ဒီမိုကရေစီ လမ်းစဉ်တွင် အခြေခံများ ဖြစ်မည့် ပြုပြင်ပြောင်းလဲရေးများကို အုတ်မြစ်ချနိုင်ရန် ဆောင်ရွက်သွားမည်ဟု ပြောသည်။

Mizzima Burmese
နန်းလွင်နှင်းပွင့်၊ ခင်မြတ်မြတ်ဝေ