တောင်ကိုရီးယား မှ လူများက စိတ်ညစ်ညူးမှု သက်သာစေရန် ထောင်ထဲဝင်ကြ

ပို့စ်တင်ချိန် - 6/07/2014 11:19:00 AM

ယနေ့ခေတ် ကိုရီးယားများသည် စိတ်ညစ်ညူးလာလျှင် စိတ်ညစ်ညူးမှု သက်သာစေရန် ထောင်ထဲဝင်လေ့ရှိကြသည်။ ထိုကဲ့သို့သော လူများကို လက်ခံသည့်နေရာမှာ တောင်ကိုရီးယားနိုင်ငံ ဟောင်ချွန်မြို့ရှိ စိတ်ငြိမ်းချမ်းရေး စင်တာ ဖြစ်သည်။ ထိုစင်တာကို ၄၇ နှစ်အရွယ် ရှေ့နေဟောင်း တစ်ဦးက စတင် တည်ထောင် ခဲ့ခြင်း ဖြစ်သည်။ တစ်ချိန်တုန်းက ဘ၀သည် မိမိစိတ်တိုင်းမကျ မဖြစ်သဖြင့် အလွန် စိတ်ညစ်ခဲ့ရကြောင်း၊ ထို့ကြောင့် ထောင်ထဲဝင်ကာ စိတ်သက်သာရန် လုပ်လိုခဲ့ကြောင်း ထို့အတွက် မိတ်ဆွေထောင်မှုး တစ်ဦးကို အကူအညီတောင်းရာ ယင်းထောင်မှုးက လက်မခံခဲ့ကြောင်း ကုထုံးတစ်မျိုးအဖြစ်  ထောင်ထဲ ခေတ္တ၀င် လိုသည်ဟု ပြောသည်ကိုလည်း လက်မခံကြောင်း၊ ထို့ကြောင့် နောက်ဆုံးတွင် ဒေါ်လာ  ၁၉ သန်း အကုန်ကျခံကာ ထောင်ပုံစံ စိတ်ငြိမ်းချမ်းရေး စင်တာကို တည်ဆောက်ခဲ့ကြောင်း ရှေ့နေဟောင်း ကွန်ယွန်ဆွတ်က ပြောပြသည်။

စိတ်ငြိမ်းချမ်းမှုအတွက် ထောင်ထဲဝင်လာသူများသည် လက်ကိုင်ဖုန်းနှင့် အခြားသော ပစ္စည်းများကို ထောင်ဝတွင် ထားခဲ့ရမည်ဖြစ်သည်။ ထို့နောက် အိမ်သာ၊ ဘေစင်နှင့် စားပွဲအသေးစား တစ်လုံးသာရှိသည့် အကျဉ်းခန်းသေးသေးတွင် တိုက်ပိတ်နေရမည် ဖြစ်သည်။ အစားအစာများကို တံခါးပေါက်ရှိ အပေါက်ငယ်မှ အထဲသို့ ထည့်ပေးမည် ဖြစ်သည်။ ထောင်ထဲဝင် လာသူသည် ထိုအကျဉ်းခန်းငယ်ထဲတွင် ပင် နေရမည် ဖြစ်ကာ ထိုထဲတွင် စိတ်ကို ငြိမ်းချမ်းအောင် လေ့ကျင့်ရမည် ဖြစ်သည်။ ကက်သလစ် ဘုန်းတော်ကြီး တစ်ပါးကလည်း ထောင်ထဲသို့ ၀င်လာသူများကို မိမိကိုယ် မိမိ ပိုမိုနားလည်လာစေရန် သင်ကြားပေးသည်။ ထိုထဲတွင် နှစ်ညတာနေထိုင်ရရန် အတွက် တစ်ဦးလျှင် ဒေါ်လာ ၁၄၆ ဒေါ်လာ ပေးသွင်းရသည်။ ထိုအစီအစဉ်သည် အလွန်ကောင်းကြောင်း ထိုထောင်ထဲဝင်ခဲ့ဖူးသူ အချို့က မှတ်ချက်ပေးသည်။ သို့သော် အချို့ကမူ အကျဉ်းခန်းသည် အလွန် သန့်ပြန့်လွန်းနေသည့် အတွက် ထောင်နှင့်မတူဟု မှတ်ချက်ပေးကြသည်။

ချယ်ရီ
World Myanmar News