ဆေးလိပ်သောက်သူများကို အသိတရားပေးမည့် Smart Lighter

ပို့စ်တင်ချိန် - 5/28/2014 07:05:00 PM

ယနေ့အချိန်အခါတွင် ကျွန်ုပ်တို့လူသားများအတွက် ကျန်းမာရေးအား အထောက်အကူဖြစ်စေရန် ခြေလှမ်းများ၊ အလေးချိန်များ၊ ကယ်လိုရီများ အစရှိသည်တို့ကို ခြေရာခံထောက်လှမ်းနိုင်မည့် ပစ္စည်းကိရိယာများ အများအပြားကို တီထွင်ထုတ်လုပ်ထားသလို ယခုအခါတွင်လည်း ကျန်းမာရေးကို ထပ်မံအထောက်အကူဖြစ်စေမည့် မီးခြစ်တစ်မျိုးကို တီထွင်ထုတ်လုပ်ခဲ့ပါသည်။

၎င်းမီးခြစ်သည် သင့်အနေဖြင့် တစ်နေ့တာ ဆေးလိပ်သောက်သုံးမှုကို မှတ်တမ်းတင်ဖော်ပြပေးနိုင် သောကြောင့် သောက်သုံးမှုပမာဏများလေ သင့်အတွက်အရှက်တစ်စုံတစ်ရာ၊သို့မဟုတ် အသိတစ်စုံတစ်ရာ ကို ဖြစ်ပေါ်စေပြီး ဆေးလိပ်သောက်သုံးမှုကို လျော့ချလာစေခြင်းဖြင့် သင့်ကျန်းမာရေးကို သွယ်ဝှိုက်အထောက် အကူဖြစ်စေနိုင်မည် ဖြစ်သည်။ ၄င်းမီးခြစ်အား Quitbit ဟုခေါ်ပြီး Zippo မီးခြစ်နှင့်ပုံသဏ္ဍာန်ဆင်တူကာ အသုံးပြုသူမှ ဆေးလိပ် တစ်ကြိမ်သောက်တိုင်း မှတ်တမ်းတင်ထားရှိမည် ဖြစ်ပေသည်။ မီးခြစ်တွင် ပါဝင်သော အခြေခံအချက်အလက်များမှာ အတိုင်းအတာအရွယ်အစား 67 x 43 x 10 mm ၊ ဘက်ထရီ Rechargeable Lithium Polymer၊ အလေးချိန် 72 g၊ ချိတ်ဆက်နိုင်မှု Bluetooth Low Energy (4.0)၊ အသုံးပြုနိုင်မှု iOS 5 နောက်ပိုင်း နှင့် Android 4.3 အထက်၊ ဈေးနှုန်းမှာ မူလပထမ ကနဦးရောင်းချမှု အနေဖြင့် အမေရိကန်ဒေါ်လာ ၇၉ ဖြစ်ပြီး ဇွန်လနောက်ပိုင်းတွင် အမေရိကန်ဒေါ်လာ ၁၄၉ ခန့်ရောင်းချသွားမည်ဖြစ်ကြောင်း သိရှိရပါသည်။

ယခုတီထွင်ခဲ့သည့် App အနေဖြင့် တစ်နေ့တာလုံးတွင် ဆေးလိပ်သောက်ခြင်းကြောင့် ကုန်ဆုံးရသော ပိုက်ဆံတန်းဖိုးကိုပါ ဖော်ပြပေးနိုင်သလို၊ မီးခြစ်ပိုင်ရှင် အနေဖြင့်မည်သည့်အချိန်များတွင် ဆေးလိပ်ကို ပိုမို သောက်သုံးလေ့ရှိကြောင်းကိုပါ သိရှိစေနိုင်မည်ဖြစ်ပါသည်။ ထို့အပြင် Facebook နှင့် Twitter တို့တွင်ရှိသော Quitbit Community တွင်လည်း မိမိတို့၏ အခြေအနေ အချက်အလက်များကို အခြားသူငယ်ချင်းများ သိရှိစေရန် အလို့ငှာ ရှယ်ယာလုပ်နိုင်မည်လည်း ဖြစ်ပေသည်။

Quitbit ကို ဘော်စတွန်အခြေစိုက် ဒီဇိုင်နာ Ata Ghofrani ဆိုသူမှ တီထွင်ထုတ်လုပ်ခဲ့ခြင်းဖြစ်ပြီး ၄င်းမီးခြစ်ရှိ မီးညှိစနစ်သည် ကားတွင် ပါဝင်သော မီးညှိစနစ်နှင့် ဆင်တူပါသည်။ Quitbit ၏ရှေ့ကိုယ်ထည် ပိုင်းတွင် LED မီးသီးကို တပ်ဆင်ထားကာ ၄င်းမှ နောက်ဆုံးဆေးလိပ် သောက်သုံးရန် မီးညှိနေစဉ်အတွင်း ယခင်ဆေးလိပ်အရေအတွက်ကို ဖော်ပြပေးနေမည်ဖြစ်ကြောင်း သိရှိရပါသည်။

================

Ref:DM
WorldWide(BMSTU)
TechSpace Journal