လားရှိုးမြို့၊ ကမ္ဘောဇဘဏ်(၁)နှင့် CB Bank တို့တွင် စက္ကန့်ပိုင်းခြားပြီး ပေါက်ကွဲမှုဖြစ်ပွား

ပို့စ်တင်ချိန် - 5/16/2014 10:44:00 AM

ယနေ့နံနက်(၃း၃၀)အချိန်ခန့်က လားရှိုးမြို့၊ ရပ်ကွက်(၃)၊ ဗိုလ်ချုပ်လမ်းနှင့် သဇင်လမ်းထောင့်ရှိ ကမ္ဘောဇဘဏ်(၁)အဆောက်အဦး၏ အောက်ဘက် ၀င်ပေါက်အနီး ပေါက်ကွဲမှုတစ်ခုဖြစ်ပွားခဲ့သည်။

အဆိုပါပေါက်ကွဲမှုဖြစ်ပွားပြီး (၅)စက္ကန့်ခန့်အကြာတွင် ဒုတိယအကြိမ် ပေါက်ကွဲမှုတစ်ခုအဖြစ် ရပ်ကွက်(၂)၊ စံကောင်းလမ်းနှင့် သိန္နီလမ်းထောင့်ရှိ CB Bank အဆောက်အဦး၏ အနောက်ဘက် ထရန်စဖော်မာအောက်တွင် ဖြစ်ပွားခဲ့သည်။

အဆိုပါပေါက်ကွဲမှုများကြောင့် ကမ္ဘောဇဘဏ်အဆောက်အဦးပြတင်းမှန်များကွဲပျက်ခဲ့ပြီး ၊ အနီးအနားရှိ အဆောက်အဦးအချို့နေအိမ်တံခါးများ၊ မှန်များပျက်စီးခြင်း၊ မကြာခင်ဖွင့်လှစ်တော့မည့် “အောင်သီရိအဆင့်မြင့်ရုပ်ရှင်ရုံကြီး”၏ မှန်များ ကွဲပျက်ခြင်းများဖြစ်ခဲ့ကြောင်း ၊

CB Bank အဆောက်အဦးရှိမှန်များနှင့် ထရန်စဖော်မာအောက်ရှိ မီးဘုတ်ခုံတို့ ကြွေမွပျက်စီးခဲ့ကြောင်းနှင့် အခြား မည်သူတစ်ဦးတစ်ယောက်မျှ ထိခိုက်ဒဏ်ရာရရှိခြင်း မရှိကြောင်းသိရှိရသည်။

ဖြစ်စဉ်နှင့်ပတ်သက်၍ ချိန်ကိုက်ဗုံးဟုယူဆရကြောင်း၊ မည်သည့်ရည်ရွယ်ချက်ကြောင့် ဤဘဏ်(၂)ခုတွင် ချိန်ကိုက်ဗုံးဖောက်ခွဲရခြင်းအကြောင်းကို တာဝန်ရှိသူများမှ ဆက်လက်စုံစမ်းစစ်ဆေးလျှက် ရှိကြောင်းသိရှိရသည်။