ငြိမ်းချမ်းရေးတံဆိပ် တပ်ဆင်ထားသော မော်တော်ယာဉ်များ လိုင်စင်မဲ့ယာဉ်အဖြစ် အများဆုံး ဖမ်းမိ
ပို့စ်တင်ချိန်
- 5/29/2014 02:40:00 PM
ရန်ကုန်၊ မေ ၂၈
ရန်ကုန်တိုင်းဒေသကြီးအတွင်း လိုင်စင်မဲ့ မော်တော်ယာဉ် ဖမ်းဆီးရမိမှု အစီးရေ ၁၃၀ ကျော်တွင် ငြိမ်းချမ်းရေးတံဆိပ် တပ်ဆင်ထားသော လိုင်စင်မဲ့ မော်တော်ယာဉ် အများဆုံး ဖမ်းဆီးရမိကြောင်း အမှတ် (၂) ယာဉ်ထိန်းတပ်ဖွဲ့မှူး ရုံးထံမှ စုံစမ်းသိရှိရသည်။
ပြည်ထောင်စုငြိမ်းချမ်းရေး ဖော်ဆောင်ရေး လုပ်ငန်းကော်မတီမှ တိုင်းရင်းသား လက်နက်ကိုင် အဖွဲ့များထံသို့ ငြိမ်းချမ်းရေး ကားပါမစ်များ ပေးအပ်ခဲ့ပြီးနောက် ရန်ကုန်မြို့တော်အတွင်း ငြိမ်းချမ်းရေးတံဆိပ် တပ်ဆင်ထားသော လိုင်စင်မဲ့ယာဉ် တင်သွင်းမှုများ ရှိလာကြောင်း၊ ယင်းကြောင့် ယာဉ်ထိန်းရဲတပ်ဖွဲ့မှ မသင်္ကာသော ယာဉ်များကို ၂၀၁၃ ခုနှစ် နှစ်ဆန်းပိုင်းမှ စတင်ဖမ်းဆီး စစ်ဆေးခဲ့ရာ မေလ ၂၂ ရက်နေ့အထိ ယာဉ်အစီးရေ ၁၃၄ စီး ဖမ်းဆီးရမိခဲ့ကြောင်းနှင့် ယင်းတို့အနက် သုံးပုံနှစ်ပုံခန့်သည် ငြိမ်းချမ်းရေးတံဆိပ် တပ်ဆင်ထားသည့် ယာဉ်များဖြစ်ကြောင်း အမှတ် (၂) ယာဉ်ထိန်းတပ်ဖွဲ့မှူး ရုံးမှ သိရှိရသည်။
“ငြိမ်းချမ်းရေးတံဆိပ် တပ်ထားတဲ့ ယာဉ်တွေကို စစ်ဆေးတဲ့အခါ သူတို့က ဝန်ကြီးဦးအောင်မင်းရဲ့ ငြိမ်းချမ်းရေးကား ပါမစ်ခွင့်ပြုချက် လက်မှတ်ထိုးထားတဲ့ စာရွက်ကို ထုတ်ပြတယ်။ ဒါပေမဲ့ စာရွက်က Scan ပွားထားတဲ့ စာရွက်၊ ပြီးတော့ စီးပွား၊ ကူးသန်းဌာနက တင်သွင်းခွင့်ပြု စာရွက် အထောက်အထားတွေလည်း ဘာမှ ပြသနိုင်ခြင်း မရှိလို့ ဖမ်းဆီး အရေးယူပါတယ်” ဟု အဆိုပါ ယာဉ်ထိန်းတပ်ဖွဲ့မှူး ရုံးမှ ယာဉ်ထိန်း ရဲအရာရှိတစ်ဦးက ရှင်းပြသည်။
၂၀၁၃ ခုနှစ်တွင် ရန်ကုန်တိုင်းဒေသကြီးအတွင်း လိုင်စင်မဲ့ မော်တော်ယာဉ် ၆၄ စီး ဖမ်းဆီးရမိခဲ့ပြီး ၂၀၁၄ ခုနှစ် ဇန်နဝါရီလမှ မေလ ၂၂ ရက်နေ့အထိ ယာဉ်အစီးရေ ၇၀ ဖမ်းဆီးရမိခဲ့သောကြောင့် ယခုနှစ်အတွင်း ရန်ကုန်မြို့တော်သို့ လိုင်စင်မဲ့ မော်တော်ယာဉ် တင်သွင်းမှု များပြားလာကြောင်း ယာဉ်ထိန်းရဲတပ်ဖွဲ့၏ စာရင်းများအရ သိရှိရသည်။
“ငြိမ်းချမ်းရေး ဖော်ဆောင်ရေးအတွက် ကားပါမစ်တွေ ခွင့်ပြုထားတယ် ဆိုပေမယ့် သတ်မှတ်ထားတဲ့ အထောက်အထား စာရွက်စာတမ်း အပြည့်အစုံ မပြနိုင်ဘဲ ငြိမ်းချမ်းရေး တံဆိပ်တပ်ပြီး ရန်ကုန်တိုင်းအတွင်း ဝင်လာရင်တော့ ယာဉ်ထိန်းတပ်ဖွဲ့က တာဝန်အရ ဖမ်းဆီး အရေးယူသွားမှာပါ။” ဟု ယာဉ်ထိန်း ရဲအရာရှိတစ်ဦးက ပြောကြားသည်။
အဆိုပါ ရန်ကုန်တိုင်းဒေသကြီးအတွင်း ဖမ်းဆီးရမိသော လိုင်စင်မဲ့ယာဉ် ၁၃၄ စီးအနက် ပိုင်ရှင်ရှိ မော်တော်ယာဉ် ၂၄ စီးသာ ပါဝင်ပြီး ကျန်ယာဉ်များမှာ ပိုင်ရှင်မဲ့ မော်တော်ယာဉ်များ ဖြစ်ကြောင်း အမှတ် (၂) ယာဉ်ထိန်းရဲတပ်ဖွဲ့မှူး ရုံးမှ စုံစမ်းသိရှိရသည်။
ရန်ကုန်တိုင်းဒေသကြီးနှင့် မန္တလေးတိုင်းဒေသကြီးတို့တွင် လိုင်စင်မဲ့ မော်တော်ယာဉ်များကို ဖမ်းဆီးအရေးယူ ဆောင်ရွက်လျက် ရှိသော်လည်း လိုင်စင်မဲ့ မော်တော်ယာဉ် အများဆုံး ရှိနေသော နေပြည်တော်တွင် ထိရောက်စွာ ဖမ်းဆီးအရေးယူ ဆောင်ရွက်မှုများ မရှိကြောင်း နေပြည်တော်တွင် တာဝန် ထမ်းဆောင်နေသော ယာဉ်ထိန်း ရဲအရာရှိတစ်ဦးက ပြောကြားသည်။
“အပြင်ပေါက်ဈေးထက် ထက်ဝက်ကွာ သက်သာတော့ လိုင်စင်မဲ့ ကားတွေကို ရန်ကုန်မှာ တိုးတိုးတိတ်တိတ် ဝယ်ယူနေသူတွေ ရှိတာကြောင့် ဒီနှစ်ပိုင်းမှာ ငြိမ်းချမ်းရေး တံဆိပ်ကပ်ပြီး လိုင်စင်မဲ့ ကားတင်သွင်းမှု ပိုများလာတာကို စစ်ဆေးတွေ့ရှိရတယ်။ ပြီးခဲ့တဲ့လက ရခိုင်အမျိုးသားညီလာခံ တံဆိပ်ကပ်ထားတဲ့ ကားသုံးစီးကို ထောက်ကြန့်မှာ ဖမ်းဆီးရမိခဲ့တယ်” ဟု အမှတ် (၂) ယာဉ်ထိန်းတပ်ဖွဲ့မှူး ရုံးမှ အရာရှိတစ်ဦးက ရှင်းပြသည်။
တိုင်းရင်းသား လက်နက်ကိုင် ၁၄ ဖွဲ့ကို ကားပါမစ်များ ထုတ်ပေးခဲ့ပြီးနောက် ငြိမ်းချမ်းရေးတံဆိပ် တင်ဆင်ထားသည့် လိုင်စင်မဲ့ယာဉ်များ ဖမ်းဆီးရမိမှု မြင့်တက်လာချိန်တွင် ပြည်ထောင်စုရွေးကောက်ပွဲ ကော်မရှင်က လက်ရှိ မှတ်ပုံတင်ထားသော နိုင်ငံရေးပါတီ ၆၅ ခုကို အခွန်ကင်းလွတ်ခွင့်ဖြင့် မော်တော်ယာဉ် တင်သွင်းခွင့်ပြုရန် နိုင်ငံတော်သမ္မတရုံးထံသို့ မေလ ၂၂ ရက်နေ့က တင်ပြထားသည်။
The Voice Weekly
