နာယကဂုဏ်နှင့်မညီသည့် ကျေးရွာအုပ်ချုပ်ရေးမှူး – ပေးစာ

ပို့စ်တင်ချိန် - 5/02/2014 06:04:00 AM

ပဲခူးတိုင်းဒေသကြီး၊ ဒိုက်ဦးမြို့နယ် အင်းသဇင် ကျေးရွာအုပ်စု ကုန်းဝိုင်းကြီး ကျေးရွာတွင် ပြည်သူလူထုအား ကူညီရန် ပြည်သူ့ဘဏ္ဍာတော်ငွေဖြင့် လစာပေး ခန့်အပ်ထားသည့် ကျေးရွာ အုပ်ချုပ်ရေးမှူးဖြစ်သူ (ဦးထွန်းနောင်) သည် နာယကဂုဏ်နှင့် မညီညွတ်သည့် လုပ်ငန်းများကို လုပ်ကိုင်နေပါသဖြင့် ပြည်သူလူထုအား ကူညီရာ မရောက်သည့်အပြင် ပြည်သူလူထု (ကျေးရွာ)လူထု တစ်ခုလုံးအား ညှဉ်းဆဲ သလိုဖြစ်နေပါ၍ ၎င်း၏ အာဏာအလွဲသုံးစား လုပ်ရပ်များဖြင့် ကိုယ်ကျိုး ရှာနေသည်များကို အမှတ်စဉ်တပ်၍ ဖော်ပြလိုက်ပါသည်။

၁။ ရွာသူရွာသားများ၏ ငွေအား၊ လူအားနှင့် ဖောက်လုပ်ထားသည့် လမ်းမအား ၀ါးလုံးတား၍ ကားတစ်စီးလျှင် ၂၀၀၀ ကျပ်နှုန်း၊ လှည်းတစ်စီးလျှင် ၅၀၀ကျပ် နှုန်းဖြင့် ကောက်ခံပြီး ကိုယ်ကျိုးရှာခြင်း။

၂။ လယ်ယာမြေ မှတ်ပုံတင် ပြုလုပ်ရာ၌ မှတ်ပုံတင် တစ်စောင်လျှင် ၅၀၀ ကျပ်ယူ၍ ကိုယ်ကျိုးအတွက် သုံးခြင်း။

၃။ ၂၀၁၂ ခုနှစ်တွင် ကျေးရွာကို ရေဘေးမှ ကာကွယ်ဖို့ဆိုပြီး တစ်အိမ်ထောင်ကို ကျပ် ၅၀၀၀၊ ၂၀၀၀ နှုန်းဖြင့် ကောက်ခံထားပြီး ဘာတစ်ခုမှ အကောင်အထည် မဖော်ဘဲ စာရင်းရှင်းခြင်း မပြုဘဲ ကိုယ်ကျိုးအတွက် သုံးထားခြင်း။

၎။ ကျေးရွာပြည်သူများ ခရီးသွားရာ၌လည်းကောင်း၊ အလုပ်လုပ်ရာ၌လည်းကောင်း ရပ်ရွာ၏ ထောက်ခံချက် လိုအပ်လျှင် (ဤရွာတွင် အမှန်နေထိုင်ကြောင်း) ထောက်ခံချက်တစ်စောင်လျှင် ကျပ် ၁၀၀၀ နှုန်းပေးမှ ထောက်ခံ ပေးခြင်း။

၅။ အမှုအခင်းဖြစ်၍ ဒဏ်ရိုက်ထားသည့် သူများ၏ (ဦးကျော်သန်း ၂၅ ချပ်၊ ဦးဌေးအောင်သန်း ၅ ချပ်၊ ဒေါ်စန်းစန်းတင် ၅ချပ်၊ ဒေါ်မာလာခိုင် ၅ ချပ်၊ ဒေါ်တင့်တင့် ခိုင် ၅ ချပ်၊ ကိုကျော်ဇင်လင်း ၅ ချပ် စ သောသူများနှင့် ကျန်ရှိသူများ၏) သွပ်ပြားများအား ၎င်း၏ ကိုယ်ကျိုးအတွက် သုံးထားခြင်း။

၆။ အုပ်ချုပ်ရေးမှူး တစ်ယောက် ဖြစ်နေပြီး ၎င်းကိုယ်တိုင် လယ်ယာမြေ ဥပဒေကို ဖောက်ဖျက်၍ ၎င်းပိုင် လယ်မြေအား တရားမ၀င် အုတ်လုပ်ငန်းလုပ်ရန် အုတ်လုပ်ငန်းရှင်များ ဖြစ်ကြသည့် ၂၀၁၂ ခုနှစ်မှာ (၁) ဦးမှတ်ကြီး၊ (၂)ဦးဇော်ဝင်း၊ (၃)ဦးကျော်လှမိုး၊ (၄)ဦးကြည်ဝင်း၊ (၅)ဦးကျော်ဦးနှင့် ၂၀၁၃ ခုနှစ်မှာ (၁)ဦးစိုးစိုး၊ (၂)အမည်မသိ) တို့အား တစ်ဆိုင်းလျှင် ၂၀၀၀၀၀ ကျပ်နှုန်းဖြင့် အုတ်ဖုတ်ရန် နေရာ ရောင်းစားခြင်း။ (ကွင်းဆင်း စစ်ဆေးပါက ၎င်း၏ လယ်မြေထဲတွင် တရားမ၀င် အုတ်ဖုတ်နေသည်ကို တွေ့ရပါမည်။)

၇။ နိုင်ငံတော်က ပြည်သူလူထုအား တန်ဖိုးနည်း ဖုန်းကတ်များကို မဲစနစ်ဖြင့် ချထားပေးရာ၌ မဲပေါက်သူများမှာ ၎င်း၏ ဆွေမျိုးသားချင်းများသာ ဖြစ်နေခြင်း။

၈။ ကျေးရွာထဲတွင် ကြက်ဝိုင်းများ ဖြစ်နေသည်ကို တားဆီး အရေးယူခြင်း မပြုဘဲ အကောက်ငွေယူပြီး လျစ်လျူရှုထားခြင်း။ (၁၆-၁-၂၀၁၄)၊ (၃၁-၁-၂၀၁၄)၊ (၁၃-၂-၂၀၁၄) နေ့များတွင် ဦးတင်ဦး၊ ဒေါ်သန်းငွေ ခြံများတွင် ပြုလုပ်ခဲ့ပါသည်။

ထိုကဲ့သို့ အာဏာကို အလွဲသုံးစားလုပ်ပြီး ကျူးလွန်နေခြင်းများကြောင့် ပြည်သူများကို ကူညီရမည့်အစား ဒုက္ခများသာ ပေးနေသည်ကို လယ်ပြင်တွင် ဆင်သွားသလို ထင်ရှားနေပါသဖြင့် အရေးယူပေးပါရန် တင်ပြ လိုက်ရပါသည်။

မတရားအုပ်ချုပ်မှုများကို မခံနိုင်ကြသော

ကုန်းဝိုင်းကြီးကျေးရွာမှ ကျေးရွာသူ ကျေးရွာသားများ
မြန်မာသံတော်ဆင့်