မိုဘိုင်းလ်ဖုန်းလိုင်း ၁၀ သန်း တယ်လီနော ဝယ်ယူထားဟုဆို

ပို့စ်တင်ချိန် - 5/22/2014 08:40:00 PM

ရန်ကုန်၊ မေ ၂၁

မိုဘိုင်းလ် ဆက်သွယ်ရေး ဝန်ဆောင်မှု လုပ်ငန်းများ စတင်ရန် ပြင်ဆင်နေသည့် တယ်လီနောက ဆင်းမ်ကတ်များ အသုံးပြုနိုင်ရန် မိုဘိုင်းလ်ဖုန်းလိုင်း ၁၀ သန်း ဝယ်ယူထားကြောင်း တယ်လီနောမြန်မာမှ အမှုဆောင် အရာရှိချုပ် Mr. Petter Furberg က ပြောကြားသည်။
“လိုအပ်ချက်ပေါ် မူတည်ပြီးတော့ နောက်ထပ် ၁၀ သန်းစီ ထပ်ဝယ်သွားဖို့ ရှိပါတယ်” ဟု ၎င်းကဆိုသည်။

မိုဘိုင်းလ် ဝန်ဆောင်မှုများ စတင်ချိန်တွင် ဆင်းမ်ကတ် သန်း ၃၀ အထိ ပြင်ဆင်ထားမည် ဖြစ်သော်လည်း နံပါတ်ကိုမူ ၁၀ သန်းစီသာ တဖြည်းဖြည်းချင်း ဝယ်ယူသွားရန် စီစဉ်ထားကြောင်း ၎င်းက ပြောဆိုသည်။

လက်ရှိတွင် တယ်လီနော ကုမ္ပဏီက မိုဘိုင်းလ်ကွန်ရက် တည်ဆောက်မှုနှင့် ဆင်းမ်ကတ် ဖြန့်ချိရေး ကိုယ်စားလှယ်များ ခန့်ထားမှုကို ဆောင်ရွက်နေပြီး စက်တင်ဘာလ မတိုင်မီ ဆင်းမ်ကတ်များ စတင်ရောင်းချမည် ဖြစ်ကြာင်း တယ်လီနောထံမှ သိရသည်။

“ဒီမှာက လိုချင်တဲ့သူတွေက များနေတာ။ စရောင်းတဲ့အချိန်မှာ အုန်းအုန်းကျွက်ကျွက်တွေ ဖြစ်ကုန်ရင် ဘယ်လိုလုပ်မလဲ။ ၁၀ သန်းဆိုတာနဲ့ မလောက်ရင် ဘယ်လိုလုပ်မလဲ သိချင်တယ်။ ဒီမှာက ဝယ်လိုအားက အရမ်းများနေတာ။ တချို့ဆို သူတို့ကိုစောင့်ပြီး MPT (မြန်မာ့ ဆက်သွယ်ရေးလုပ်ငန်း) ကတ်မဝယ်ဘဲ စောင့်နေတဲ့ သူတွေရှိတယ်” ဟု မြောက်ဥက္ကလာပ မြို့နယ်ရှိ Hearts မိုဘိုင်းလ် ဖုန်းဆိုင်မှ ဒေါ်ဇာခြည်က ဆိုသည်။

The Voice Weekly