ယာဉ်မောင်းလိုင်စင်ပိတ်သိမ်းခံထားရသူအား ယာဉ်ကို မောင်းခွင့်ပေးခဲ့ကြောင်း စစ်ဆေးတွေ့ရှိခြင်းကြောင့် ရာဇာမင်းယာဉ်လိုင်းအား ပိတ်သိမ်း

ပို့စ်တင်ချိန် - 5/16/2014 02:13:00 AM

၁၂-၀၅-၂၀၁၄ ရက်နေ့က ရန်ကုန်-နေပြည်တော် အမြန်လမ်းမကြီးပေါ်၌ ဖြစ်ပွားခဲ့သော ယာဉ်တိမ်းမှောက်မှုတွင် ရာဇာမင်းယာဉ်လိုင်း မော်တော်ယာဉ်မောင်းသည် လိုင်စင်မရှိသူဖြစ်သဖြင့် အဆိုပါယာဉ်လိုင်းအား ပိတ်သိမ်းရခြင်းဖြစ်ကြောင်း သိရသည်။

ယနေ့(၁၅-၀၅-၂၀၁၄)က နေပြည်တော်တွင်ပြုလုပ်သော သတင်းစာရှင်းလင်းပွဲ၌ ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီးဦးသန်းဌေးက အထက်ပါအတိုင်း ပြောကြားခဲ့ခြင်း ဖြစ်သည်။

ဝန်ကြီးဦးသန်းဌေးက ယာဉ်တိမ်းမှောက်မှုနှင့်ပတ်သက်၍ ယာဉ်မောင်း မင်းခန့်(ခေါ်) ထွန်းခန့်စိုးသည် ရာဇာမင်း ယာဉ်မောင်းတာဝန်ထမ်းဆောင်သည့် ၂၀၁၂ ခုနှစ်တွင် တောင်ဥက္ကလာပ ဝေဇယန္တာလမ်းပေါ်တွင် ယာဉ်တိုက်မှုဖြစ်ခဲ့သဖြင့် ယာဉ်မောင်းလိုင်စင်အား ၃ နှစ် ပိတ်ပင်ပြစ်ဒဏ်ချမှတ်ခံထားရဖူးသူဖြစ်ကြောင်း၊ သို့ပါ၍ ၁၂ ရက်နေ့ ယာဉ်တိမ်းမှောက်မှုဖြစ်စဉ်တွင် ယာဉ်မောင်းနှင်ခွင့် လိုင်စင်မရှိဘဲ မောင်းနှင်ခဲ့ခြင်းသာဖြစ်ပါကြောင်း၊ ယာဉ်ပိုင်ရှင်သည် ယာဉ်မောင်းနှင်ခွင့်မရှိသူကို မောင်း နှင်ခွင့်ပြုသည့်အတွက် နေပြည်တော်ကောင်စီမှ ရာဇာမင်းယာဉ်လိုင်း နေပြည်တော်-ရန်ကုန် ခရီးသည်ပို့ဆောင်မှုကို ပိတ်ခြင်းဖြစ်ကြောင်း ပြောကြားခဲ့သည်။

အဆိုပါယာဉ် တိမ်းမှောက်မှုကြောင့် လူ ၁၄ ဦးသေဆုံးခဲ့ရပြီး ယင်းနှင့် ပတ်သက်၍ သမ္မတကြီး၏ လမ်းညွှန်ချက်ဖြင့် ဒု-သမ္မတက အနီးကပ်ကြီးကြပ်ပြီး ပြည်ထဲရေးဝန်ကြီးဌာန ဒုတိယ၀န်ကြီး ဗိုလ်မှူးချုပ် ကျော်ကျော်ထွန်း ပါဝင်သော စုံစမ်းရေးအဖွဲ့ဝင် (၈)ဦး ဖွဲ့စည်း စုံစမ်းလျက်ခဲ့ရာ ၁၂-၅-၂၀၁၄ ရက်နေ့ ညနေ (၆း၄၅)နာရီအချိန် နေပြည်တော် ဒက္ခိဏ သီရိမြို့နယ် အပိုင်မိုင်တိုင်အမှတ်(၁၉၇/၆) ၀က်လက်မီးရထားခုံးကျော်တံတားအောက်သို့ ရာဇာမင်းခရီးသယ်တင်ယာဉ် ထိုးကျသွားကြောင်း၊ ယာဉ်တိမ်းမှောက်လျှင် တိမ်းမှောက်ခြင်း တာဝန်သိပြည်သူတို့၏ သတင်းပေးပို့မှုကြောင့် အချိန်နှင့်တစ်ပြေးညီ ကူညီ ဆောင်ရွက်မှုပြုနိုင်ခဲ့ကြောင်း၊ ယာဉ်တိမ်းမှောက်မှုမဖြစ်ခင် လေမိုးပြင်းထန်စွာရွာ သည့်အတွက် ရုတ်တရက် မိုးမှောင်ကျပြီး ယာဉ်မှာ တံတားအား ကာရံထားသော ကွန်ကရစ်တုံးများကို ကျော်ဖြတ်တိုက်မိပြီး တစ်ပတ်လည်၍ ပေ (၅၀)ခန့်နက်သော ချောက်ထဲသို့ ကား၏ဖင်ပိုင်းမှကျ၍ တိမ်းမှောက်သွားခြင်းဖြစ်ကြောင်း၊ ယာဉ်မတော် တဆမှုတွင် ခရီးသည် (၁၄)ဦး သေဆုံးပြီး (၂၉)ဦး ဒဏ်ရာရရှိပါကြောင်း သေဆုံးသူ များမှာ ကျား (၁၀)၊ မ (၄)ဦးဖြစ်ကြောင်း စုံစမ်းသိရှိရကြောင်း သတင်းမီဒီယာများအား ရှင်းလင်းခဲ့သည်။

ရှင်းလင်းပွဲမတိုင်မီ News Watch မှ ရာဇာမင်းယာဉ်လိုင်းသို့ ရန်ကုန်-နေပြည်တော်ခရီးစဉ် ရပ်ဆဲခံရခြင်းနှင့် ပတ်သက်၍ ဆက်သွယ်မေးမြန်းရာ ရာဇာမင်းယာဉ်လိုင်း အုပ်ချုပ်ရေး မန်နေဂျာဦးချိုက “ကျွန်တော်တို့ ယာဉ်အုပ်ချုပ်ကြီးကြပ်သူတွေအနေနဲ့ ယာဉ်တစ်စီးကို ခရီးစဉ်မစမီ အစစအရာရာ စစ်ဆေးတဲ့အပြင် ယာဉ်မောင်း၊ ယာဉ် နောက်လိုက်ကိုလည်း ကွမ်း၊ ဆေး၊ အရက်၊ မိန်းမ အရှုပ်အရှင်းကင်းပြီး ၀ါရင့် ကျွမ်းကျင်၊ ယာဉ်မောင်း၊ ယာဉ်နောက် လိုက်တွေ ခန့်အပ်ထားတာပါ။ ခရီးစဉ် ထွက်ခါနီးတိုင်းမှာလည်း အရက်သေစာ သောက်စားခြင်းရှိမရှိကို အရက်မူးတိုင်း ကိရိယာနဲ့ စစ်ဆေးပါတယ်။ ပြောချင်တာက ကျွန်တော်တို့ တာဝန်ရှိသူတွေအုပ်ချုပ် ကြီးကြပ်မှုမညံ့ပါဘူး။ တာဝန်ရှိသူတွေ အနေနဲ့ ယာဉ်တိမ်းမှောက်တဲ့ဖြစ်စဉ်မှာ မိုးသည်းထန်စွာရွာသွန်းနေတဲ့ ရာသီဥတု အခြေအနေတွေ၊ လေပြင်းတိုက်ခတ်နေတာတွေ၊ လမ်းရဲ့အခြေအနေတွေကိုထည့် မတွက်ဘဲ ကျွန်တော်တို့ယာဉ်လိုင်းဘက်ကိုပဲ ဖိပြီး အပြစ်ရှာထားသလိုဖြစ်နေ ပါတာ။ ဒါနဲ့ပတ်သက်ပြီး ပြေးဆွဲခွင့် ပြန်လည်ရရှိ ဖို့တောင်းဆိုမှာမဟုတ်ပေမယ့် ယာဉ်လိုင်း ပိတ်ပင်ခဲ့တဲ့ အကြောင်းအရင်းအပေါ်တော့ ဖြေရှင်းချက်ပြန်လည်တောင်းခံသွားမှာပါ” ပြောကြားခဲ့သည်။ ယင်းကဲ့သို့ ပြေးဆွဲမှုပိတ်ပင်ခြင်းကြောင့် စိတ် ကသိကအောက်ဖြစ်ရကြောင်းလည်း ဖြည့်စွက်ပြောခဲ့သည်။

နေပြည်တော်သတင်းစာရှင်းလင်းပွဲအပြီး ယနေ့ ညနေပိုင်းတွင် ရာဇာမင်းယာဉ်လိုင်းထံသို့ စုံစမ်းစစ်ဆေးတွေ့ရှိချက်နှင့် ပတ်သက်၍ ထပ်မံဆက်သွယ်မေးမြန်းရာ ''မြေပြင်မှာ ဖြစ်နေတဲ့ဟာကို ခင်ဗျား လှမ်းမေး ကြည့်စမ်းပါဗျာ။ ကျွန်တော်က ဘာမှမသိဘူး''ဟု ရာဇာမင်းကားလိုင်း အုပ်ချုပ်ရေး မန်နေဂျာက ပြောကြားခဲ့ပြီး ဆက်သွယ်မေးမြန်းရန် ဖုန်းနံပါတ် ၁ ခုသာ ပေးခဲ့ပါသည်။

ဓါတ်ပုံ - ထင်အောင်ကျော်

News Watch(စောင့်ကြည့်သတင်းဂျာနယ်)