ကြောက်သူနှင့် ရဲရင့်သူ

ပို့စ်တင်ချိန် - 5/23/2014 09:39:00 PM

               
   
        ဘ၀ကို ရဲရဲရင့်ရင့် ရင်ဆိုင်နေတဲ့သူတွေဟာ တကယ်တော့ သီလရှိလို့ပါ။ ဘုရားရှင်က ပြောထားပါ တယ်။ လူတွေ အခြေခံဖြစ်တဲ့ ငါးပါးသီလကို လုံခြုံရင် ရဲ့ရင့်သူဖြစ်တယ်။ ငါးပါးသီလကို ဖောက်ဖျက်သူဟာ ဘယ်ရောက်ရောက် ကြောက်ကြောက်နဲ့ အသက်ရှင်နေရတယ်။

        ဘ၀ကို ရင်ဆိုင်တဲ့အခါမှာ ရဲရဲရင့်ရင့်နဲ့ ရင်ဆိုင်နိုင်ဖို့လိုပါတယ်။ ဘ၀ကို အကြောက်တရားဖြင့် ဖြတ် သန်းနေရတာဟာ အရမ်းကို ဆင်းရဲလှပါတယ်။ ဘယ်နေရာရောက်ရောက် ကြောက်စိတ်ဝင်နေ တတ် တယ်။ ကိုယ့်စိတ်ကို မလုံခြုံဘူး။

       မှန်ပါတယ်။ သီလဆိုတာ ကိုယ်နဲ့ နုတ်ကို မကောင်းတာ မလုပ်ဖြစ်အောင် စောင့်ထိန်းတာပါ။ ကိုယ်နဲ့ နုတ်ဖြင့် မကောင်းတာကို မလုပ်တဲ့သူဟာ ဘယ်သွားသွား ရဲရင့်နေပါတယ်။ သေမယ်ဆိုရင်တောင် ရဲရဲရင့်ရင့်ပဲ သေရဲပါတယ်။ အကုသိုလ်အပြစ်ကင်းနေတဲ့သူဟာ ကိုယ့်ကိုယ်ကို ယုံကြည်မှုရှိတယ်။ လိပ်ပြာ သန့်တယ်။ စိတ်လည်းချမ်း သာတယ်။

       သီလမလုံခြုံရင် မကောင်းတာလုပ်နေတဲ့သူပါပဲ။ ကိုယ်နဲ့နှုတ်ဖြင့် မကောင်းတာလုပ်ထားတဲ့သူဟာ ဘယ်သွားသွား ကြောက်နေပါတယ်။ ကိုယ့်အိမ်ထဲမှာ နေနေရင်တောင် ကြောက်စိတ်ဝင်နေပါတယ်။   သေဖို့ဆိုရင် ပိုတောင် ကြောက်သေးတယ်။ ဇိမ်ခံကားစီး၊ မွေ့ယာပေါ်မှာ လဲလျောင်းနေသော်လည်း ကိုယ့်ရဲ့မကောင်းကျိုးဟာ ဘယ်နေ့ဝင်လာမလဲ တွေးပြီး ပူပန်ကြောက်လန့်နေရတယ်။

       ဒါကြောင့် ဘ၀ကို ရဲရဲရင့်ရင့် ရင်ဆိုင်နိုင်ရန်နှင့် သေခြင်းတရားကို ရဲရင့်စွာ ရင်ဆိုင်နိုင်ဖို့အတွက် သီလကို လုံခြုံအောင် စောင့်ထိန်းရပါမယ်။

ရွှေစမ်းမြေ အရှင်က၀ိဓဇသာရ