မြို့တော်ဝန်အရေးမယူရဲတဲ့ ရန်ကုန်မြို့တွင်းမြေကျူးကျော်မှု
ပို့စ်တင်ချိန်
- 5/07/2014 02:27:00 PM
ရန်ကုန်မြို့ကမ်းနားလမ်းနှင့် ကီလီလမ်းထောင့် အလုံ သင်္ဘောကျင်းဟောင်း နေရာတွင် မြန်မာ့ စက်မှုဆိပ်ကမ်းရှိ ကုမ္ပဏီတစ်ခုမှ ရန်ကုန်မြို့ ရေဆိုးထွက်ပေါက်နှင့် ရန်ကုန်မြစ်အတွင်း ပိုင်များရိုက်ကာ ကွန်ကရစ်များလောင်း၍ ကျူးကျော်နေမှုများ ဖြစ်ပေါ်နေသော်လည်း ရန်ကုန်မြို့တော် စည်ပင်သာယာရေး ကော်မတီ မြို့တော်ဝန် ကိုယ်တိုင် အရေးယူနိုင်ခြင်း မရှိသေးကြောင်း သိရသည်။
အဆိုပါ မြန်မာ့စက်မှု ဆိပ်ကမ်းကို ယခင် စက်မှုဝန်ကြီး ဒုတိယဗိုလ်ချုပ်ကြီး စိန်အောင်၏ သမီးနှင့် သားမက် ဖြစ်သူ ဦးကိုကိုထူးတို့ ပိုင်ဆိုင်သော မြန်မာ့အဏ္ဏ၀ါ စွမ်းအားရှင် ဂရု(ပ်)အက်စ် ကုမ္ပဏီက နှစ်ရှည် လုပ်ပိုင်ခွင့်ရပြီး အပြည်ပြည်ဆိုင်ရာ ဆိပ်ကမ်းအဖြစ် အသုံးပြုလျှက် ရှိသည်။
အဆိုပါ ဆိပ်ကမ်းသည် မူလနေရာနှင့် ယခုနိုင်ငံတော်မှ ထပ်မံခွင့်ပြုသော နေရာနှစ်ခု ပေါင်းလျှင် ဧက ၇၀ခန့် ကျယ်ဝန်းသည်။ သို့သော် ယခုအခါ အဆိုပါ ကုပ္မဏီသည် ရန်ကုန်မြို့၏ ရေထွက်ပေါက် ဖြစ်သော ရွာသစ်ချောင်း ရေထွက်ပေါက် အတွင်းသို့ မြေနေရာတိုးချဲ့ ကျူးကျော်လျက် ရှိနေကြောင်း သိရသည်။
ထို့အပြင် ရန်ကုန်မြစ် အတွင်းတွင်လည်း ပိုင်များရိုက် ကွန်ကရစ်များလောင်းပြီး ထပ်မံ ကျူးကျော်လျက်ရှိသည်။ မြန်မာ့ဆိပ်ကမ်း အာဏာပိုင်နှင့်လည်း အဆိုပါ ရန်ကုန်မြို့၏ ရေဆိုးထွက်ပေါက်ကို ကျူးကျော်ထားသဖြင့် ပြဿနာ ဖြစ်ပွားလျက်ရှိကြောင်း သိရသည်။
ရန်ကုန်မြို့တော် စည်ပင်သာယာရေး ကော်မတီမှ အရာရှိတစ်ဦးက “အဲဒီကိစ္စက တိုင်စာတွေ ခဏခဏ တက်တယ်။ ဒါပေမဲ့ မြို့တော်ဝန်ကလည်း အရေးမယူရဲဘူး။ နောက်ဆုံး ကြားတာကတော့ ရန်ကုန်တိုင်း ဒေသကြီး အစိုးရအဖွဲ့ကို တိုင်စာ ရောက်ပြီး ခုံရုံးဖွဲ့ စစ်ဆေးနေတယ်လို့ သိရတယ်”ဟု Tomorrowသို့ ပြောပြသည်။
ရွာသစ်ချောင်း ရေဆိုးမြောင်းသည် ကျုံးကြီးလမ်း ရေဆိုးမြောင်းမှ ရေများကို ရန်ကုန်မြို့အတွင်း စွန့်ပစ်သည့် အဓိက မြောင်းကြီးတစ်ခု ဖြစ်သဖြင့် အဆိုပါ ရေမြောင်း အတွင်း အထိ ကျူးကျော်နေရာ ချဲ့ထွင်မှုကြောင့် ယခုလာမည့် မိုးရာသီတွင် ရန်ကုန်မြို့တွင်း ရေလွှမ်းမိုးမည်ကို အနီးနေ ပြည်သူများက စိုးရိမ်လျှက် ရှိကြသည်။
ရန်ကုန်-ဒလမြစ်ကူး တံတား ဆောက်လုပ်မည့် စီမံကိန်းရပ်ဆိုင်း သွားခြင်းနှင့် ပတ်သက်ပြီး လေ့လာသူ တစ်ဦးက “ခရိုနီနှစ်ယောက်ရဲ့ အပြည်ပြည်ဆိုင်ရာ ဆိပ်ကမ်း နှစ်ခုက ရန်ကုန်မြစ်ထဲမှာ ရှိနေတယ်။ ရန်ကုန်ဒလတံတား ဆောက်ရင် သူတို့ ဆိပ်ကမ်းတွေဆီကို နိုင်ငံတကာ သင်္ဘောတွေ မ၀င်နိုင်တော့မှာ စိုးလို့တံတား အမြင့်က ဘယ်လောက် အထိရှိရမယ်ဆိုပြီး ဖိအားပေးတာကြောင့် ဆောက်ပေးမယ့်
ကိုရီးယား အစိုးရက ဘတ်ဂျက်မမှီတော့ပဲ နောက်ဆုတ် သွားတာ၊ ခေတ်မီတဲ့ နိုင်ငံတိုင်းမှာ မြစ်ထဲမှာ အပြည်ပြည်ဆိုင်ရာ ဆိပ်ကမ်းတွေ မရှိတော့ပေမယ့် အခုတော့ အေရှားဝေါနဲ့ မြန်မာ့စက်မှုဆိပ်ကမ်း နှစ်ခုက ရန်ကုန်မြစ်ထဲမှာ ရှိနေတယ်။ ဒီခရိုနီ နှစ်ယောက်ကလည်း အစိုးရ တာဝန်ရှိသူတွေကို အိတ်ထဲထည့်ထားတော့ ဘာစီမံကိန်းလုပ်လုပ် သူတို့ အကျိုးစီးပွား မထိခိုက်အောင် လုပ်နေရတဲ့ သဘောရှိတယ်”ဟု ရှင်းပြခဲ့သည်။
ယခု မြန်မာ့အဏ္ဏ၀ါ စွမ်းအားရှင် ဂရု(ပ်)အက်စ် ကုမ္ပဏီ လိမိတက်၏ ရန်ကုန်မြို့လယ် မြေနေရာ ကျူးကျော်မှုကိုလည်း အဖွဲ့အစည်းများစွာက မည်သည့် အဖြေထွက်မည်ကို ဂရုပြု စောင့်ကြည့်လျှက် ရှိကြောင်း သတင်းရရှိသည်။
Tomorrow
