ဗိုလ်ချုပ်အောင်ဆန်း၏ ကျောင်းသားဘ၀ဒိုင်ယာရီ

ပို့စ်တင်ချိန် - 5/21/2014 02:17:00 AM

ကိုအောင်ဆန်း၏ ကျောင်းသားဘ၀ရေးခြစ်ထားသော ပန်းချီလက်ရာ

(ဆောင်းပါးရှင် - တင်နိုင်တိုး)

ဗိုလ်ချုပ်အောင်ဆန်းသည် စာရေးဝါသနာပါသူတစ်ဦးဖြစ်ပါသည်။ ငယ်စဉ် မူလတန်းကျောင်းသားဘ၀ကပင် ဖတ်စာအုပ်ထက်၌ ဇာတ်လမ်းတိုကလေးတစ်ပုဒ် ရေးသားခဲ့ဖူးသည်ကိုလည်း တွေ့ရှိရ၏။

ဗိုလ်ချုပ်၏ ကျောင်းသားဘ၀

ဗိုလ်ချုပ်အောင်ဆန်းက သူ၏ကျောင်းသားဘ၀နှင့်ပတ်သက်၍ ကျောင်းစနေဖြစ်ခဲ့ပုံကို ကိုယ်တိုင်ရေးအတ္ထုပ္ပတ္တိတွင် "ကျွန်တော်တို့၏မိဘများသည် ပညာကိုလည်း အထူးလိုလားသည်။ ကျွန်တော်၏ အစ်ကိုများကို ငါးနှစ်သားအရွယ်မှစ၍ ကျောင်းထားခဲ့လေသည်။ ကျွန်တော်တစ်ယောက်သာ အငယ်ဆုံးဖြစ်၍ အလိုလိုက်ကာထားသဖြင့် အသက်ရှစ်နှစ်ရောက်မှသာလျှင် ကျောင်းစနေရပေသည်" ဟု ရေးသားဖော်ပြထားပါသည်။

ရေနံချောင်း အမျိုးသားကျောင်းသားဘ၀ကို ဆက်လက်ရေးသားဖော်ပြရာ၌ "တန်းကျော်တက်ခဲ့ရပြန်သဖြင့် လေးနှစ်နှင့် ၁၀ တန်းအောင်မြင်သည်။ အင်္ဂလိပ်မြန်မာ သတ္တမတန်းစာမေးပွဲတွင် ဗမာတစ်ပြည်လုံး န၀မစွဲခဲ့၍ အထက်တန်းစကောလားရှစ် ရခဲ့သည်။ ဗုဒ္ဓဘာသာကျောင်းနှင့် အမျိုးသားကျောင်းများတွင် ပထမစွဲခဲ့၍ ဦးရွှေခိုဆုရရှိခဲ့ပြီးနောက် ရန်ကုန်တက္ကသိုလ်တွင် ခြောက်နှစ်ခွဲမျှနေခဲ့ရသည်" ဟူ၍ပါရှိခဲ့သည်။

တတိယတန်း ဖတ်စာအုပ်

ဗိုလ်ချုပ်အောင်ဆန်း တတိယတန်းကျောင်းသားဘ၀ ဆရာတော်ဦးသောဘိတကျောင်းတွင် ပညာဆည်းပူးခဲ့စဉ်က တတိယတန်းဖတ်စာအုပ်ထဲတွင် ဇာတ်လမ်းကလေးတစ်ပုဒ် ရေးသားထားခဲ့ဖူးပါသည်။ ကလေးတို့သဘာဝ ဖတ်စာအုပ်မှ ပိုနေသောနေရာတွင် ရောက်တတ်ရာရာ ရေးသားထားခြင်းဖြစ်သည်။ ယင်းဖတ်စာအုပ်ကို နတ်မောက်မြို့နေ ဆွေမျိုးသားချင်းများက ထိန်းသိမ်းထားခဲ့ပြီး ဗိုလ်ချုပ်နှင့် ငယ်စဉ်ကကျောင်းနေဖက်ဖြစ်ခဲ့ဖူးသူနှင့် ဆရာအချို့က မူလတန်းကျောင်းသားဘ၀ မောင်အောင်ဆန်း၏ စာအုပ်ဖြစ်ကြောင်း အတည်ပြုပေးခဲ့ကြသည်။

ဇာတ်လမ်းတိုတစ်ပုဒ်

မူလတန်းကျောင်းသားကလေး မောင်အောင်ဆန်း၏ ဇာတ်လမ်းတိုမှာ "လိမ္မာသောသူပြော - ဆိုးသောကလေးများသည် ငှက်များကိုပစ်ကြသည်။ အလွန်မှားသည်။ အလွန်ဆိုးသည်။ ဆိုးသောလူပြော - ဘာမှားသလဲကွ။ ဘာဆိုးသလဲကွဟင်။ လိမ္မာသောသူပြော - ငှက်ပစ်တာဆိုးတယ်ကွေ့ (ကွ)။ ဆိုးသောလူပြော - ဒါဖြင့် မင်းငှက်သားမစားဘူးလား။ လိမ္မာသောလူပြော - စားတယ်။ ဆိုးသောလူပြော - မင်းငှက်သား မစားချင်ဘူးလား။ လိမ္မာသောလူပြော - စားချင်တယ်။ ဆိုးသောလူပြော - မင်းစားချင်ရဲ့သားနဲ့ ငှက်ပစ်တဲ့လူမိုက်တယ်၊ ဆိုးတယ်လို့ ဘာလို့ပြောရတုန်း။ လိမ္မာသောလူပြော - မင်း ငါကပြောတာမှာ ဆိုးတယ်လို့ပြောသည် မဟုတ်ဘူးလား။ ဆိုးသောလူပြော - အေး။ လိမ္မာသောလူပြော - မင်းတို့ငှက်ပစ်လို့ မိုက်တာဆိုတာ ကမ္ဘာပေါ်မှာ အမိုက်ဆုံးပဲ။ ဆိုးသောလူပြော - နောက်မပြောနဲ့ကွာ။ မင်းစားချင်ရဲ့သားနဲ့ မိုက်တယ်လို့ဆိုတာကိုကွ" ဟူ၍ ဖြစ်ပါသည်။

အထက်တန်းကျောင်းသားဘ၀

ဗိုလ်ချုပ်အောင်ဆန်းသည် ရေနံချောင်းမြို့ အမျိုးသားကျောင်းတွင် အထက်တန်းကျောင်းသားတစ်ဦးအဖြစ် ပညာဆည်းပူးခဲ့စဉ်က နေ့စဉ်မှတ်တမ်းရေးသားလေ့ရှိကြောင်း အမှတ်အသားတွေ့ရှိရပါသည်။
ဗိုလ်ချုပ်အောင်ဆန်း၏ ကျောင်းသားဘ၀ ဒိုင်ယာရီမှာ ၁၉၇၁ ခုနှစ်ကပင် ဆွေးမြေ့လျက် စာရွက်များ ၀ါကြန့်နေပြီဖြစ်ပြီး စာလုံးများပင် မှိန်စပြုနေကြောင်း ဆိုပါသည်။ ထိုစဉ်ကပင် စာအားလုံးမှာ ဖတ်မရတော့ဘဲ စာရွက်အချို့က ပြုတ်ထွက်နေပြီဖြစ်သည်ဆို၏။ ဖတ်ရှု၍ရရှိသမျှကို စာပေတာဝန်သိသူတို့က မှတ်တမ်းတင်ခဲ့ကြရာ နှောင်းခေတ်သုတေသီများ၊ စာပေ၀ါသနာရှင်များ ဖတ်ရှုလေ့လာခွင့် ရရှိခဲ့သည်။

၁၉၃၂ ခုနှစ် ဖေဖော်ဝါရီ ၈ ရက်

၁၀ တန်းကျောင်းသား ကိုအောင်ဆန်းက သူ၏ဒိုင်ယာရီတွင် (၈-၂-၁၉၃၂) ရက်စွဲဖြင့် " ၈-၂-၃၂ ကစ၍ နေ့ကျောင်းသား ၁၀ တန်းသားတွေတက်ရ၊ လေးယောက်သာတက်သည်။ ပျင်းစရာကောင်းလှ၏။ သို့ရာတွင် ဦးပုကား ပျင်းဟန်မတူ၊ စိတ်ပါစွာ ပြုပေ၏။ ချီးမွမ်းဖွယ်ပင်" ဟူ၍ ရေးမှတ်ထားပါသည်။ ၁၀ တန်းကျောင်းသား ကိုအောင်ဆန်းက စေတနာပါသည့် ဆရာဦးပုကို တလေးတစား မှတ်တမ်းတင်ထားခြင်းဖြစ်သည်။

၁၉၃၂ ခုနှစ် ဖေဖော်ဝါရီလ ၁၄ ရက်

ကျောင်းသားကိုအောင်ဆန်း၏ ဒိုင်ယာရီတွင် (၁၄-၂-၁၉၃၂) ရက်စွဲဖြင့် မှတ်တမ်းရေးသားထားရာ၌ "၁၄-၂-၃၂ (တပို့တွဲလဆန်း ၁ ရက်) တနင်္ဂနွေနေ့ ယနေ့ ဘချမ်းဆိုင်သွားသည်။ လမ်း၌ သံဃသြ၀ါဒခံ ၀ံသာနုရက္ခိတအသင်းဝင် နံပတ် ၁ စသည်ဖြင့် ၀ံသာနုအိမ်များတွင် ကပ်ထားသည်ကို တွေ့ရသည်" ဟူ၍ မှတ်သားထားပါသည်။

ကိုအောင်ဆန်းအနေဖြင့် ပတ်ဝန်းကျင်အပေါ် အကဲခတ်တတ်မှု၊ အလေးဂရုပြုမှုများကို ထင်ရှားစေပါသည်။

၁၉၃၂ ခုနှစ် ဖေဖော်ဝါရီလ ၁၅ ရက်

၁၀ တန်းကျောင်းသား ကိုအောင်ဆန်း၏ဒိုင်ယာရီတွင် (၁၅-၂-၁၉၃၂) ရက်စွဲဖြင့် ရေးမှတ်ထားရာ၌လည်း " မနေ့က ဘချမ်းဆိုင်တွင် ပုလိပ်စာဇင်တစ်ယောက်က သူကြီးကို ခင်ဗျားတို့အရပ်ထဲမယ် ဘာပြုလို့ ကင်းစောင့်မထားသလဲ၊ ဘာလဲနှင့် ဘာမှမဆိုင်ဘဲနှင့် ငေါက်နေတာ မတရားဘူး။ သည်ကောင်က ဘာလုပ်တုန်း၊ ညာလုပ်တုန်း စသဖြင့် ပြောသံကြားရ။ သြော်ပုလိပ်များက ကြောက်မှတ်လို့ ဖြဲခြောက်တာ ဘာရမလဲ" ဟူ၍ တွေ့ရှိရပါသည်။

ဤတွင် ဗိုလ်ချုပ်အောင်ဆန်းသည် ကျောင်းသားဘ၀ကပင် မတရားမှုကို မုန်းတီးသူဖြစ်ကြောင်း တွေ့ရှိရပါသည်။ ထို့ပြင် ယင်းဒိုင်ယာရီပါစာသားများက ကိုအောင်ဆန်း၏ မျိုးချစ်စိတ်နှင့် ဇာတိစိတ်ကို ပြသနေပါသည်။

၁၉၃၂ ခုနှစ် ဖေဖော်ဝါရီလ ၁၆ ရက်

ကိုအောင်ဆန်း၏ (၁၆-၂-၁၉၃၂) ရက်စွဲဖြင့် ရေးသားထားသော ဒိုင်ယာရီတွင် "၁၆-၂-၃၂ (တပို့တွဲလဆန်း ၁၀ ရက်) အင်္ဂါနေ့ ယနေ့ အစ်ကိုကိုအောင်သန်းထံမှ စာရရှိသည်။ စာနှစ်စောင်ပါသည်။ တစ်စောင်ကား ကျွန်ုပ်ထံ၊ တစ်စောင်ကား အစ်ကိုကြီးထံထည့်သည်။ စာပါအကျဉ်းချုပ်မှာ ကျွန်ုပ်ထံစာ၌ ယူနီယံမဂ္ဂဇင်း ပို့လိုက်ကြောင်း။ နိုင်ငံရေးများသာထည့်ကြောင်း။ ထုတ်ဝေနေကျ ကောလိပ်မဂ္ဂဇင်းနှင့်မတူကြောင်း စသည်တို့ ပါသည်။ ကျွန်ုပ်ထံပေးစာကို ၂၉-၁-၃၂ ခု ရက်စွဲတပ်ပါလာသည်။ အစ်ကိုကြီးထံစာမှာ မည်သည့်ရက်တွင် ပို့သည်ကို မသိရ။ သေချာမကြည့်မိလေ" ဟူ၍ ရေးသားဖော်ပြထားကြောင်း တွေ့ရှိရပါသည်။

ကိုအောင်ဆန်း၏ စိတ်ဓာတ်

ကိုအောင်ဆန်း ၁၀ တန်းကျောင်းသားဘ၀တွင် အစ်ကိုကိုအောင်သန်းမှာ ရန်ကုန်တက္ကသိုလ်သို့ရောက်ရှိနေရာ ညီဖြစ်သူကို အောင်ဆန်းဖတ်ရှုရန်အတွက် စာနှင့်အတူ မဂ္ဂဇင်းစာအုပ်ပေးပို့ခဲ့ခြင်းဖြစ်သည်။ ယင်းစာနှင့်အတူ ကိုအောင်ဆန်းတို့ အစ်ကိုကြီးဟုခေါ်ဆိုကြသည့် ဦးဘ၀င်းထံပေးစာလည်း ပါဝင်ခဲ့သည်။ သို့သော် ကိုအောင်ဆန်းက အစ်ကိုကြီးထံပေးပို့သောစာကို ခွင့်ပြုချက်မဲ့၊ စည်းမဲ့ကမ်းမဲ့ ဖတ်ရှုခဲ့ခြင်း ရှိခဲ့ဟန်မတူပေ။ ကိုအောင်ဆန်းသည် ဒိုင်ယာရီရေးလေ့ရှိသော်လည်း မည်သည့်အရွယ်မှ စရေးသည်ကို ကောင်းစွာမသိရပေ။

ပန်းချီလက်ရာ

နေရှင်နယ်ကျောင်းသား ကိုအောင်ဆန်းသည် တစ်ခါတစ်ရံ ရောက်တတ်ရာရာ ရုပ်ပုံကလေးများလည်း လျှောက်ဆွဲတတ်သည်။ ပန်းချီပုံတစ်ပုံတွင် ကျောင်းအုပ်ကြီး ဦးမေအောင်ပုံကို ရေးဆွဲထားဟန်ရှိပြီး ဆရာကြီး ဦးပုအမည်၊ ဦးဘကြမ်းအမည်များကိုလည်း ရေးခြစ်ထားပါသည်။ ဦးပုမှာ ကျောင်းသားကိုအောင်ဆန်း၏ ဒိုင်ယာရီပါ ဆရာကြီးအမည်ဖြစ်ပြီး ဦးဘကြမ်းမှာ ဒိုင်ယာရီပါ ဈေးဆိုင်ပိုင်ရှင် ဦးဘချမ်းကို ဆိုလိုဟန်ရှိပါသည်။

မိခင်ထံပို့စာ

ဤတွင် ကိုအောင်ဆန်း ရန်ကုန်တက္ကသိုလ် ကျောင်းသားဘ၀က မိခင်ဒေါ်စုထံသို့ ပေးပို့ခဲ့သည့် စာကလေးတစ်စောင်ကိုလည်း တွေ့ရှိရပါသည်။ စာ၏လက်ျာဘက်ထိပ်တွင် "ရန်ကုန်မြို့ ဒီဇင်ဘာ ၂ ရက်" ဟု ရက်စွဲထိုးထားပါသည်။ စာမှာ "ရိုသေလေးစားစွာ စာရေးအစီရင်ခံပါသည် အမိခင်ဗျား။ မနေ့က အစ်ကိုကြီးထံမှ ငွေ ၅၀ိ ကိုရရှိပါသည်။ လွန်ခဲ့သောလက ငွေ ၈ ကျပ်ကျော်ကျော်လောက်ပိုပါသည်။ ဘက်ရိုက်ကစားသင်းသို့လည်း မ၀င်ဖြစ်။ ထိုလတွင် မူလရည်မှန်းထားသည့်အတိုင်း သုံး၍မဖြစ်။ ဘက်ရိုက်အသင်းဝင်မည်ဟု ပထမက ကြံစည်ခဲ့သော်လည်း အခွင့်မသာ၍မ၀င်ဖြစ်။ သို့ရာတွင် ယူလာခဲ့သောငွေကား များစွာမပိုပါ။ ယခုအခါ ကျွန်တော်သည် မိမိသုံးသည့်စာရင်းကို မှန်ကန်နိုင်သမျှ မှန်ကန်အောင် သိမ်းထားပါသည်။ ထိုစာရင်းကို ပြန်လှန်ကြည့်သော် အပိုသုံးမရှိ။ သို့သော် ငွေကားများစွာမပို။ ဤကိုထောက်၍ ပါးစပ်ပြောနှင့် အလုပ်လုပ်ဖို့ကားလွယ်၏။ တကယ်အလုပ်လုပ်ရာ၌ကား အကျဉ်းအကျပ်တွေ့ကြောင်း သိသာနိုင်လေသည်။ အောင်ဆန်း အခန်းနံပါတ် ၁၃" ဟူ၍ ရေးထားပါသည်။

ကျမ်းကိုး

၁။ ဗိုလ်ချုပ်အောင်ဆန်းအတ္ထုပ္ပတ္တိ (သခင်ကိုယ်တော်မှိုင်းတည်းဖြတ်)
၂။ ဗိုလ်ချုပ်၏ ခြေစလက်နကလေးများ (နတ်မောက်လင်းရောင်) ရှုဒေါင့်ဂျာနယ်(၁၅-၇-၇၁)

Eleven Media Group