ရန်ကုန်ပြည်သူ့ဆေးရုံကြီး အရေးပေါ် ကုသဆောင်တွင် မှုခင်းနှင့်ပတ်သက်၍ လာရောက်ကုသသူ တစ်ရက်လျှင် ပျမ်းမျှဦးရေ ၄၀ မှ ၅၀ ကြားရှိနေ

ပို့စ်တင်ချိန် - 5/10/2014 01:01:00 PM

ဝင်းမြင့်ကျော်
ရန်ကုန်ဆေးရုံကြီးရှိ အရေးပေါ်နှင့် ထိခိုက်ဒဏ်ရာရ ကုသဆောင်သို့ လာရောက်ကုသသော လူနာအချို့အား တွေ့ရစဉ် (ဓာတ်ပုံ-၀င်းမြင့်ကျော်)
ရန်ကုန်ပြည်သူ့ဆေးရုံကြီးရှိ အရေးပေါ်လူနာ ကုသဆောင်သို့ ရဲမှုခင်းနှင့်ပတ်သက်၍ လာရောက်ကုသနေသည့် လူနာဦးရေ တစ်ရက်လျှင် ပျမ်းမျှဦးရေ ၄၀ မှ ၅၀ ကြား ရှိနေကြောင်း ရန်ကုန်တိုင်းဒေသကြီး အနောက်ပိုင်းခရိုင် ရဲတပ်ဖွဲ့မှူးရုံးမှ မေ ၉ ရက်တွင် စုံစမ်းသိရသည်။

ယင်းကဲ့သို့ ရဲမှုခင်းနှင့်ပတ်သက်ပြီး ရန်ကုန်ပြည်သူ့ ဆေးရုံကြီးသို့ ရောက်ရှိလာသည့် အရေးပေါ်လူနာ အများစုမှာ ယာဉ်တိုက်မှုနှင့် ခိုက်ရန်ဖြစ်ပွားမှုတို့မှ လူနာများဖြစ်ကြောင်း သိရသည်။

“အရေးပေါ်လူနာနဲ့ ပတ်သက်ပြီးတော့ ရန်ကုန်ပြည်သူ့ဆေးရုံကြီး တစ်ခုထဲကိုပဲ နေ့စဉ်လာရောက်နေတဲ့ လူနာအရေအတွက်က ၄၀ ကနေ ၅၀ ကြားရှိတယ်။ အရိုး၊ ဦးနှောက်နဲ့ ထိခိုက်ဒဏ်ရာဆိုပြီးတော့ အပိုင်းလိုက် ကုသပေးတဲ့ အဆောင်တွေ ခွဲထားတယ်” ဟု  ရန်ကုန်တိုင်းဒေသကြီး အနောက်ပိုင်းခရိုင် ရဲတပ်ဖွဲ့မှူးရုံးမှ တပ်ဖွဲ့မှူး ဒုတိယရဲမှူးကြီးဝင်းကြည်က မေ ၉ ရက်တွင် ပြောကြားသည်။

“လူနာတွေက နာကျင်လို့အော်နေ ပေမယ့်လည်း လူနာတွေတစ်ဦးချင်းစီမှာ ဆရာဝန် (သို့မဟုတ်) သူနာပြုဆရာမ တစ်ဦးချင်းစီ မတွေ့ရဘူး။ တချို့လူနာတွေကို ကုသဖို့ဆိုရင် ဆရာဝန်ကို စောင့်နေတယ်” ဟု ကြည့်မြင်တိုင်မြို့နယ်တွင် နေထိုင်သူ အမျိုးသားတစ်ဦးက ဆိုသည်။

ယခုနှစ် ဇန်န၀ါရီမှ ဧပြီလအထိ လေးလအတွင်း ပြည်တွင်း၌ မော်တော်ယာဉ်တိုက်မှု ၁၅၅၉ မှု၊ ဆိုင်ကယ်တိုက်မှု ၂၀၀၇ မှု၊ မော်တော်ယာဉ်နှင့် ဆိုင်ကယ်တိုက်မှု ၈၂၅ မှု၊ အခြားယာဉ်တိုက်မှု ၉၃၂ မှု ဖြစ်ပွား ခဲ့ပြီး စုစုပေါင်း ၅၃၂၃ မှု ဖြစ်ပွားခဲ့ကြောင်း သိရသည်။

News Eleven