သရဲတစ္ဆေရန်ကို ကာကွယ်နည်း

ပို့စ်တင်ချိန် - 5/08/2014 10:15:00 AM

       သရဲ တစ္ဆေစသည်တို့ဟာ ပြိတ္တာအမျိုးစားထဲမှာ ပါဝင်ပါတယ်။ အကျီးတန်အရုပ်ဆိုးပြီး ၀ဋ်ကျွေးခံစားနေရသူတွေပါ။ ညအမှောင်ဟာ သူတို့ရဲ့ လုပ်ရှုားသွားလာချိန်ကာလပေါ့။ သူတို့ကို တွေ့မြင်ရတဲ့သူတွေဟာ အသည်းထိတ်အောင် ကြောက်လန့် ထွက်ပြေးတတ်ကြပါတယ်။ မတွေ့မြင်သော်လည်း အမှောင်ထဲ တစ်ယောက်တည်းသွားလာတဲ့အခါ အသည်းငယ်သူများ စိတ် ချောက်ချား ကြောက်လန့်တတ်ကြတယ်။ နာနာဘာဝ ၀ိနာဘာဝ ဘီလူး၊ သရဲ၊ တစ္ဆေကြောက်တတ်တဲ့သူများဟာ မေတ္တာအားနည်း လို့ပါ။ မေတ္တာအားနည်းတော့ စိတ်မလုံခြုံဘူး။ စိတ်မလုံခြုံတော့ ကြောက်စိတ်တွေ ၀င်လာတာပေါ့။
       ဘုရားရှင်ကိုယ်တော်မြတ်က ရဟန်းတွေကို မိန့်တော်မူတယ်။

       "ရဟန်းတို့...၊ အမျိုးသားမရှိ မိန်းကလေးတွေကြီးပဲ ရှိတဲ့အိမ်ဟာ မလုံခြုံဘူး။ လူဆိုးသူခိုးတွေ လူရမ်းကားတွေက ၀င်ရောက် နှောက်ယှက်စော်ကားဖျက်ဆီးနိုင်တယ်။ အဲလိုပဲ မေတ္တာမပွားတဲ့သူတွေကို ဘီလူး၊ သရဲ၊ တစ္ဆေ၊ မှင်စာတွေဟာ အလွယ်တကူ ၀င်ရောက် ခြောက်လန့်အန္တရာယ်ပြုနိုင်တယ်။
       ရဟန်းတို့...၊ ယောကျာင်္းလေးတွေချည်းပဲ ရှိတဲ့အိမ်ကို လူဆိုးသူခိုး လူရမ်းကားများ မ၀င်ရဲကြဘူး။ အနိုင်ကျင့်မစော်ကားရဲ ကြဘူး။ ထို့တူ မေတ္တာပွားများနေတဲ့သူကို ဘီလူး၊ သရဲ၊ တစ္ဆေစသည်များ မနှောက်ယှက်ရဲကြပါဘူး။
       ရဟန်းတို့...၊ နောက်ဥပမာတစ်ခုက အသွားချွန်ပြီး ထက်နေတဲ့ လှံကို ထိခိုက်ရှမှာစိုးတဲ့အတွက် မည်သူမျှ လက်နဲ့ သွားမဆုပ် ကိုင်ကြပါဘူး။ ထို့အတူပဲ ဘီလူး၊ သရဲ၊ တစ္ဆေ၊ မှင်စာစသည်တို့ဟာလည်း မေတ္တာပွားနေတဲ့သူတွေကို အန္တရာယ်ပြုလိုသည့်တိုင် သွားမထိရဲကြပါဘူး။ ဘာဖြစ်လို့လည်းဆိုရင် မေတ္တာပွားနေတဲ့သူကို အန္တရာယ်ပေးခြင်းဟာ သူတို့အတွက် ဆိုးကျိုးပဲ ဖြစ်မယ်ဆိုတာ သိလို့ပါ။
       ဒါကြောင့် တစ်ယောက်တည်း ညအမှောင် သရဲ တစ္ဆေကြောက်တတ်သူများ မေတ္တာပွားနေလိုက်ပါ။ “ဒီအနီးတ၀ိုက်မှာရှိတဲ့ နာနာဘာဝ ၀ိနာဘာဝ သရဲ၊ တစ္ဆေ၊ ဘီးလူး ပြိတ္တာများ ကျန်းမာပါစေ၊ ချမ်းသာပါစေ။ ဘေးကင်းပါစေ။”ဟု အကြိမ်ကြိမ် စိတ်ပါလက်ပါ မေတ္တာပွားလိုက်ပါ။ ထိုသို့မေတ္တာပွားနေခြင်းဖြင့် ဘ၀လုံခြုံမှုကိုရှိပြီး အကြောက်တရားမှ ကင်းဝေးပါလိမ့်မယ်။

မေတ္တာအရှိန်အ၀ါကြောင့် အားလုံးဘေးကင်းကြပါစေ။

ရွှေစမ်းမြေ အရှင်က၀ိဓဇသာရ