သန်းခေါင်စာရင်းတွင် နိုင်ငံ့ဂုဏ်ဆောင် မသန်စွမ်း အားကစားသမား အမှန်အတိုင်း အကောက်မခံရ

ပို့စ်တင်ချိန် - 5/04/2014 11:02:00 AM

ရန်ကုန်၊ မေ ၃

မြန်မာနိုင်ငံတွင် နှစ်ပေါင်း သုံးဆယ်ကျော်အတွင်း ပထမဆုံးအကြိမ်အဖြစ် ပြည်လုံးကျွတ် သန်းခေါင်စာရင်း ကောက်ယူရာတွင် နိုင်ငံ့ဂုဏ်ဆောင် မသန်စွမ်း အားကစားသမား အပါအဝင် မသန်စွမ်းသူ အချို့မှာ မသန်စွမ်းသူများ အဖြစ် စာရင်းထည့်သွင်း အကောက်ခံရခြင်း မရှိခဲ့ကြောင်း မသန်စွမ်း ကစားသမား အချို့ထံမှ သိရသည်။

မသန်စွမ်းသူများကို သန်းခေါင်စာရင်း လာရောက် ကောက်ယူရာတွင် မသန်စွမ်း ဖြစ်နေကြောင်း ပြောဆိုသော်လည်း ထည့်သွင်း ကောက်ယူခြင်း မခံရကြောင်း ၎င်းတို့က ပြောကြားသည်။
“သန်းခေါင်စာရင်း လာကောက်တော့ မျက်စိမြင်လား၊ နားကြားလား၊ ဦးနှောက်ကောင်းလား မေးပါတယ်။ ကောင်းပါတယ်။ ဒါပေမဲ့ ခြေတောက်နှစ်ဖက် မရှိဘူးပြောတော့ လူကောင်းစာရင်းထဲ ထည့်လိုက်တယ်” ဟု သံလုံး၊ သံပြားပစ် မွေးရာပါ ခြေနှစ်ဖက်ပြတ် မသန်စွမ်း အားကစားသမား ဖြစ်သူ ဦးထူးထူးအောင်က ပြောကြားသည်။

မသန်စွမ်းစာရင်း ကောက်ယူရာတွင် ညာဏ်ရည် မသန်စွမ်၊ ကိုယ်အင်္ဂါ မသန်စွမ်း၊ အမြင်အာရုံ မသန်စွမ်း၊ အကြားအာရုံ မသန်စွမ်း စသည့် ၎င်းလေးမျိုးတွင် တစ်ခုခု အကျုံးဝင်နေပါက မသန်စွမ်း စာရင်းအဖြစ် ကောက်ယူရမည်ဟု သန်းခေါင်စာရင်း ကောက်ယူရေး ကော်မတီထံမှ သိရသည်။

မသန်စွမ်း အားကစားသမား ဦးထူးထူးအောင်အပါ ၇ ကြိမ်မြောက် အာဆီယံ မသန်စွမ်း အားကစားပြိုင်ပွဲ ဝှီးချဲ ဘတ်စကတ်ဘော ဝင်ပြိုင်ခဲ့သည့် ဦးဝဏ္ဏကျော်စွာနှင့် နိုင်ငံတကာ မသန်စွမ်း ပြိုင်ပွဲများတွင် သံလုံး၊ သံပြားပစ် အားကစားမှာ ဆုတံဆိပ်များစွာ ရရှိခဲ့တဲ့ ခြေတစ်ဖက်မဲ့သူ ဦးမျိုးဆွေတို့ကို မသန်စွမ်းအဖြစ် သန်းခေါင်စာရင်းတွင် ကောက်ယူခြင်း မရှိကြောင်း ကာယကံရှင်များက ပြောဆိုသည်။
“စာရင်းကောက် ဆရာ၊ ဆရာမတွေကို သင်တန်းပေးထားတာက အချိန် အရမ်းနည်းနေတဲ့ အတွက် လစ်ဟာမှုတွေ ရှိနိုင်တာပါ” ဟု ခြေတစ်ဖက်မဲ့ မသန်စွမ်းသူ အားကစားသမား ဦးမျိုးဆွေက ပြောကြားသည်။

သန်းခေါင်စာရင်းတွင် မသန်စွမ်း ဖြစ်နေသူများကိုပါ ထည့်သွင်းကောက်ခံသွားရန် ဆောင်ရွက်ထားခဲ့သော်လည်း အကြောင်း အမျိုးမျိုးကြောင့် လစ်ဟာမှုများ ရှိခဲ့ကြောင်း လူမှုဝန်ထမ်းဦးစီးဌာနမှ ဒုတိယညွန်ကြားရေးမှူး ဒေါ်ယုယုဆွေက ပြောကြားသည်။
“မသန်စွမ်း မေးခွန်းပုံစံတွင် အပိုင်းက ၄ ပိုင်း ဖြစ်နေပါတယ်။ အဲဒီအပိုင်းတွေကို စာရင်းကောက် ဆရာမက ခွဲခြားရဖို့ ခက်ပါတယ်။ အဲဒါတွေကို ခွဲခြားသိဖို့အတွက် လက်စွဲစာအုပ်တွေ ထုတ်ဝေပေးထားတာပါ” ဟု ဒေါ်ယုယုဆွေက ပြောကြားသည်။

သန်းခေါင်စာရင်း ကောက်ရာတွင် မသန်စွမ်းစာရင်းအတွင်း ပါသွားမည်ဟု မျှော်လင့်ထားသော်လည်း စာရင်းကောက်များက အဆောင်နေသူအားလုံး စာရင်းကိုသာ ကောက်ယူသွားသည့် အတွက် မသန်စွမ်းသူစာရင်း မဝင်ခဲ့ကြောင်း ရန်ကုန်မြို့၊ လမ်းမတော်မြို့နယ်တွင် အဆောင်နေသူ တစ်ဦးဖြစ်သည့် ခြေတစ်ဖက် မရှိသော ဒေါ်ကြူကြူလိုင်က ပြောကြားသည်။

ယင်းအဆောင်တွင် ဒေါ်ကြူကြူလိုင် အပါ လက်မသန်သူ တစ်ဦးလည်း မသန်စွမ်းစာရင်းတွင် ထည့်သွင်း အကောက်မခံခဲ့ရကြောင်း ၎င်းကဆိုသည်။

မသန်စွမ်းသူများ သန်းခေါင်စာရင်းအတွင်း ထည့်သွင်းကောက်ခံရန် ကျန်ခဲ့မှုကြောင့် မသန်းစွမ်းသူ ဖွံဖြိုးရေး လုပ်ဆောင်ရာတွင် လိုအပ်ချက်များ ရှိလာနိုင်ကြောင်း မသန်စွမ်းသူများ ဖွံ့ဖြိုးရေး လုပ်ဆောင်နေသော ရွှေမင်းသား ဖောင်ဒေးရှင်း ဥက္ကဋ္ဌ ဦးမြတ်သူဝင်းက ပြောကြားသည်။

မြန်မာနိုင်ငံတွင် လူဦးရေ ၁.၃ သန်းမှာ မသန်စွမ်းများ ဖြစ်ကြောင်း ၂၀၀၉ ခုနှစ်တွင် လူမှုဝန်ထမ်းဦးစီးဌာနမှ ကောက်ခံထားသည့် စစ်တမ်းများအရ သိရသည်။

The Voice Weekly