ဘာသာရေးကို နိုင်ငံရေးအတွက် အလွဲသုံးစား ပြုနေကြပြီလား

ပို့စ်တင်ချိန် - 5/21/2014 01:56:00 PM

စည်သူအောင်မြင့်

ပြီးခဲ့တဲ့ မေလ ၁၅ ရက်နေ့က ဧရာဝတီတိုင်း ဇလွန်မြို့ ပြည်ထောင်စုကြံ့ခိုင်ရေးနဲ့ ဖွံ့ဖြိုးရေးပါတီက ဦးဆောင်ပြီး လူ ၅,၀၀၀ လောက် ပါဝင်တဲ့ ဆန္ဒထုတ်ဖော် ပွဲတစ်ခု ပြုလုပ်ပါတယ်။ ဆန္ဒထုတ်ဖော်ရတဲ့ အဓိကအကြောင်းဟာ ဖွဲ့စည်းပုံအခြေခံ ဥပဒေထဲက ပုဒ်မ ၅၉(စ) မပြင်ရေးဆိုပေမယ့် တကယ့်လက်တွေ့ ပွဲလုပ်ဖို့ စည်းရုံးရာမှာတော့ ဘုရားဆင်းတုတော်တွေ မဲဖောက်ပေးမယ်လို့ ခေါ်ယူစည်းရုံးမှုတွေ လုပ်ခဲ့တယ်လို့ သတင်းတွေက ဆိုပါတယ်။ တကယ်လည်း ဘုရားဆင်းတုတော် အဆူ ၈၀၀ လောက် မဲဖောက်ပေးခဲ့တယ်လို့ မြို့နယ်ပြည်ခိုင်ဖြိုးအတွင်းရေးမှူး ဦးချိုမြင့်ခိုင်က ပြောပါတယ်။ ဒီလုပ်ရပ်ဟာ ဘာသာရေးကို နိုင်ငံရေးအတွက် အလွဲသုံးစားလုပ်တဲ့ လုပ်ရပ်အဖြစ် သတ်မှတ်နိုင်သလား၊ အလွဲသုံးစားလုပ်တယ်ဆိုတာ ပေါ်ပေါက်ရင် ဘယ်လိုအရေးယူလို့ရသလဲ၊ ဒါနဲ့ ပတ်သက်ပြီး ဘယ်လိုဝေဖန်မှုတွေ ရှိနေသလဲဆိုတာ ဆွေးနွေးတင်ပြသွားပါ့မယ်။

ဒီဆန္ဒထုတ်ဖော်ပွဲကို ပြည်သူတွေလာ ရောက်ဖို့စည်းရုံးရာမှာ ဘုရားဆင်းတုတော်တွေ မဲဖောက်ပေးမယ်ဆိုတဲ့ ပြောဆို စည်းရုံးမှု ရှိခဲ့တယ်ဆိုတာကိုတော့ ဘယ်သူမှ မငြင်းကြပါဘူး။ ဒါတင်မက ဒီဆန္ဒထုတ် ဖော်ပွဲမလုပ်ခင် ဇလွန် အမျိုးဘာသာ သာသနာ စောင့်ရှောက်ရေးအဖွဲ့ မဘသ ဘဏ္ဍာရေးမှူးဆရာတော် ဦးသဒ္ဓမ္မ၀ံသက ဒီပွဲကို ဦးဆောင်တဲ့ ပြည်ခိုင်ဖြိုးပါတီ တာဝန်ရှိသူတွေဆီ သွားပြီး ဘာသာရေးနဲ့ နိုင်ငံရေးကိစ္စ ရောမလုပ်ဖို့၊ ကြိုတင်သွားရောက် တားဆီးခဲ့သေးတယ်လို့ ဆိုပါတယ်။ ဒါတင်မက မဘသဥက္ကဋ္ဌ ဆရာတော်ကိုယ်တိုင် သက်ဆိုင်ရာတွေကို ကြိုတင် အကြောင်းကြား တားမြစ်ခဲ့သေးတယ်လို့ မိန့်ပါတယ်။ ဒါပေမဲ့ ပြည်ခိုင်ဖြိုးပါတီ တာဝန်ရှိသူတွေကတော့ လက်ခံခြင်းမရှိဘဲ ဆန္ဒထုတ်ဖော်ပွဲနဲ့ ဘုရားဆင်းတု မဲဖောက်ပွဲ တွဲလုပ်ပြီး ပရိတ်အဖွဲ့တွေ ထည့်သွင်းပြီး သာသနာ့အလံတွေလည်း အသုံးပြုသွားတယ်လို့ ဆိုပါတယ်။

နောက်တစ်ချက် ဇလွန် ပြည်ခိုင်ဖြိုးပါတီ အသုံးပြုခဲ့တဲ့ ဆိုင်းဘုတ်တွေမှာလည်း သက်ဆိုင်ရာကနေ ခွင့်ပြုချက်မရတဲ့

“အမျိုးမစစ်ရင် အမျိုးမချစ်ဘူး” “အမျိုးစစ်မှ အမျိုးချစ်မည်။ အမျိုးဖျက်သူ အလိုမရှိ” ဆိုတဲ့ စာသားတွေကိုလည်း အသုံးပြုခဲ့ပါသေးတယ်။ ပြည်ခိုင်ဖြိုးပါတီရဲ့ ဒီလုပ်ရပ်ကို ဇလွန် မဘသအဖွဲ့က ကန့်ကွက်တဲ့အကြောင်း ကြေညာချက် ထုတ်ပြန်ဖို့တောင် ရှိတယ်လို့ ဆိုပါတယ်။

အလားတူ မေလ ၁၂ ရက်နေ့က ဧရာဝတီတိုင်း ပုသိမ်မြို့ ကန်သာယာကွင်းမှာ ကျင်းပတဲ့ တောင်သူလယ်သမားများပါတီ ညီလာခံစင်မြင့်မှာ “အမျိုးဘာသာ သာသနာအား ကာကွယ်စောင့်ရှောက်မည့် လယ်သမားပါတီလာပြီ” ဆိုတဲ့ စာတန်းကြီး အထင်အရှား ချိတ်ဆွဲထားပါတယ်။ အာဏာပိုင်တွေ ခွင့်ပြုခဲ့သလား၊ ခွင့်ပြုချက် မရဘဲချိတ်ခဲ့သလား မသိနိုင်ပါ။ ဒီပွဲမှာ ပါတီဥက္ကဋ္ဌ ဦးကျော်စွာစိုးက “နောင် ၁၀ နှစ်လောက် ဒီအတိုင်း ဆက်သွားနေရင် ကျွန်တော်တို့ရဲ့လူမျိုးဟာ ကွယ်ပျောက်သွားနိုင်တဲ့ စိန်ခေါ်မှုတွေနဲ့ အခု ရင်ဆိုင် ကြုံတွေ့နေရပြီ။ ဒါကြောင့် ကျွန်တော်တို့ ပါတီအနေနဲ့ အမျိုးဘာသာ သာသနာကို ထာဝရတည်တံ့ခိုင်မြဲဖို့ တိုင်းရင်းသား၊ ပြည်သူလူထု၊ ရဟန်းရှင်လူတွေနဲ့ အတူ လက်တွဲပြီး ကာကွယ်စောင့်ရှောက်သွားမှာ ဖြစ်တယ်လို့ သစ္စာပြု ကတိပေးပြောကြား လိုပါတယ်” လို့ ပြောဆိုခဲ့ပါတယ်။

တကယ်တော့ ဘာသာရေးကို နိုင်ငံရေးထဲ ဆွဲထည့်တာ အဲဒီပါတီတွေက အရင်ဦးဆုံး မဟုတ်ပါဘူး။ ထင်ထင်ရှားရှားနဲ့ အစောဆုံး ဟောပြောခဲ့သူကတော့ မဘသ ဦးဆောင် ဆရာတော်တစ်ပါးဖြစ်တဲ့ မန္တလေး မစိုးရိမ်တိုက်သစ်က အရှင်ဝီရသူပါ။ သူက အမျိုးဘာသာ သာသနာ စောင့်ရှောက်ဖို့လိုတယ်။ ဒါကြောင့် ဖွဲ့စည်းပုံထဲက ပုဒ်မ ၅၉ (စ) ကို ဆက်ပြီး ထားဖို့လိုတယ်။ တကယ်လို့ ပုဒ်မ ၅၉(စ)ကို ပယ်ဖျက်လိုက်ရင် တရုတ်၊ ကုလားတွေ သမ္မတဖြစ်နိုင်တယ်ဆိုပြီး မမှန်မကန် ၀ါဒဖြန့် ဟောပြောတာမျိုး လုပ်ခဲ့သူပါ။ (ဖွဲ့စည်းပုံ အခြေခံဥပဒေ ပုဒ်မ ၅၉(ခ) မှာ “မိမိနှင့် မိမိ၏ မိဘနှစ်ပါးစလုံး နိုင်ငံတော်၏ အာဏာပိုင်နက်အတွင်း၌ မွေးဖွားသော တိုင်းရင်းသားမှဖြစ်သည့် မြန်မာနိုင်ငံသားဖြစ်ရမည်” လို့ အတိအလင်း ပါထားပြီး ဖြစ်ပါတယ်။)

ဒါတင်မက အရှင်ဝီရသူဟာ “ဒေါ်စုသာ သမ္မတဖြစ်သွားမယ် ဆိုလို့ရှိရင် တိုင်းပြည်အုပ်ချုပ်ရေးက ဒီ့ထက်ပိုပြီး ဖရိုဖရဲ ဖြစ်သွားနိုင်တယ်။ ပြီးတော့ လူမျိုးရေး၊ ဘာသာရေး အဓိကရုဏ်းတွေ ဒီထက်ပိုပြီး ကြီးထွားလာနိုင်တယ်။ ဒေါ်စုအပေါ် မကျေနပ်ချက်တွေနဲ့ ပြည်သူလူထုတွေက အုံကြွဆူပူမှုတွေ ပြန်ဖြစ်နိုင်တယ်” ဆိုပြီး ဘာသာရေးနဲ့ မဆိုင်တဲ့ နိုင်ငံရေးစကားတွေ မိန့်ခဲ့သူလည်း ဖြစ်ပါတယ်။ ဒါနဲ့ ပတ်သက်လို့ မဘသအဖွဲ့ကြီးက အဖွဲ့ရဲ့သဘောထား မဟုတ်ပါဘူးလို့ တရားဝင် ကန့်ကွက်တာ မရှိခဲ့ပါဘူး။

နိုင်ငံရေးပါတီများ မှတ်ပုံတင်ခြင်း ဥပဒေပုဒ်မ ၆(င) မှာ “ဘာသာရေးကို နိုင်ငံရေးအတွက် အလွဲသုံးစား မပြုရ”လို့ ပြဌာန်းထားပါတယ်။ တကယ်လို့ အဲဒီပုဒ်မကို ချိုးဖောက်ရင် ပါတီတစ်ခုအနေနဲ့ နိုင်ငံရေးပါတီအဖြစ် ဆက်လက်ရပ်တည်ပိုင်ခွင့် မရှိစေရဆိုပြီး ပုဒ်မ ၁၂(က)မှာ အတိအလင်း ပြဋ္ဌာန်းထားပြီး ဖြစ်ပါတယ်။ အခု ဇလွန် ပြည်ခိုင်ဖြိုးပါတီရဲ့ လုပ်ရပ်၊ တောင်သူလယ်သမား ဖွံ့ဖြိုးတိုးတက်ရေးပါတီ ဥက္ကဋ္ဌ ဦးကျော်စွာစိုးတို့ရဲ့ ပါတီစည်းရုံးမှုတွေဟာ ဘာသာရေးကို နိုင်ငံရေးအတွက် အလွဲသုံးစားမပြုရဆိုတဲ့ ဥပဒေပြဋ္ဌာန်းချက်နဲ့ ငြိစွန်းမှု ရှိမရှိ၊ စိစစ်၊ စစ်ဆေးဖို့ လိုပါတယ်။ ငြိစွန်းတယ်ဆိုရင်လည်း ဥပဒေ ပြဋ္ဌာန်းချက်ပါအတိုင်း အရေးယူဖို့ လိုပါတယ်။ ဒီပြဿနာ သတင်းမီဒီယာတွေမှာ အတိအလင်းဖော်ပြထားပြီးဖြစ်လို့ “တိုင်သူရှိမှ စစ်ဆေးမယ်”ဆိုတဲ့ သဘောမထားဘဲ ပြည်ထောင်စုရွေးကောက်ပွဲကော်မရှင်က အချိန်မဆိုင်းဘဲ ကိုင်တွယ်သင့်ပါတယ်။ ဒီလိုမှမဟုတ်ရင် သိပ်မကြာခင်ကာလ အတောအတွင်း နိုင်ငံရေးပါတီတွေဟာ သူတို့ပါတီတွေ မဲရဖို့အရေး၊ လူထုထောက်ခံမှုရဖို့အရေး နိုင်ငံရေးထဲ ဘာသာရေးကို ဆွဲထည့် လာစရာ ရှိနေပါတယ်။ “ကျုပ်တို့ ပါတီဟာ အမျိုးဘာသာသာသနာကို စောင့်ရှောက်တဲ့ ပါတီဖြစ်တယ်၊ ဗုဒ္ဓဘာသာ ၀င်မှန်ရင် ကျုပ်တို့ပါတီကို ထောက်ခံကြ၊ ကျုပ်တို့ပါတီကို မဲထည့်ကြ” ဆိုတာမျိုး ဖြစ်မလာဘူးလို့ မပြောနိုင်ပါကြောင်း သုံးသပ်တင်ပြလိုက်ရပါတယ်။

Mizzima Burmese