ကုသဖို့ခက်နေဆဲ ပဲလောကမှရောဂါ

ပို့စ်တင်ချိန် - 5/14/2014 07:27:00 PM

ပဲဈေးကွက်တွင် ပဲကုမ္ပဏီများက လေရောင်းလေ၀ယ် (ကြိုပွိုင့်)ဖြင့် ရောင်းဝယ်ထားပြီး ငွေကြေးပြဿနာတက်ကာ မရှင်းနိုင်လျှင် ထွက်ပြေးသော ဖြစ်စဉ်က မထူးဆန်းတော့ပါ။ ထူးဆန်းနေသည်က မကြာခဏ ငွေကြေးပြဿနာတက်နေသော ပဲလောကတွင် အလားတူဖြစ်စဉ်မျိုး မပေါ်ပေါက်အောင် အစိုးရနှင့် သက်ဆိုင်ရာအသင်းအဖွဲ့တို့က မတားဆီးနိုင်ခြင်းဖြစ်သည်။ ထို့ကြောင့် ပဲလောကတွင် ဘယ်အချိန်၌ ထွက်ပြေးသော ပဲကုန်သည်ပေါ်လာဦးမလဲဆိုသောသံသယဖြင့် လုပ်ကိုင်နေကြရသည်။ ယခုမေလဆန်းတွင် မိုးသက်ကုမ္ပဏီက ငွေကြေးပြဿနာပေါ်နေသည်။

ပြည်ပကုမ္ပဏီ ၁၆ ခု၊ ပြည်တွင်းကုမ္ပဏီ ၅ ခုသို့ ကျပ်ငွေ ၁၇ ဘီလီယံခန့်ပေးရန်ရှိပြီး ကုမ္ပဏီပိုင်ငွေနှင့် ပစ္စည်းများကို တာဝန်ရှိသူများထံအပ်နှံကာ ၀င်ရောက်ဖြေရှင်းစေခဲ့သည်။ အခြားကုမ္ပဏီများကဲ့သို့ ထွက်မပြေးဘဲ အကြွေးရရန်ရှိသူများမှာလည်း ၉၀ ရာခိုင်နှုန်းဝန်းကျင်ပြန်ရမည်ဖြစ်၍ ထိခိုက်နစ်နာမှု မကြီးမားလှသော်လည်း ဈေးကွက်ကို များစွာဂယက်ရိုက်ခဲ့သည်။

ယင်းကိစ္စဖြေရှင်း၍ မပြီးနိုင်သေးမီအချိန်တွင် အလားတူပြဿနာများကို ဖြေရှင်းပေးရန်လိုအပ်နေပြီဟု အကြောင်းကြားစာအသီးသီးမှာ ဘုရင့်နောင်ကုန်စည်ဒိုင်ရုံးခန်း၌ ရောက်ရှိနေကြောင်း ကုန်စည်ဒိုင်ဥက္ကဋ္ဌ ဦးအုန်းဆိုင်ကပြောကြားသည်။

‘‘အလောင်းအစားဆန်ဆန် အရောင်းအ၀ယ်လုပ်ရင် အမြတ်ရဖို့ထက် ဆုံးရှုံးမှုက ပိုများတယ်’’ဟု မြန်မာနိုင်ငံပဲမျိုးစုံနှင့် နှမ်းကုန်သည်အသင်း အထွေထွေအတွင်းရေးမှူး ဦးမင်းကိုဦးက ပြောကြားသည်။

လေရောင်းလေ၀ယ်စနစ်သည် ကုန်သည်၏လက်ထဲတွင် ပဲမရှိဘဲ ကြိုတင်ရောင်းချခြင်းမျိုးဖြစ်ပြီး အမှန်တကယ်ပစ္စည်းအပ်ရမည့်အချိန်တွင် ရောင်းချထားသည့်ဈေးထက် ဈေးနှုန်းများစွာများနေ၍ ယခုကဲ့သို့ ပြဿနာမျိုးဖြစ်ရသည်ဟု အထက်ပါပုဂ္ဂိုလ်ကပြောသည်။

မြန်မာနိုင်ငံ၏ ပဲဈေးကွက်သည် ၂၀၁၄ နှစ်စမှစတင်၍ အိန္ဒိယနိုင်ငံ၏ ၀ယ်လိုအားကြောင့် အရောင်းအ၀ယ်များကောင်းလာပြီး ဈေးနှုန်းများ မြင့်တက်လာသည်။ အထူးသဖြင့် အိန္ဒိယနိုင်ငံမှ ပဲထွက်နှုန်းထက်ဝက်ခန့် လျော့ကျခဲ့သဖြင့် ၂၀၁၄ ခုနှစ် မတ်လကုန်မှ စတင်၍ မတ်ပဲဈေးနှုန်း နေ့စဉ်နီးပါးဈေးတက်ခဲ့သည်။ ထိုသို့ဈေးတက်ခဲ့ခြင်းကြောင့် ကြိုပွိုင့်ဖြင့် အရောင်းအ၀ယ်များစွာ ပြုလုပ်ထားသော မိုးသက်ကုမ္ပဏီ အထိနာခဲ့ခြင်းဖြစ်သည်။

‘‘လေရောင်းလေ၀ယ်၊ ကြိုပွိုင့်သမားတွေအတွက်တော့ နမူနာယူသင့်တယ်’’ဟု ဘုရင်နောင့်ကုန်စည်ဒိုင်မှ ပဲကုန်သည်တစ်ဦးကပြောသည်။ ကြိုပွိုင့်ရောင်းဝယ်မှု မပြုလုပ်ကြရန် မြန်မာနိုင်ငံ ပဲမျိုးစုံနှင့် နှမ်းကုန်သည်အသင်းနှင့် စီးပွားကူးသန်းဝန်ကြီးဌာနတို့က စည်းမျဉ်း၊ စည်းကမ်းများ တရားဝင်ထုတ်ပြန်ထားသော်လည်း လိုက်နာမှုမရှိကြပေ။ မြန်မာနိုင်ငံတွင် ကြိုပွိုင့်ရောင်းသည့်စနစ်ကို တပ်မတော်အစိုးရလက်ထက်က စတင်ခဲ့ပြီး ၂၀၀၈ ခုနှစ်တွင် ပဲလောက၏ ကြီးငါးကြီး ငွေကြေးပြဿနာတက်ခဲ့ပြီးနောက် ယင်းစနစ်ဖြင့် မကစားကြရန် တားမြစ်ခဲ့သည်။

‘‘စည်းကမ်းချက်တွေ ထုတ်ထားပေမယ့် မလိုက်နာရင် အရေးယူမှုမရှိတော့ ဒီစနစ်က ပျောက်မသွားဘူး’’ဟု ပြည်ပသို့ ပဲမျိုးစုံတင်ပို့နေသော ပဲနှမ်းအသင်းဝင်တစ်ဦးက ၎င်း၏အမြင်ကိုပြောကြားသည်။

နိုင်ငံတော်အစိုးရက ပဲမျိုးစုံအပါအ၀င် လယ်ယာထွက်ကုန် အမျိုးပေါင်း ၆၀ ကျော်ကို ကုန်သွယ်လုပ်ငန်းခွန် ကင်းလွတ်ခွင့်ပြုထားသည်။ ထို့အတူ လိုင်စင်လျှောက်ထားရာတွင်လည်း ဖြေလျှော့မှုများစွာ ပြုလုပ်ပေးထားသည်။

သို့သော် ယခုကဲ့သို့ ငွေကြေးပြဿနာများဖြစ်မည်ကိုစိုးရိမ်၍ ပဲရောင်းဝယ်မှုဆိုင်ရာအတွက် စည်းကမ်းသတ်မှတ်ချက်အချို့ ချမှတ်ထားသည်။ ယင်းသတ်မှတ်ချက်များတွင် လေရောင်းလေ၀ယ်မပြုလုပ်ရန်၊ ရောင်းဝယ်ရာတွင် ကုန်ပစ္စည်းများ အမှန်တကယ်ရှိ၊ မရှိ၊ ရောင်းဝယ်သူ၏ ဂိုဒေါင်များတွင် စစ်ဆေးကြရန်ဆိုသောအချက်များ ပါဝင်သည်။

‘‘အရောင်းအ၀ယ်လုပ်ရင် ပစ္စည်းရှိမှ အရောင်းအ၀ယ်လုပ်လို့ရတယ်။ ဒီက ကုန်သည်တွေက ပစ္စည်းရှိ၊ မရှိမစစ်ဆေးဘူး။ ကုန်သည်တွေက အရောင်းအ၀ယ်လုပ်ရင် အချင်းချင်းပဲ စကားပြောပြီး ရောင်းလိုက်ကြတာမျိုးတွေကြောင့် ပြဿနာခဏခဏဖြစ်ရတာ’’ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ညွှန်ကြားရေးမှူး ဦသန်းအောင်ကျော်က မှတ်ချက်ပေးသည်။

ပဲအရောင်းအ၀ယ်များ ပြုလုပ်ရာတွင် ယခင်က ကုန်သည်များ၏ လက်ဝယ်တွင် ပစ္စည်းရှိမှသာ သက်ဆိုင်ရာဌာနက လိုင်စင်ထုတ်ပေးခဲ့သည်။ သို့သော် ဦးသိန်းစိန်အစိုးရသစ်လက်ထက် လွန်ခဲ့သည့်တစ်နှစ်ကျော်မှစ၍ ကုန်သွယ်မှုမူဝါဒများ ဖြေလျှော့ပေးချိန်တွင် နိုင်ငံတကာစံချိန်စံညွှန်းများနှင့် ကိုက်ညီစေရန် အဆိုပါအချက်ကို လျှော့ပေါ့ပေးခဲ့သည်။

ထို့အတူ နိုင်ငံခြားကုန်သည်များနှင့် တိုက်ရိုက်ရောင်းဝယ်ရာတွင်လည်း ယခင်က ကုန်ပစ္စည်းများ သင်္ဘောပေါ်တင်ပို့ပြီးချိန်မှသာ အဆိုပါကုန်သည်များက လွှဲပြောင်းပေးလိုက်သောငွေကို စတင်သုံးစွဲနိုင်သည်။ ယခုအချိန်တွင် အရောင်းအ၀ယ်ဖြစ်ပြီးနောက် မိမိဘဏ်အကောင့်အတွင်းသို့ ရောင်းရသောငွေကို ပစ္စည်းများ လက်ဝယ်မရှိခင်ကပင် အသုံးပြုရေးကိုလည်း ဖြေလျှော့ပေးခဲ့သည်။

‘‘ပစ္စည်းပြစရာမလိုဘဲ လိုင်စင်လည်း လျှောက်လို့ရတယ်။ ငွေလည်း ကြိုက်တဲ့အချိန် ထုတ်သုံးလုပ်လိုက်တော့ နိုင်ငံခြားကုန်သည်တွေနဲ့ပဲ ပစ္စည်းမရှိဘဲ ကြိုပွိုင့်ရောင်းတာတွေ လုပ်ကြတော့ အခုလို ငွေကြေးပြဿနာက ဖြစ်လာရတာ’’ဟု ပြည်ပသို့ ပဲတင်ပို့နေသော လုပ်ငန်းရှင်တစ်ဦးက သုံးသပ်သည်။

ပဲလောကတွင် ပြဿနာများစွာ ဖြစ်ပေါ်လေ့ရှိသော ဘုရင့်နောင်ကုန်စည်ဒိုင်၌ ပဲရောင်းဝယ်ကြရာတွင် ကုန်သည်များမှာ ကုန်စည်ဒိုင်သို့ နမူနာပဲအနည်းငယ် ယူဆောင်လာတတ်ကြပြီး အများစုက လူများသာလာရောက်၍ ရောင်းဝယ်လိုသည့် ပမာဏအတွက် ဈေးစကားပြောဆိုခြင်းဖြင့်သာ ရောင်းဝယ်ကြသည်။

‘‘ငွေလိမ်မှုတွေက လန့်နေရတယ်။ အရင်ကလို ဈေးနှုန်းတွေ ဆွဲချသွားမှာကို စိုးရတယ်။ ပဲဈေးနှုန်းက ဒီနှစ်မှ တောင်သူအသက်ရှူချောင်ရုံလေးပဲ’’ဟု ဓနုဖြူမြို့နယ် နှဲကျိုးကျေးရွာအုပ်စုမှ လယ်သမားကြီး ဦးသိန်းအောင်ကလည်း ၎င်း၏ပူပန်မှုကိုပြောသည်။

တောင်သူအများစုမှာ ပဲပေါ်ချိန်၌ ရောင်းချခဲ့သဖြင့် ယနေ့ဈေးကွက်ပေါက်ဈေးအတိုင်း အကျိုးအမြတ်မရခဲ့ပေ။ နယ်မြို့များတွင် မတ်ပဲတစ်တင်းလျှင် ကျပ် ၂၅,၀၀၀ ၀န်းကျင် ရှိနေသော်လည်း တောင်သူအများစုရောင်းချချိန်က မတ်ပဲတစ်တင်းလျှင် ကျပ် ၁၈,၀၀၀ မှ ၂၀,၀၀၀ ကြားသာ ဈေးရှိသည်။

ထို့ကြောင့် တောင်သူများမှာ အကျိုးအမြတ်ခံစားချိန်တွင် မပါဝင်ဘဲ ငွေကြေးပြဿနာကြောင့် ဈေးကွက်ပျက်ချိန်တွင် ဘေးထွက်ဆိုးကျိုးကို အရင်ဆုံးခံရလေ့ရှိသည်။

မိုးသက်ကုမ္ပဏီက ငွေကြေးပြဿနာကို ယခင်အကြိမ်များထက် စနစ်ကျပြီး လျင်မြန်စွာဖြေရှင်းနိုင်သော်လည်း လေရောင်းလေ၀ယ်၊ ကြိုပွိုင့်စနစ် ဆက်လက်ရှင်သန်နေပါက ထိုပြဿနာမျိုး တစ်နေ့မဟုတ်တစ်နေ့ ထပ်မံကြုံရဦးမည်ဖြစ်သည်။

‘‘ဒီပြဿနာမျိုးတွေမဖြစ်ဖို့က Commodity Exchange  Center တွေ ရှိဖို့လိုတယ်’’ဟု မြန်မာနိုင်ငံ ပဲမျိုးစုံနှင့် နှမ်းကုန်သည်အသင်းဝင်တစ်ဦးက သုံးသပ်သည်။

Commodity Exchange Center အကောင်အထည်ဖော်နိုင်ပါက တစ်ဦးနှင့်တစ်ဦး လွှဲပြောင်းရောင်းချရန် စာချုပ်ချုပ်ရာတွင် ဂိုဒေါင်ထဲ၌ရှိသော ပဲပမာဏ၏ ၁၀ ရာခိုင်နှုန်းကို အာမခံထားရမည်ဖြစ်သည်။

ထိုစနစ်ကျင့်သုံးလျှင် ကြိုပွိုင့်စနစ်ပျောက်ကွယ်သွားမည်ဟု ၎င်းကဆက်လက်ပြောသည်။

‘‘ပြဿနာတွေဖြစ်ရင်လည်း သက်ဆိုင်ရာဌာနတွေက ထိရောက်တဲ့အရေးယူမှုတွေ အားနည်းနေတာကြောင့် ဒါမျိုးတွေက ခဏခဏဖြစ်နေတတ်ပါတယ်’’ဟု ကုန်သည်တစ်ဦးကဆိုသည်။

ငွေကြေးပြဿနာများ ဖြစ်ပေါ်ချိန်တွင် ဘုရင့်နောင်ကုန်စည်ဒိုင်နှင့် ပဲနှမ်းအသင်းတုိ့က အမည်ပျက်စာရင်း ထုတ်ပြန်ကြေညာခြင်းနှင့် ကုန်စည်ဒိုင်နှင့် ပဲအသင်းဝင်အဖြစ်မှ ထုတ်ပယ်ခြင်းများ ပြုလုပ်လေ့ရှိသည်။ သို့သော် ပြဿနာ၏အဖြေက ထိုနည်းလမ်းဖြင့် မလုံလောက်ပေ။

7Day News Journal