ရာဇာမင်းမှန်လုံယာဉ် အရှိန်လွန် အမြန်လမ်းပေါ်မှ ရထားလမ်းပေါ် ထိုးကျတိမ်းမှောက်၍ ခရီးသည် ၁၄ ဦးသေဆုံး
ပို့စ်တင်ချိန်
- 5/13/2014 02:39:00 AM
နေပြည်တော် မေ ၁၂
ဖြစ်စဉ်မှာ ယနေ့ညနေ ၆ နာရီ၄၅ မိနစ်က နေပြည်တော်မှ ရန်ကုန်သို့ ယာဉ်မောင်း မင်းခန့်(ခ) ထွန်းခန့်စိုး(၃၄နှစ်) မဟာစည်ရိပ်သာ အနောက်ဘက်လမ်း အမှတ်(၁)ရပ်ကွက်မြင်းခြံမြို့နေသူ မောင်းနှင်သော ရာဇာမင်း ခရီးသည်တင် မှန်လုံယာဉ်သည် အရှိန်မထိန်းနိုင်ဘဲ မိုင်တိုင်အမှတ် ၁၉၇/၆ ကို စတင် တိုက်မိပြီး ဝက်လက်မီးရထားခုံးကျော် တံတားထိပ်ကို ထပ်မံတိုက်မိကာ တံတားအောက်သို့ ထိုးကျတိမ်းမှောက်ခဲ့သည်။
ယာဉ်ပေါ်၌ ယာဉ်မောင်း နှစ်ဦး၊ယာဉ်နောက်လိုက် တစ်ဦး၊ ခရီးသည်အမျိုးသား ၂၃ ဦး၊ အမျိုးသမီး ၂၀ဦး စုစုပေါင်း ၄၆ ဦးပါရှိသည့်အနက်အမျိုးသား ၁၀ ဦး၊အမျိုးသမီး လေးဦးပေါင်း ၁၄ ဦးသေဆုံးပြီး နေပြည်တော် ခုတင်(၁၀၀၀) ဆေးရုံကြီး၌အမျိုးသား ၁၅ ဦး၊ အမျိုးသမီး ၁၁ဦး၊ လယ်ဝေးမြို့နယ် ပြည်သူ့ဆေးရုံ၌အမျိုးသား နှစ်ဦး၊ အမျိုးသမီး တစ်ဦးစုစုပေါင်း အမျိုးသား ၁၇ ဦး၊ အမျိုးသမီး ၁၂ ဦး ပေါင်း ၂၉ ဦး ဒဏ်ရာအသီးသီးရရှိခဲ့ပြီး ဆေးဝါးကုသမှုခံယူလျက်ရှိသည်။
ယာဉ်မတော်တဆမှုကြောင့် ရာဇာမင်းခရီးသည်တင် မှန်လုံယာဉ်မှာလုံးဝပျက်စီးသွားခဲ့ပြီး မိုင်တိုင်တစ်ခု၊ တံတားထိပ်ပိတ်လက်ရန်း၁၀ ပေခန့်နှင့် ဘာရီယာတုံး ၁၀ တုံးတို့ ပျက်စီးခဲ့သည်။
အခင်းဖြစ်နေရာသို့ ဌာနဆိုင်ရာအသီးသီးမှ တာဝန်ရှိသူများနှင့် ဝန်ထမ်းများ၊ နေပြည်တော်တိုင်းစစ်ဌာနချုပ်နှင့် လေကြောင်းရန် ကာကွယ်ရေးတပ်မှ တပ်မတော်သားများ၊ အနီးပတ်ဝန်းကျင်ကျေးရွာများမှ အုပ်ချုပ်ရေး အဖွဲ့ဝင်များနှင့် ရွာသူရွာသားများရောက်ရှိလာပြီး သေဆုံးသူ အလောင်းများအား လမ်းမပေါ်သို့ သယ်ဆောင်၍ လူနာတင် ယာဉ်ပေါ်သို့ တင်ဆောင်ပေးခြင်း၊ ဒဏ်ရာရရှိသူများအားဝိုင်းဝန်းကူညီသယ်ဆောင်၍ လူနာတင် ယာဉ်ပေါ်သို့ တင်ဆောင်ပေးခြင်း၊သေဆုံးသူအလောင်းများနှင့် ဒဏ်ရာရရှိသူများအား အမြန်လမ်း ရဲတပ်ဖွဲ့ ဝင်များက တပ်ဖွဲ့ပိုင်ယာဉ်များဖြင့်နေပြည်တော် ခုတင် (၁၀၀၀) ဆေးရုံနှင့် လယ်ဝေးပြည်သူ့ ဆေးရုံတို့သို့ ကူညီပို့ဆောင်ပေးခြင်းများ ဆောင်ရွက်ခဲ့သည်။
ရာဇာမင်းခရီးသည်တင် မှန်လုံယာဉ်မှ ယာဉ်မောင်း မင်းခန့်(ခ)ထွန်းခန့်စိုးမှာ ဒဏ်ရာရရှိသဖြင့် နေပြည်တော် ခုတင် (၁၀၀၀)ဆေးရုံကြီးတွင် တက်ရောက် ကုသမှုခံယူလျက်ရှိသည်။ အဆိုပါယာဉ်တိမ်း မှောက်မှုနှင့် ပတ်သက်၍ ပလွေးအမြန်လမ်းရဲစခန်းက ယာဉ်(ပ) ၁၂/၂၀၁၄၊ ပြစ်မှုပုဒ်မ ၃၀၄-က/၃၃၈/ ၃၃၇/၂၇၉ အရ အမှုဖွင့်အရေးယူထားရှိကြောင်း အမြန်လမ်းရဲတပ်ဖွဲ့မှူးရုံးမှ သတင်းရရှိသည်။
MOI Webportal Myanmar
