တရုတ်လူမျိုး အမျိုးသားများနှင့် အတူလိုက်ပါလာသည့် မြန်မာမိန်းကလေးတစ်ဦးအား အရေးယူ၍မရဟုဆို

ပို့စ်တင်ချိန် - 5/15/2014 04:56:00 AM

သတင်း + ဓာတ်ပုံ = ကိုတိုးကြီး
မုံရွာ၊ မေ ၁၅
စစ်ကိုင်းတိုင်း၊ မုံရွာမြို့၊ ချင်းတွင်းမြစ်ကူးတံတားထိပ် တန်ပိုစစ်ဆေးရေးဂိတ်နေရာတွင် မေလ ၁၄ ရက်နေ့ ည ၈ နာရီက တရုတ်လူမျိုး အမျိုးသား(၇)ဦးနှင့် အတူလိုက်ပါလာခဲ့သည့် နိုင်ငံသား စီစစ်ရေးကဒ်ပြားမရှိ သည့် မြန်မာအမျိုးသမီးလေးတစ်ဦးအား အရေးယူ၍မရနိုင်ကြောင်း မုံရွာမြို့နယ် လ၀က ဒုတိယ လ၀ကမှူး ဦးသိန်းမောင် ဆိုသူက ပြောပြသည်။
“ ကောင်မလေးက အသက်(၁၈)နှစ်တောင် မပြည့်သေးဘူးဆိုတော့ ကလေးသူငယ် ဥပဒေအရဘဲဖြစ်မှာပါ ..။ ကျွန်တော်တို့အနေနဲ့ အရေးယူလို့မဖြစ်ပါဘူး ..” ဟု ဒုတိယ လ၀ကမှူး ဦးသိန်းမောင် ဆိုသူမှ မုံရွာမြို့မ ရဲစခန်းမှူးရုံးရှေ့တွင် ထိုကဲသို့ ပြောပြခဲ့ခြင်းဖြစ်သည်။
အဆိုပါ မြန်မာအမျိုးသမီးလေးသည် မော်လိုက်မြို့နယ်၊ ဖာတင်းကျေးရွာနေ (အဖ) ဦးမျိုး၏ သမီး မမျိုး ကြည်ကြည် အသက်(၁၇)နှစ်၊ ဆိုသူဖြစ်သည်။ သူမသည် ကိုးကန့် နဂါးသတ္တုစမ်းသပ်တူးဖော်ရေး ကုမ္မဏီ မိုင်းဆိုဒ်တွင် စာရေးလုပ်ကိုင်ကြောင်း သိရသည်။
“ မမျိုးကြည်ကြည်က ပညာအရည်အချင်း နှစ်တန်း၊ သုံးတန်းဘဲဖြစ်ပါတယ်..။ သူ့အမျိုးတွေနဲ့ တွေ့ချင်တယ် လို့ပြောတယ်..။ နောက်ပြီး မန္တလေးကို မရောက်ဘူးလို့အလည်လိုက်တာပါ..” ဟု ကိုးကန့် ရွှေနဂါး သတ္တု စမ်းသပ်တူးဖော်ရေးကုမ္မဏီ၏ တရုတ်စကားပြန် ကျန်တာချန်း(ခ) ကိုကျော်ထွေး မှ ပြောပြသည်။
မြန်မာနိုင်ငံ လူကုန်ကူးမှုတားဆီးကာကွယ်နှိမ်းနင်းရေးအဖွဲ့၏ မှတ်တမ်းများအရ လူကုန်ကူးခြင်းခံရသည့် ဥင်္ီးတည်ရာနိုင်ငံများတွင် တရုတ်နိုင်ငံ(၈၀)ရာခိုင်နှုန်း၊ ထိုင်းနိုင်ငံ (၁၀)ရာခိုင်နှုန်း၊ မလေးရှာားနိုင်ငံ (၆)ရာခိုင်နှုန်း၊နှင့် ပြည်တွင်း(၄)ရာခိုင်နှုန်းရှိကြောင်း သိရသည်။
လူကုန်ကူးခြင်း အများဆုံးခံရသည့် ပုံးစံများအား မြန်မာနိုင်ငံ လူကုန်ကူးမှုတားဆီး ကာကွယ်နှိမ်းနင်း ရေးအဖွဲ့မှ စစ်တမ်းကောက်၍ မှတ်တမ်းတင်ရာတွင် အဓမ္မထိမ်းမြားလက်ထပ်ခြင်း (၆၉ ဒသမ ၇ ) ရာခိုင် နှုန်း၊ ပြည့်တန်ဆာ (၁၃ ဒသမ ၆) ရာခိုင်နှုန်း၊ အဓမ္မစေခိုင်းခြင်း (၁၀ ဒသမ ၀ ) ရာခိုင်နှုန်း၊ ကလေးသူငယ် (၄ ဒသမ ၈ ) ရာခိုင်နှုန်း၊ အဓမ္မတောင်းရမ်းစေခိုင်းခြင်း (၁ ဒသမ ၄ ) ရာခိုင်နှုန်း၊ အဓမ္မမွေးစားခြင်း (၀ ဒသမ ၃) ရာခိုင်နှုန်း၊ လိင်မှုဆိုင်ရာ ခေါင်းပုံဖြတ်ခံခြင်း(၀ ဒသမ ၂) ရာခိုင်နှုန်း၊တို့ဖြစ်ကြောင်း လေ့လာသိရှိ ရသည်။
အဆိုပါ အသက်(၁၈)မပြည့်သေးသည့် နိုင်ငံသားမှတ်ပုံတင်မရှိသော မြန်မာအမျိုးသမီးလေးတစ်ဦးသည် စစ်ကိုင်းတိုင်း၊ ကလေးခရိုင်၊ ကလေးဝမြို့နယ်၊ ပလူစ၀ကျေးရွာ ၊ ပလူစ၀ချောင်းဆုံအနီးရှိ ကျောက်မီးသွေး စမ်းသပ်တူးဖော်လျက်ရှိသော တရုတ်နိုင်ငံသား(၂၀)ဦးအား မေလ ၁၄ ရက်နေ့တွင် နောက်ဆုံးထား၍ နေရပ်သို့ပြန်လည်ထွက်ခွားသွားရန် ကလေးဝမြို့နယ် စီမံခန့်ခွဲမှုကော်မတီအဖွဲ့မှ အကြောင်းကြားချက်များ အရ နေရပ်သို့ပြန်လည်ထွက်ခွာလာသည့် တရုတ်နိုင်ငံသားများနှင့် အတူလိုက်ပါလာခဲ့ခြင်းဖြစ်သည်။
“ ဘာဘဲဖြစ်ဖြစ် တရုတ်နိုင်ငံသားတွေရဲ့အတူလိုက်ပါလာတယ်ဆိုတော့ စီစစ်မေးမြန်းသင့်ပါတယ်..။ မြန်မာ မိန်းကလေးတစ်ယောက်အနေနဲ့ လူမျိုးခြားတွေကြားမှာ အခုလိုလိုက်ပါလာတာဟာ အလွန်အန္တရာယ်ကြီး ပါတယ်..နှမချင်းစာနာထောက်ထားစွာနဲ့ အခြေအနေမှန်သိရအောင် သူမရဲ့မိဘတွေထံဆက်သွယ်ပြီးမှ ခရီး ဆက်ခွင့်ပြုသင့်တာပေါ့..” ဟု လူကုန်ကူးမှု ကိစ္စရပ်များအား မျက်ချေမပြတ်လေ့လာစောင့်ကြည့်နေသူ မုံရွာ မြို့ခံ မြို့မိ၊မြို့ဖ တစ်ဦးက ပြောပြသည်။

ကိုတိုး ချင်းတွင်း