၂၀၀၈ ဖွဲ့စည်းပုံပြင်ဆင်ရေး ကယားပြည်နယ် အဖွဲ့ပေါင်းစုံ ဆွေးနွေး

ပို့စ်တင်ချိန် - 5/19/2014 10:35:00 PM

၂၀၀၈ အခြေခံဖွဲ့စည်းပုံ ဥပဒေကို ပြင်ဆင်မှသာ ဖက်ဒရယ်ပြည်ထောင်စုစနစ်ကို တည်ထောင်နိုင်မယ့်အကြောင်း ကယားပြည်နယ်အဖွဲ့အစည်းပေါင်းစုံက ကိုယ်စားလှယ်တွေ ဆွေးနွေးခဲ့ကြပါတယ်။

ကယားပြည်နယ်ထဲမှာရှိတဲ့ လက်နက်ကိုင်အဖွဲ့အစည်း၊ နိုင်ငံရေး ပါတီများ၊ လူမှုအခြေပြု အဖွဲ့အစည်းက ကိုယ်စားလှယ်တွေဟာ မေ ၁၆ ရက်နေ့က ကယားပြည်နယ် လွိုင်ကော်မြို့နယ်မှာ တွေ့ဆုံဆွေးနွေး ခဲ့တာပါ။

၂၀၀၈ ဖွဲ့စည်းပုံအခြေခံဥပဒေကို အစ၊ အလယ်၊ အဆုံး ဒါမှမဟုတ် အသစ်ပြန်လည်ပြင် ဆင်ရေးဆွဲခြင်း မပြုနိုင်သရွေ့ ငြိမ်းချမ်းရေးရမှာ မဟုတ်ဘူးလို့ ကယန်းပြည်သစ်ပါတီ အထွေထွေအတွင်းရေးမှူးး ဗိုလ်မှူးစောလွင်က ကယားပြည်နယ်ငြိမ်းချမ်းရေးနဲ့ ပတ်သက်တဲ့ ဆွေးနွေးပွဲမှာ ပြောကြားခဲ့ပါတယ်။

အထူးသဖြင့် ၂၀၀၈ ဥပဒေအရ ဖွဲ့စည်းထားတဲ့ ပြည်ထောင်စုဟာ တိုင်းသူပြည်သားတို့ လိုလားနေတဲ့ ဖက်ဒရယ်ပြည်ထောင်စုစစ်စစ်မူမျိုး မဟုတ်လို့ ပြင်ဆင်သင့်ကြောင်း ဗိုလ်မှူးစောလွင်က ဒီဗွီဘီကို ပြောပါတယ်။

ဒါ့အပြင် ၂၀၀၈ အခြေခံဥပဒေအရ နိုင်ငံတော်ရဲ့ အမျိုးသားနိုင်ငံရေးမှာ တပ်မတော်က ခေါင်းဆောင်တဲ့ အခန်းကဏ္ဍမှာ ပါဝင်ဖို့ ပြဋ္ဌာန်းထားတာ၊ လွှတ်တော်အဆင့်ဆင့်မှာ တပ်မတော်သားကိုယ်စားလှယ်တွေ လေးပုံတပုံပါဝင်တာတွေဟာ စစ်အာဏာရှင်စနစ်ကို သက်စိုးရှည်စေတဲ့အတွက် ပြင်ဆင်ဖို့ လိုအပ်ကြောင်း သူက ဆက်ပြောပါတယ်။

ဒါပေမယ့် ပြည်သူကလိုလားတဲ့ ၂၀၀၈ ဖွဲ့စည်းပုံပြင်ဆင်ရေးကို အစိုးရနဲ့ တပ်မတော်က မလိုလားဘူးဆိုတာကို မြင်တွေ့နေရတဲ့အတွက် ပြည်သူလူထုအနေနဲ့ ပိုပြီးတော့ သတိဝိရိယရှိဖို့၊ ပိုပြီးတော့ စည်းလုံးညီညွတ်မှုရှိဖို့နဲ့ သတ္တိရှိကြဖို့ ဗိုလ်မှူးစောလွင်က တိုက်တွန်းပြောကြား သွားပါတယ်။

အဲဒီဆွေးနွေးပွဲမှာ ကရင်နီအမျိုးသားတိုးတက်ရေးပါတီ (ကေအန်ပီပီ) ဒုဥက္ကဋ္ဌ ခူဦးရယ်ကလည်း အစိုးရနဲ့ တိုင်းရင်းသားလက်နက်ကိုင်အဖွဲ့တွေ တနိုင်ငံလုံးအပစ်အခတ်ရပ်စဲရေး ဆောင်ရွက်မှုအခြေအနေ၊ ငြိမ်းချမ်းရေးဖော်ဆောင်မှု လုပ်ငန်းစဉ်တွေအကြောင်း ဦးဆောင်ဆွေးနွေးခဲ့ပြီး လက်နက်ကိုင်အဖွဲ့များနဲ့ အပစ်အခတ်ရပ် လက်မှတ်ရေးထိုးခဲ့တဲ့ ၃ နှစ်တာကာလအတွင်း တိုက်ပွဲတွေဖြစ်နေကြောင်း သုံးသပ်ပြောဆိုသွားပါတယ်။

ဒါ့အပြင် အနာဂတ်နိုင်ငံရေးမှာ ၈ ပြည်နယ်ဖြစ်စေ၊ ၁၄ ပြည်နယ်ဖြစ်စေ အငြင်းပွားစရာမရှိဘဲ ပင်လုံစိတ်ဓာတ် အခြေခံတဲ့ ပင်လုံညီလာခံခေါ်ယူပြီးမှ ဆုံးဖြတ်ဖို့ဖြစ်ကြောင်း၊ ကယားပြည်နယ်ဆိုတဲ့ အမည်ကိုတော့ မူလ ကရင်နီပြည်အဖြစ် ပြန်လည်ခေါ်ဆိုရေးနဲ့ အင်္ဂလိပ်ခေတ်ကြောင့် အခြားပြည်နယ်ထဲမှာ ပါဝင်သွားတဲ့ ကယန်းဒေ သတွေပါ ပေါင်းစပ်ပါဝင်ရေးတွေလည်း ဆွေးနွေးခဲ့ပါတယ်။

ဒီဆွေးနွေးပွဲမှာ ဆုံးဖြတ်ချက်၊ ထုတ်ပြန်ချက် တစုံတရာ မချမှတ်ခဲ့ပေမယ့်လည်း ပြည်နယ်ထဲမှာရှိတဲ့ အဖွဲ့အစည်းပေါင်းစုံတို့ရဲ့ နိုင်ငံရေး၊ ငြိမ်းချမ်းရေးနဲ့ ပတ်သက်ပြီး တူညီတဲ့ သဘောထားတွေ ဖော်ထုတ်ခဲ့တယ်လို့ ဆွေးနွေးပွဲဖြစ်မြောက်ရေးအဖွဲ့ဝင်တဦးဖြစ်သူ ခွန်းဘီတူးက ပြောပါတယ်။

ဒေသတွင်းဖြစ်ပေါ်နေတဲ့ နိုင်ငံရေးနဲ့ငြိမ်းချမ်းရေးပေါ်သုံးသပ်ခြင်း လို့ အမည်ပေးထားတဲ့ ဒီဆွေးနွေးပွဲကို ကရင်နီလူငယ်များသမဂ္ဂက ကမကထပြု ကျင်းပခဲ့ပြီး ကယားပြည်နယ်ထဲမှာရှိတဲ့ နိုင်ငံရေးပါတီ ၆ ဖွဲ့၊ ကေအန်ပီပီ၊ ကယားပြည်လူမျိုးပေါင်းစုံလွတ်မြောက်ရေးပါတီ၊ ကရင်နီပြည်ငြိမ်းချမ်းရေး နဲ့ ဖွံ့ဖြိုးတိုးတက်ရေးပါတီ၊ ကယန်းပြည်သစ်ပါတီ စတဲ့ လက်နက်ကိုင်အဖွဲ့ကိုယ်စား လှယ်တွေအပြင် အမျိုးသမီးအဖွဲ့၊ လူငယ်အဖွဲ့နဲ့ လူမှုအခြေပြု အဖွဲ့အစည်း ကိုယ်စားလှယ်တွေ ၁၀၀ ကျော် တက်ရောက်ခဲ့ပါတယ်။

အပြည့်အစုံ အသံဖိုင်နားဆင်ရန်



DVB Burmese