စတုတ္ထအကြိမ် နျူကလီးယား စမ်းသပ်ဖောက်ခွဲရန် မြောက်ကိုရီးယား ပြင်ဆင်လျက်ရှိ

ပို့စ်တင်ချိန် - 4/24/2014 06:52:00 PM

နျူကလီးယား စမ်းသပ်ဖောက်ခွဲမှု သုံးကြိမ်တိုင် ပြုလုပ်ခဲ့ဖူးသော မြောက်ကိုရီးယားသည် နောက်ထပ် နျူကလီးယား စမ်းသပ်ဖောက်ခွဲရန် ပြင်ဆင်လျက် ရှိကြောင်း တောင်ကိုရီးယား ကာကွယ်ရေး ဝန်ကြီးဌာန၏ ပြောကြားချက်ကို BBC သတင်းတွင် ဖော်ပြထားသည်။

မြောက်ကိုရီးယား နျူကလီးယား စမ်းသပ်ဖောက်ခွဲရေး နေရာတွင် လှုပ်ရှားမှုများ တိုး၍ ပြုလုပ်နေသည်ကို တွေ့ရခြင်းကြောင့် မြောက်ကိုရီးယား အနေနှင့် စတုတ္ထအကြိမ်မြောက် နျူကလီးယား စမ်းသပ်ဖောက်ခွဲရန် ပြင်ဆင်နေခြင်း ဖြစ်ကြောင်း တောင်ကိုရီးယား ကာကွယ်ရေး ဝန်ကြီးဌာန ပြောခွင့်ရ ပုဂ္ဂိုလ် ကင်မင်ဆုတ်က ပြောကြားသည်။

မြောက်ကိုရီးယား နျူကလီးယား စမ်းသပ်ဖောက်ခွဲရန် ပြင်ဆင်နေခြင်းသည် အမေရိကန်သမ္မတ အိုဘားမား တောင်ကိုရီးယားသို့ အလည်အပတ် မလာမီ ရက်ပိုင်းအလိုတွင် ပြုလုပ်နေခြင်းလည်း ဖြစ်သည်။
“မြောက်ကိုရီးယား နျူကလီးယား စမ်းသပ်ဖောက်ခွဲရေး Punggye-ri မှာ လှုပ်ရှားမှုတွေ တိုးလုပ်နေတာကို ကျွန်တော်တို့ စစ်တပ်က ထောက်လှမ်း သိရှိရပါတယ်” ဟု တောင်ကိုရီးယား ကာကွယ်ရေး ဝန်ကြီးဌာန ပြောခွင့်ရ ပုဂ္ဂိုလ် ကင်မင်ဆုတ်က ပြောကြားသည်။

မြောက်ကိုရီးယားသည် ၂၀၀၆၊ ၂၀၀၉ နှင့်၂၀၁၃ ခုနှစ်များက နျူကလီးယား စမ်းသပ်ဖောက်ခွဲမှုများ ပြုလုပ်ခဲ့ဖူးပြီး ယင်းစမ်းသပ် ဖောက်ခွဲမှုများကို မြောက်ကိုရီးယား အရှေ့မြောက်အရပ်တွင် ရှိသော အထက်ပါ Punggye-ri နျူကလီးယား စမ်းသပ်ဖောက်ခွဲရေး ဧရိယာတွင် ပြုလုပ်ခဲ့ခြင်း ဖြစ်သည်။

မြောက်ကိုရီးယား နျူကလီးယား စမ်းသပ်ဖောက်ခွဲမည့် သတင်းနှင့် ပတ်သက်၍ တောင်ကိုရီးယား ကာကွယ်ရေး ဝန်ကြီးဌာန ပြောခွင့်ရပုဂ္ဂိုလ်က အသေးစိတ် ပြောကြားရန် ငြင်းဆိုခဲ့ပြီး ယခု စမ်းသပ်ဖောက်ခွဲမှုသည် အမေရိကန်သမ္မတ အိုဘားမား လာရောက် လည်ပတ်မည့် သောကြာနေ့ မတိုင်မီ တင်းမာမှု မြှင့်တင်ရန် ရည်ရွယ်သော လှည့်ဖြားသည့် နည်းဗျူဟာသာ ဖြစ်ကြောင်း ၎င်းက ပြောကြားသည်။

အမေရိကန်သမ္မတ အိုဘားမားသည် အာရှ အလည်အပတ် ခရီးစဉ် တစ်စိတ်တစ်ပိုင်းအဖြစ် တောင်ကိုရီးယား နိုင်ငံသို့ လာရောက်မည် ဖြစ်ပြီး၊ ယင်းခရီးစဉ်နှင့် တိုက်ဆိုင်၍ မြောက်ကိုရီးယားက ရန်စမှုများ ပြုလုပ်ဖွယ် ရှိသည်ဟု ခန့်မှန်းချက်များလည်း ထွက်ပေါ်လျက် ရှိသည်။

အမေရိကန်သမ္မတ အိုဘားမား တောင်ကိုရီးယားသို့ အလည်အပတ် လာရောက်ခြင်းကို စစ်ရေးတင်းမာမှု ဖြစ်စေမည့် အန္တရာယ်ရှိ လုပ်ရပ်၊ ကိုရီးယား ကျွန်းဆွယ်တွင် နျူကလီးယား လက်နက်ပြိုင်ပွဲ ဖြစ်စေမည့် တိမ်ညိုတိမ်မည်းများ သယ်ဆောင်လာသော ခရီးစဉ်ဟု မြောက်ကိုရီးယားက ပြစ်တင်ခဲ့သည်။

မြောက်ကိုရီးယားသည် လွန်ခဲ့သောလက တာလတ်ပစ် တိုက်ချင်းပစ် ဒုံးကျည်များ စမ်းသပ်ပစ်လွှတ်ခဲ့ရာ ကုလသမဂ္ဂ လုံခြုံရေးကောင်စီ၏ ပြစ်တင်ခြင်း ခံခဲ့ရခြင်းကို တုံ့ပြန် ပြောကြားရာတွင် နျူကလီးယား စမ်းသပ်ဖောက်ခွဲမှု ပုံစံအသစ်များကို ထည့်သွင်း စဉ်းစားထားကြောင်း မြောက်ကိုရီးယားက သတိပေး ပြောကြားခဲ့သည်။

Voice