ကချင်စစ်ဘေး ဒုက္ခသည်တွေရေရှားပါးမှု ကြုံတွေ့

ပို့စ်တင်ချိန် - 4/19/2014 10:43:00 AM

ရာသီဥတု ပူပြင်းလွန်းတဲ့အတွက် ကချင်ပြည်နယ် အတွင်းက စစ်ဘေးဒုက္ခသည် စခန်းတွေမှာ ရေရရှိမှု အခက်အခဲနဲ့ ကြုံတွေ့နေရတယ်လို့ ဒုက္ခသည်စခန်း မှာ နေထိုင်သူတွေက ပြောပါတယ်။

အထူးသဖြင့် သောက်သုံးရေသန့် ရဖို့အတွက် မနက်စောစော ၅ နာရီလောက်ထပြီး ကယ်ဆယ်ရေး စခန်းတွေမှာ တူးဖော်ထားတဲ့ ရေတွင်း၊ ရေကန်တွေ ကနေ အလှည့်ကျတန်းစီ ခပ်ယူသုံးစွဲနေရတယ်လို့ ဝိုင်းမော်မြို့နယ် မိုင်းနားကျေးရွာမှာရှိတဲ့ စိန့်ဂျိုးဇက် ကက်သလစ်အသင်းတော် ကယ်ဆယ်ရေးစခန်း မှာနေထိုင်နေတဲ့ ဒေါ်လုယမ်ကဒ် ကပြောပါတယ်။

" မိုးတွင်းဆိုတော့ အဆင်ပြေပါတယ်၊ အခုနွေရာသီ ဆိုတော့ သိပ်တော့ အဆင်မပြေဘူး၊ အခုချိန်က ခပ်ယူတာလည်း နည်းနည်းတော့ မပြီးသေးဘူး၊ မနက် အစောကြီးဆိုတော့ သူများထက်ပို စောပြီးမှ ထတဲ့သူလည်းရှိတယ်၊ အယောက် ၂၀၊ ၃၀ အဲ့လိုမျိုး တန်းစီ ပြီးတော့ ခပ်ကြတယ်၊ တစ်လှည့်စီ ခပ်ကြတယ်"

ဒါ့အပြင် ကချင်ပြည်နယ် ကန်ပိုက်တီမြို့နယ်ခွဲထဲမှာရှိတဲ့ ဒုက္ခသည်စခန်းတွေနဲ့ အခြားဒုက္ခသည် စခန်းတွေမှာ လည်း ရေရှားပါးတာကြောင့် ရေးတွင်းအသစ်တွေ တူးဖော်နေရတယ်လို့ သိရပါတယ်။

မနှစ်က အခုလိုနွေရာသီ ရေရှားပါးချိန်တုန်းကတော့ မြန်မာနိုင်ငံ ကြက်ခြေနီအသင်းနဲ့ ဒိန်းမတ်ကြက် ခြေနီအသင်းတို့ ပူးပေါင်းပြီး ရေသန့်စက်တွေနဲ့ စစ်ဘေးကယ်ဆယ်ရေးစခန်းတွေကို လာရောက်လှူ ဒါန်းခဲ့ပေမယ့်ဒီနှစ်မှာတော့ ဘယ် အဖွဲ့အစည်းကမှလာရောက် လှူဒါန်းတာမရှိသေးဘူးလို့သိရပါတယ်။

RFA Burmese