အလုံလမ်း၌ နှစ်ထပ်တိုက်ဟောင်း ပြိုကျရာမှ နှစ်ဦးသေ၊ တစ်ဦးဒဏ်ရာရ
ပို့စ်တင်ချိန်
- 4/27/2014 01:44:00 PM
ရန်ကုန်၊ ဧပြီ ၂၆
အလုံမြို့နယ် ဌာနာရပ်ကွက် အလုံလမ်းနှင့် ဧရာဝတီလမ်းထောင့်ရှိ ဖြိုဖျက်နေသော နှစ်ထပ်တိုက်တစ်လုံးမှာ ဧပြီလ ၂၆ ရက် ညနေ ၄ နာရီခန့်က ပြိုကျရာမှ အမျိုးသားနှစ်ဦး သေဆုံးပြီး တစ်ဦးမှာ ဒဏ်ရာပြင်းထန်စွာ ရရှိခဲ့ကြောင်း ရန်ကုန်တိုင်းဒေသကြီး မီးသတ်ဦးစီးဌာနထံမှ စုံစမ်းသိရှိရသည်။
အဆိုပါ ပြိုကျခဲ့သော နှစ်ထပ်တိုက် အဆောက်အအုံအဟောင်းကို ကန်ထရိုက် ငှားရမ်းပြီး အလုပ်သမား ငါးဦးဖြင့် ဖြိုဖျက်ရာမှ တိုက်အိမ် အရှေ့ဘက်ခြမ်းရှိ ပထမထပ်မှ ၁၅ လက်မခန့် ထုထည်ရှိသော အုတ်နံရံအချပ်လိုက် ပြိုကျစဉ် ယင်းအထပ်၌ တိုက်ဖြိုနေသော အလုပ်သမား သုံးဦးမှာ အုတ်နံရံများနှင့်အတူ ပြုတ်ကျခဲ့ပြီး နှစ်ဦးမှာ အုတ်နံရံများ ပိကာ သေဆုံးခဲ့ကြောင်း၊ အသက် ၂၀ အရွယ်ရှိ ကိုကျော်ဇင်ထွေး (ခ) အောင်လေးမှာ ဖြိုဖျက်နေသော တိုက်အိမ်အတွင်းသို့ လွင့်စင်ကာ ဒဏ်ရာ အပြင်းအထန် ရရှိခဲ့ကြောင်း ယင်းလမ်းသွယ်အတွင်း နေထိုင်သူ အသက် ၅၀ ဝန်းကျင်ခန့်ရှိ အမျိုးသားတစ်ဦးက ရှင်းပြသည်။
“ဝုန်းခနဲ အသံကြားလို့ ထွက်ကြည့်တော့ ကောင်လေးတစ်ယောက်က ပြိုထားတဲ့ တိုက်အထဲမှာ ဒဏ်ရာတွေနဲ့ ပက်လက်လန်နေတာ။ အလုပ်သမားခေါင်းဆောင် အမျိုးသမီးက သူ့ကို တက္ကစီနဲ့ ဆေးရုံခေါ်သွားတယ်။ မီးသတ်တွေ ရောက်လာပြီး ပြိုကျတဲ့ အုတ်နံရံတွေကို လှန်ရှာတော့ အလုပ်သမားနှစ်ယောက် အုတ်ခဲပုံတွေကြားမှာ သေနေပြီ” ဟု ၎င်းက ရှင်းပြသည်။
ပြိုကျခဲ့သော နှစ်ထပ်တိုက် အဆောက်အအုံ မြေနေရာတွင် ရှစ်ထပ်တိုက် ဆောက်လုပ်ရန် တစ်ကောင်ဘွား ဆောက်လုပ်ရေးကုမ္ပဏီကို အပ်နှံထားပြီး ဇန်နဝါရီမှ စတင်ကာ ဖြိုဖျက်ခြင်း လုပ်ငန်းကို ဆောင်ရွက်ခဲ့ရာ ပထမထပ်ရှိ ရှေ့ဘက်မျက်နှာစာနှင့် မြေညီထပ်သာ ကျန်ရှိချိန်တွင် ပြိုကျခဲ့ခြင်း ဖြစ်ကြောင်း အလုံမြို့နယ် ပြည်သူ့လွှတ်တော် ကိုယ်စားလှယ် ဦးခိုင်မောင်ရည်က ပြောကြားသည်။
“တိုက်ဖျက်တာ နည်းစနစ် မမှန်တာရယ်၊ အန္တရာယ်ရှိတဲ့ လုပ်ငန်းခွင်မှာ အလုပ်သမားတွေအတွက် အသက်အန္တရာယ် ကာကွယ်ပေးနိုင်တဲ့ ပစ္စည်းမျိုးတွေ အသုံးမပြုတာကြောင့် ယခုလို အသက်ဆုံးရှုံးမှုတွေ ဖြစ်ရတာ” ဟု အလုံမြို့နယ် ပြည်သူ့လွှတ်တော် ကိုယ်စားလှယ် ဦးခိုင်မောင်ရည်က ပြောဆိုသည်။
ယင်းနှစ်ထပ်တိုက် အဆောက်အအုံ ပြိုကျမှုကို မြို့နယ်မီးသတ်တပ်ဖွဲ့နှင့် ရန်ကုန်တိုင်းဒေသကြီး မီးသတ်တပ်ဖွဲ့တို့မှ ကယ်ဆယ်ရေး လုပ်ငန်းများ ဆောင်ရွက်ခဲ့ပြီး သေဆုံးခဲ့သော အသက် ၂၆ နှစ် အရွယ် ကိုချစ်စန်းမောင်နှင့် အသက် ၁၇ နှစ်အရွယ်ရှိ ကိုအောင်နိုင်ဖြိုးတို့၏ ရုပ်အလောင်းကို ရန်ကုန်ပြည်သူ့ဆေးရုံကြီးသို့ ပို့အပ်ထားကြောင်း၊ တိုက်ပြိုကျကာ သေဆုံးမှုနှင့် ပတ်သက်၍ သေမှုသေခင်း ဖွင့်ကာ စုံစမ်းစစ်ဆေး ဆောင်ရွက်လျက်ရှိကြောင်း အလုံမြို့မ ရဲစခန်းထံမှ စုံစမ်းသိရှိရသည်။
The Voice Weekly
