ကားဆီထည့်ရန် အောက်တိန်းပီပါတွန်းချရာမှ ရွှေညောင်တွင် မီးလောင်မှုဖြစ်

ပို့စ်တင်ချိန် - 4/22/2014 09:08:00 PM

ဂျွန်ချစ်ငြိမ်း

ရွှေညောင်၊ မဇ္ဈိမ။ ။ ရှမ်းပြည်နယ်တောင်ပိုင်း၊ ရွှေညောင်မြို့တွင် ဧပြီ ၂၂ ရက် နေ့လည် ၁၂နာရီ ၅၃ မိနစ်က ကားဆီထည့်ရန် အောက်တိန်းပီပါကို တွန်းချရာမှ မီးလောင်ကျွမ်းမှု တစ်ခု ဖြစ်ပွားခဲ့သည် ဟု တောင်ကြီးခရိုင် မီးသတ်ဦးစီးဌာနက ထုတ်ပြန်သည်။

မီးလောင်မှုကြောင့် အောက်တိန်းဆီ ၂၀ဂါလံ၊ တန်ဖိုးကျပ် ၈၀,၀၀၀နှင့် အိမ်ဘေးကာ ပျဉ်ပြား၊ တန်ဖိုးကျပ် ၂၀,၀၀၀ စုစုပေါင်း တစ်သိန်းခန့် ဆုံးရှုံးခဲ့ပြီး လူထိခိုက်မှု မရှိဟု တောင်ကြီးခရိုင် မီးသတ်က ထုတ်ပြန်ထားသည်။

"မီးလောင်တဲ့နေရာက မြို့လည်ခေါင်မှာဆီတွေ လှောင်ထားတာတွေရှိတယ် ၊ တစ်မြို့လုံးကို အုတ်အုတ်သဲသဲ ဖြစ်သွားတယ် လူသာမနိုင်ရင် မလွယ်ဘူး"ဟု ရွှေညောင်မြို့ ဒေသခံတစ်ဦးက မဇ္ဈိမကို ပြောသည်။

မီးလောင်ကျွမ်းမှုမှာ တောင်ကြီးမြို့နယ် ရွှေညောင်မြို့ သုခချမ်းသာရပ်ကွက်ရှိ သွပ်မိုး၊ ပျဉ်ထောင်အိမ်တစ်လုံးတွင် အိမ်သုံးကားဆီထည့်ရန် အောက်တိန်းပေပါကို ကားပေါ်မှ တွန်းချလိုက်ရာ မီးပွားပွင့်၍ မီးစတင်လောင်ကျွမ်းခဲ့ခြင်း ဖြစ်သည်ဟု တောင်ကြီးခရိုင် မီးသတ်ဦးစီးမှူး ဦးအောင်သူက အတည်ပြုပြောသည်။

မီးလောင်ကျွမ်းသည့် နေရာသို့ ရွှေညောင်မီးသတ်စခန်းမှ မီးသတ်ယာဉ် ၂စီး၊ တောင်ကြီး မီးသတ်စခန်းမှ ၂စီး၊ အေးသာယာ မီးသတ်စခန်း မှ ၁စီး ၊ ညောင်ရွှေ မီးသတ်စခန်း မှ ၁စီး နှင့် မြန်မာ့ရေနံမှ ဘောက်ဆာ ၂စီးတို့ လာရောက်ငြိမ်းသတ်ရာ ၁၂နာရီ ၅၈ မိနစ်တွင် မီးထိန်းနိုင်ခဲ့ပြီး နေ့လည် ၁ နာရီတွင် မီးငြိမ်းသတ်နိုင်ခဲ့သည်။

မီးလောင်ကျွမ်းမှုကြောင့် ဦးအောင်အောင်ကို ရွှေညောင်မြို့မ ရဲစခန်းမှ ပြစ်မှုအမှတ် (ပ)၂၈/ ၂၀၁၄ ၊ ပုဒ်မ (၂၈၅) အရ အမှုဖွင့်အရေးယူထားသည်။

Mizzima Burmese