ကချင်ပြည်နယ်က စစ်ပြေး ကလေးများ မြေမြှုပ်မိုင်းဒဏ် သင့်နိုင်

ပို့စ်တင်ချိန် - 4/22/2014 06:08:00 PM

ကချင်ပြည်နယ်တောင်ပိုင်း မံဝိန်းကြီးဒေသမှာ မြန်မာစစ်တပ်နဲ့ ကချင်လွတ်မြောက်ရေး တပ်မတော် (ကေအိုင်အေ) တို့အကြား ဖြစ်ပွားခဲ့တဲ့ တိုက်ပွဲတွေကြောင့် ကလေးသူငယ် ၁၀၀၀ နီးပါးနဲ့ ထောင်ပေါင်းများစွာသော ပြည်သူတွေဟာ ယာယီရွှေ့ပြောင်းနေထိုင်တဲ့ နေရာတွေကနေ ထပ်မံရွှေ့ပြောင်းရတယ်လို့ ကုလသမဂ္ဂက ထုတ်ပြန်လိုက်ပါတယ်။

ဒေသခံပြည်သူ အတော်များများဟာ လမ်းပေါ်မှာ နေထိုင်ခဲ့ရတာ တနှစ်ကျော်ပြီ ဖြစ်သလို အရင်ရက်ပိုင်းက တိုက်ပွဲ ဖြစ်ပွားမှု အရှိန်လျော့ကျသွားပေမယ့် အခြေအနေက ဆက်တင်း မာနေဆဲဖြစ်တယ်လို့ ကုလသမဂ္ဂ ကလေးသူငယ်များဆိုင်ရာ ရန်ပုံငွေအဖွဲ့ ယူနီဆက် (မြန်မာ) က ဧပြီ ၂၂ ရက်နေ့ ထုတ်ပြန်ချက်မှာ ရေးပါတယ်။

တိုက်ပွဲသစ်တွေဖြစ်ပွားမှုနဲ့ နောက်ဆက်တွဲဖြစ်ပေါ်လာတဲ့ မိသားစုဝင်တွေ ရွှေ့ပြောင်းနေထိုင်မှုကြောင့် စိတ်ချရတဲ့ ရေကောင်းရေသန့်နဲ့ အိမ်သာရရှိမှုလျော့ကျသွားတဲ့အတွက် ကလေးတွေအပေါ် ကျန်းမာရေးဆိုင်ရာ ဘေးအန္တရာယ် ကျရောက်မှုတွေ မြင့်တက်နေပါတယ်လို့ ယူနီဆက် မြန်မာပြည်ဆိုင်ရာ ဌာနေကိုယ်စားလှယ် မစ္စတာဘက်ထရန် ဗိန်းဘဲ(လ်) က ပြောပါတယ်။

ဒါ့အပြင် ကချင်နဲ့ ရှမ်းပြည်မြောက်ပိုင်းဟာ မြန်မာနိုင်ငံမှာ မြေမြှုပ်မိုင်းထောင်မှု အများဆုံး ဒေသဖြစ်ပြီး ဆက်ဖြစ်နေတဲ့ တိုက်ပွဲတွေအတွက်လည်း ၂ ဘက်စလုံးက မြေမြှပ်မိုင်းကို အသုံးပြုနေတဲ့အတွက် ကျန်နေတဲ့ မြေမြှုပ်မိုင်းတွေဟာ ကလေးသူငယ်များအပါအ၀င် ဘေးအန္တရာယ်သင့်နေတဲ့ ဒေသခံပြည်သူတွေကို အန္တရာယ်ကျရောက်စေနိုင်တယ်လို့လည်း ဆိုပါတယ်။

“မြေမြှုပ်မိုင်းဟာ မြန်မာအတွက် အရေးပါတဲ့ ကိစ္စရပ်တခုဖြစ်နေပါတယ်။ မြေမြှုပ်မိုင်းကြောင့် မြန်မာဟာ ကမ္ဘာမှာ ထိခိုက်ခံစားရဆုံး တိုင်းပြည်တခုလည်း ဖြစ်ပါတယ်။ ဒါ့အပြင် ဒီဖြစ်ရပ်တွေ မတိုင်ခင်က ကျနော်တို့၊ အစိုးရနဲ့ နိုင်ငံတကာ အသိုင်းအ၀န်းက မြေမြှုပ်မိုင်းဟာ နယ်စပ်တွေမှာ အဟန့်အတားဖြစ်နေသလို လူတွေကလည်း သူတို့နေရပ်ကို ပြန်ဖို့ အတွက် တားမြစ်ထားတယ်ဆိုတာကို သိနေပါတယ်” လို့ ဘက်ထရန်ဗိန်းဘဲ (လ်) က ပြောပါတယ်။

ဒါ့အပြင် လူသားချင်း စာနာထောက်ထားရေး အကူအညီတွေ ဖြန့်ဝေရာမှာလည်း အဟန့်အတားတွေ ဖြစ်စေတယ်လို့လည်း ထုတ်ပြန်ချက်မှာ ရေးပါတယ်။

တိုက်ပွဲတွေ ရပ်ဆိုင်းသွားပေမယ့် ကလေးသူငယ်တွေ ရင်ဆိုင်နေရတဲ့ ဘေးအန္တရာယ်တွေက ကွယ်ပျောက်သွားမှာ မဟုတ်သလို အသုံးပြုလိုက်တဲ့ မြေမြှုပ်မိုင်းအန္တရာယ်ကို ရင်ဆိုင်နေရသလို လက်နက်ကိုင်တပ်ဖွဲ့တွေမှာ ကလေးတွေကို တပ်သားအဖြစ် အသုံးပြု ခေါ်ယူစုဆောင်းခံရတာတွေကြောင့်ဖြစ်တယ်လို့လည်း ပြောပါတယ်။

အကူအညီအထောက်အပံ့တွေပေးဖို့ လူသူပစ္စည်းတွေ စုစည်းနေပြီဖြစ်ပေမယ့် စစ်ပွဲဒဏ်သင့် ပြည်သူတွေ၊ အထူးသဖြင့် ကလေးသူငယ်တွေထံ အကူအညီတွေရောက်ရှိဖို့ လိုအပ်နေတယ်လို့ ဆိုပါတယ်။

DVB Burmese