အမေရိကန်နှင့် နေတိုးတို့၏ စစ်ရေးလှုပ်ရှားမှုများကြောင့် ရုရှားမှ သတိပေး နှိုးဆော်ထား

ပို့စ်တင်ချိန် - 4/29/2014 06:39:00 PM

ဧပြီ ၂၉။

မော်စကိုအနေဖြင့် ယူကရိန်း အကျပ်တည်း မြင့်တက်နေမှုကြားတွင် ရှရှားနယ်စပ် အနီး အမေရိကန်-နေတိုးတို့၏ စစ်ရေးဆိုင်ရာ
လှုပ်ရှားမှုများကြောင့် စိုးရိမ်ပူပန်မိကြောင်း ပြောဆိုခဲ့သည်။

ရုရှား၏ ကာကွယ်ရေး ဝန်ကြီး ဆာဂီးရှိုဂူမှ အမေရိကန် ကာကွယ်ရေး ဝန်ကြီး ချက်ဟေဂယ်နှင့် ဖုန်းပြောဆိုမှုတွင် ၎င်းကဲ့သို့
ပြောဆိုခဲ့ခြင်း ဖြစ်သည်။ သို့ရာတွင် အမေရိကန်မှလည်း ရုရှားအနေဖြင့် ယူကရိန်းအား ကျူးကျော်မည် မဟုတ်ဟု အာမခံခဲ့ကြောင်း
ပြောဆိုခဲ့သည်။

အရှေ့ဥရောပတွင် တပ်ဖွဲ့များ တိုးမြှင့်ချထားမှုသည် နေတိုး မဟာမိတ်အဖွဲ့များကို အာမခံရန် အတွက် ဖြစ်ကြောင်း အမေရိကန်မှ
ပြောဆိုထားသည်။ ယူကရိန်းတွင် ဝင်ရောက်စွက်ဖက်မှုများကြောင့် ရုရှားအပေါ်တွင် စီးပွားရေး ပိတ်ဆို့မှု အသစ်များကိုလည်း
အမေရိကန်မှ ထပ်မံချမှတ်ခဲ့သည်။

ထပ်မံ ပြုလုပ်ခဲ့သော စီးပွားရေး ပိတ်ဆို့မှုတွင် ရုရှားမှ လူပုဂ္ဂိုလ်များနှင့် ကုမ္ပဏီ ၁၇ ခုတို့ ပါဝင်ပြီး ၎င်းတို့သည် ရုရှား သမ္မတ ဝလာဒီမာ
ပူတင်၏ အတွင်းစည်းမှ ဖြစ်ကြောင်း အမေရိကန်မှ ပြောကြားခဲ့သည်။

ဥရော သမဂ္ဂမှလည်း လူ ၁၅ ဦးအပေါ်တွင် စီးပွားရေး ပိတ်ဆို့မှုများ ပြုလုပ်ခြင်းကို ယနေ့ အင်္ဂါနေ့အတွင်း နာမည် စာရင်းထုတ်ဖော်ပြီး
ပြုလုပ်သွားမည် ဖြစ်သည်။

အမေရိကန် ကာကွယ်ရေး ဝန်ကြီးနှင့် တစ်နာရီခန့် ရှည်ကြာသည့် ဖုန်းပြောဆိုမှုတွင် ပွင့်ပွင့်လင်းလင်း ဆွေးနွေးခဲ့ကြကြောင်း မစ္စတာ ရှိုဂူမှ
ပြောကြားခဲ့သည်။ အမေရိကန်နှင့် နေတိုးတို့၏ အရှေ့ဥရောပအတွင်း စစ်ရေးဆောင်ရွက်မှုများသည် ရုရှားအား ထိန်းသိမ်းရန် လိုအပ်သည်
ဟူသော အကြောင်းပြချက်ဖြင့် လုပ်ဆောင်နေကြခြင်း ဖြစ်ကြောင်း မစ္စတာ ရှိုဂူမှ ပြောကြားခဲ့သည်။ ရုရှား တပ်ဖွဲ့များသည် ၎င်းတို့၏ ပင်မ
အခြေစိုက်စခန်းများသို့ ယူကရိန်း နယ်ခြားအနီး စစ်ရေး လေ့ကျင့်မှုများအပြီးတွင် ပြန်လည် ရောက်ရှိနေကြပြီ ဖြစ်ကြောင်းလည်း ပြောဆို
သွားခဲ့သည်။

ပင်တဂွန်မှလည်း မစ္စတာ ရှိုဂူသည် မော်စကို အနေဖြင့် ယူကရိန်းအား ကျူးကျော်ရန် အစီအစဉ်မရှိကြောင်းကို အာမခံခဲ့ကြောင်း ပြောကြား
သွားသည်။ ရုရှားမှ ဆက်လက်ပြီး ရန်လိုတိုက်ခိုက်မှုများ ပြုလုပ်နေလျှင် သံတမန်ရေးရာနှင့် စီးပွားရေး ဆိုင်ရာ အကျပ်အတည်းများကို ပိုမို
ရင်ဆိုင်ရမည့် အကြောင်း မစ္စတာ ဟေဂယ်မှ သတိပေးပြောကြားခဲ့ကြောင်း ပင်တဂွန်မှ ပြောဆိုခဲ့သည်။

Ref: BBC
The Myanma Age