ဆရာကြီးဦးဝင်းတင်၏ ကျန်းမာရေး အစိုးရတာဝန်ယူလျက်ရှိ အထူးခြားဆုံး ဂုဏ်ပြုခံရခြင်းအဖြစ် သုံးသပ်

ပို့စ်တင်ချိန် - 4/04/2014 09:52:00 AM

မတ်လ ၂၉ ရက် ညနေပိုင်းက ဆရာကြီးဟံသာဝတီဦးဝင်းတင်ကို ၈၈ မျိုးဆက်ပွင့်လင်း အဖွဲ့ခေါင်းဆောင် ကိုမင်းကိုနိုင်မှ လာရောက်လူနာကြည့်ရှု

ရန်ကုန်၊ ဧပြီ ၃

အမျိုးသား ဒီမိုကရေစီအဖွဲ့ချုပ် သဘာပတိ၊ ၀ါရင့်သတင်းစာ ဆရာကြီး ဟံသာဝတီဦးဝင်းတင်၏ ကျန်း မာရေး စောင့်ရှောက် ကုသမှု အ၀၀ကို ပြည်ထောင်စု အစိုးရအဖွဲ့၊ ကျန်းမာရေး ၀န်ကြီးဌာနမှ ပြည်ထောင်စု ၀န်ကြီး ညွှန်ကြားချက်ဖြင့် မိသားစုထံ ခွင့်ပန်ကာ အစိုးရစရိတ်ဖြင့် လက်ရှိ အထူးကြပ်မတ် ဆေးဝါးကုသရမှု အားလုံးကို တာဝန်ယူ ဆောင်ရွက်ပေးလျက်ရှိကြောင်း ဆရာကြီးဟံသာဝတီ ဦးဝင်းတင်အား အနီးကပ် စောင့်ရှောက်နေသူများက မြန်မာသံတော်ဆင့်သို့ ပြောသည်။

““သူတို့ လုပ်ပေးပါရစေဆိုပြီး ခွင့်တောင်းပြီး အခုကျန်းမာရေး ကုသမှုတွေ အကုန်လုံးကို ကျန်းမာရေး ၀န်ကြီး ဌာနက တာဝန်ယူထားတယ်။ အခု ဆေးရုံကြီးက ကုသမှုတွေတင်မကဘူး အပြင်မှာ ဆေးဝါး ၀ယ်တာတောင်မှ သူတို့ပဲ အကုန်လုံး တာဝန်ယူထားတယ်”” ဟု ဆရာကြီး ဟံသာဝတီ ဦးဝင်းတင်၏ ကျန်းမာရေး ကုသမှုတွင် အနီးကပ်ရှိနေသူ ဦးမောင်မောင်နိုင်က ပြောသည်။

ဆရာကြီး ဟံသာဝတီ ဦးဝင်းတင်သည် သူ့၏ အသက် ၈၄ နှစ်ပြည့် မွေးနေ့ရက်ဖြစ်သော မတ်လ ၁၂ ရက်နေ့မှ စတင်ကာ ကျန်းမာရေး ကုသမှု ပြုလုပ်ရန် Green Cross ဆေးရုံသို့ တက်ရောက်ခဲ့ရပြီး မတ်လ ၂၅ရက်နေ့ တွင် စိုးရိမ်ဖွယ် ကျန်းမာရေး အခြေအနေကြောင့် ၀ိတိုရိယ အထူးကုဆေးရုံကြီးသို့ ပြောင်းရွှေ့ ဆေးဝါးကုသ ခဲ့ရသည်။ ထို့နောက် မတ်လ ၂၉ ရက် မနက်ပိုင်းတွင် အဆိုးဝါးဆုံး ကျန်းမာရေး အခြေအနေသို့ ရောက်ရှိ လာသဖြင့် မြန်မာနိုင်ငံအတွင်း ခေတ်မီကျန်းမာရေး အထောက်အကူပြု ပစ္စည်းများ အစုံအလင်ဆုံးဖြစ်သည့် ရန်ကုန်ပြည်သူ့ ဆေးရုံကြီး အထူးကြပ်မတ် ကုသဆောင်သို့ ထပ်မံပြောင်းရွှေ့ ဆေးကုသမှု ခံယူခဲ့ရခြင်းဖြစ် သည်။

မတ်လ ၂၉ ရက်နေ့ နံနက်ပိုင်းမှ စတင်ကာ အဆုတ်မှတစ်ဆင့် လေ၀င်ကာ အူမကြီး အနာဖြစ်ခြင်းကြောင့် သွေးယိုစီးကာ သတိမေ့မြောသွားပြီး ယနေ့အထိ သတိလစ် မေ့မြောနေသည့် စိုးရိမ်ဖွယ် အခြေအနေကြောင့် ပြည်ထောင်စု အစိုးရအဖွဲ့ ညွှန်ကြားချက်ဖြင့် မြန်မာနိုင်ငံရှိ ထိပ်တန်းဆရာဝန်ကြီးများ၏ နေ့စဉ်တိုင်ပင် ဆုံးဖြတ် စိစစ်ချက်ဖြင့် ဆေးကုသ ဆောင်ရွက်လျက် ရှိသည်။

နှစ်ပေါင်းများစွာ မြန်မာ့ဒီမိုကရေစီရေး၊ လူ့အခွင့်အရေးနှင့် လွတ်လပ်စွာရေးသား ထုတ်ဖော် ပြောဆိုခွင့်များ အတွက် ဆောင်ရွက်ခဲ့ခြင်းကြောင့် နှစ်ရှည်နိုင်ငံရေး အကျဉ်းသားတစ်ဦးအဖြစ် ယခင်စစ်အာဏာရှင် အစိုးရက အကျဉ်းချထားမှု ခံခဲ့ရကာ အန္တရာယ်အရှိဆုံး အတိုက်အခံတစ်ဦးအဖြစ် သတ်မှတ်ခံခဲ့ရသည့် ဆရာကြီး ဟံသာဝတီ ဦးဝင်းတင်ကို ယခုကဲ့သို့ (ဆရာကြီး ဟံသာဝတီဦးဝင်းတင်၏ ယူဆချက်အရ) ““စစ်အာဏာရှင် အသွင်ပြောင်း အရပ်သားအစိုးရ””က ယခုကဲ့သို့ဆရာကြီး၏ စိုးရိမ်ဖွယ် ကျန်းမာရေး အခြေအနေ ရောက်ရှိနေမှုကို အလေးထား တာဝန်ယူ ဆောင်ရွက်ပေးနေခြင်းသည် မြန်မာ့နိုင်ငံရေးသမိုင်း၌ အထူးခြားဆုံးသော ဂုဏ်ပြု အသိအမှတ်ပြုခံရခြင်း တစ်ရပ်အဖြစ် ဆရာကြီးနှင့် နီးစပ်သူ အသိုင်းအ၀ိုင်းက သုံးသပ်လျက်ရှိသည်။

ဆရာကြီးဟံသာဝတီဦးဝင်းတင်၏ ကျန်းမာရေး စိုးရိမ်ဖွယ်ရာ အခြေအနေ ဖြစ်ပေါ်နေစဉ် စစ်အစိုးရ အကြီးအကဲဟောင်း ဗိုလ်ချုပ်ကြီးဦးနေ၀င်း၏ သမီးဖြစ်သူ ဒေါ်စန္ဒာဝင်းနှင့် သားဖြစ်သူလည်း ဆရာကြီး၏ ကျန်းမာရေး အခြေအနေကို စိုးရိမ်မှုကြောင့် ကုသစောင့်ရှောက်မှု အခြေအနေများကို မတ်လ ၂၈ ရက်တွင် လာရောက်တိုင်ပင် ဆွေးနွေးခြင်း ပြုလုပ်ခဲ့ကြောင်း ဦးမောင်မောင်နိုင်က ပြောသည်။

ဆရာကြီး ဟံသာဝတီဦးဝင်းတင်၏ သတင်းစာ သြ၀ါဒခံတစ်ဦးဖြစ်သည့် မြန်မာသံတော်ဆင့် အပတ်စဉ်သတင်း ဒုအယ်ဒီတာချုပ် ဦးအံ့ခေါင်မင်းက ““တစ်ခါက ဘဘ ပြောဖူးတဲ့ စကားတစ်ခွန်းရှိတယ်။ ငါ့အိတ်ကပ်ထဲမှာ ကလေး မုန့်ဖိုးပေးဖို့တောင် မရှိဘူး၊ ရသမျှ လာကန်တော့ တာတွေကော စာမူခအနေနဲ့ ရတာတွေကော ဖောင်ဒေးရှင်းအတွက် အကုန်ပေးလိုက်တာပဲတဲ့။ ဘဘပြောသလိုပဲ သူ့အနေနဲ့ ပိုင်ဆိုင်မှု တစ်ခုမှ မရှိပေမယ့် ဘဘရဲ့ အသက်ရှင်သန်ဖို့အတွက် ဆိုရင် အသက်ကို ရွှေနဲ့ဆက်ပြီး ၀ယ်ပေးမယ့်သူတွေ၊ ကိုယ့်အသက်နဲ့ ထပ်ပြီး အလိုက်ပေးမယ့်သူတွေ ရေတွက်လို့တောင် ရမှာမဟုတ်ဘူး။ သို့သော် ဒါဟာ ဘဘကို အစဉ်တစိုက် ကြည်ညို လေးစားခဲ့တဲ့သူတွေ လက်ရှိ မြန်မာ့နိုင်ငံရေးရဲ့ ညစ်ပတ် ပုပ်ပွနေတဲ့ အခြေအနေမှာ ဘဘလို တကယ့် ကိုယ်ကျိုးစွန့် အရေးတော်ပုံ တပ်သားတစ်ယောက် ရပ်တည်ပေးနေဖို့ အလိုအပ်ဆုံး ဖြစ်တယ်ဆိုတာ ခံယူထားကြသူတွေပဲ။ အခုလို အကြီးမားဆုံး ရန်သူကြီး တစ်ယောက်အဖြစ် သတ်မှတ်ပြီး ပြုမူခဲ့တဲ့သူတွေက အလေးဂရုပြုနေကြတာက အခုအချိန်မှာ မြန်မာ့နိုင်ငံရေးသမိုင်း တစ်လျှောက်မှာ အထူးခြားဆုံး ကြီးကျယ် မြင့်မြတ်တဲ့ ဂုဏ်ပြု အသိအမှတ်ပြု ခံရခြင်းလို့ ပြောရမှာပဲ။ ကျွန်တော်ကတော့ ဘဘဟာ သေလုမြောပါး ဝေဒနာနဲ့ ဘ၀ရှင်သန်ရေး လွန်ဆွဲနေရတဲ့ အချိန်မှာတောင် ကျွန်တော်တို့ အားလုံးအတွက် သူပေးနိုင်သမျှ ပေးဆပ် နေတုန်းပဲလို့ ပြောချင်တယ်။ ဘာကြောင့်လဲဆိုတော့ လက်ရှိ နိုင်ငံရေး၊ သတင်းစာလောက အားလုံး လိုက်နာ ဆောင်ရွက်သင့်တဲ့ သူ့ရဲ့လမ်းစဉ်ကို သက်သေပြလိုက်တာပဲ”” ဟု ပြောသည်။

ဆရာကြီးဟံသာဝတီ ဦးဝင်းတင်၏ လက်ရှိကျန်းမာရေး အခြေအနေ မှာ မတ်လ ၂၅ ရက်နေ့ ကျန်းမာရေး အခြေအနေထက် ပိုမို တိုးတက်လာသည့် အခြေအနေရှိသော်လည်း စိတ်ချရသည့် အခြေအနေ မရှိသေးဘဲ ကျန်းမာရေး ပုံမှန်ပြန်လည် ကောင်းမွန်လာရန် ရာခိုင်နှုန်း ၅၀ အောက်သာ ရှိသေးကြောင်း ရန်ကုန် ဆေးရုံအုပ်ကြီး ဒေါက်တာလှမြင့်က ပြောသည်။

MH-0099

မြန်မာသံတော်ဆင့်