တက္ကစီ အရစ်ကျဝယ်ယူရာတွင် ပိုင်ဆိုင်မှု အထောက်အထားများ မပေးသည့်အပြင် နယ်လိုင်စင်ဝင်ထားသောကားများ ရောင်းသည့်အတွက် BEST AUTO ကားကုမ္ပဏီအား ဆန္ဒပြ
ပို့စ်တင်ချိန်
- 4/03/2014 09:40:00 AM
.jpg)
Written by:
သက်မင်း
BEST AUTO ကုမ္ပဏီရှေ့တွင် ဆန္ဒပြနေသူများအား ဧပြီ ၂ ရက် မွန်းတည့် ၁၂ နာရီခန့်က တွေ့ရစဉ် (ဓာတ်ပုံ-သက်မင်း)
တက္ကစီများအား အရစ်ကျ ၀ယ်ယူရာတွင် ယာဉ်တန်ဖိုး၏ တစ်ဝက်နှင့် တစ်ဝက်ကျော်ခန့် ပေးသွင်းပြီး ဖြစ်သော်လည်း ၀ှီးတက်၊ အုံနာဘုတ်ကဲ့သို့ ယာဉ်ပိုင်ဆိုင်မှု အထောက်အထားများကို မပေးသည့်အပြင် နယ်လိုင်စင်ဖြင့် ၀င်ထားသောကားများကို လိမ်လည်ရောင်းချနေသည့် အတွက်ဟုဆိုကာ BEST AUTO ကားကုမ္ပဏီအား ကားဝယ်ယူမိခဲ့သည့် လူဦးရေ ၃၀ ခန့်က မင်္ဂလာတောင်ညွန့်မြို့နယ်၊ ရွှေမြယာအိမ်ရာရှိ BEST AUTO ကားကုမ္ပဏီ ရုံးခန်းရှေ့တွင် ဆန္ဒပြခဲ့ကြောင်း သိရသည်။
ဆန္ဒပြသူများမှာ ယင်းကုမ္ပဏီ ရုံးခန်းရှေ့တွင် “စာချုပ်မချုပ်ဆိုရသေးသော ကားများအား စာချုပ်ချုပ်ဆိုပေးရေး၊ လိုင်စင်မ၀င်ရသေးသော ကားများအား လိုင်စင်ဝင်ပေးရေး၊ တရားမျှတမှု မရှိသော ကုမ္ပဏီ အလိုမရှိ၊ BEST AUTO နှင့် UBM ကုမ္ပဏီတို့မှ ဥက္ကဋ္ဌကိုယ်တိုင် လာရောက်ဖြေရှင်းပေးရေး စသောဗီနိုင်းများကို ကိုင်ဆောင်ကာ ၎င်းတို့အခက်အခဲအား ကုမ္ပဏီမှ အမြန်ဆုံး ဖြေရှင်းပေးရန် ကြွေးကြော်တောင်းဆိုခဲ့ကြသည်။
“ကျွန်တော်တို့ ပိုက်ဆံသွင်းပြီးတာ သုံးပုံနှစ်ပုံလောက် ရှိပြီ။ ဒါပေမဲ့ အခုထက်ထိ လုပ်ငန်းလိုင်စင်တွေ၊ ပိုင်ဆိုင်ကြောင်း အထောက်အထားတွေ မရသေးဘူး။ တက္ကစီ မောင်းစားနေရတာဆိုတော့ အဲဒါတွေမရှိလို့ လုံးဝမရဘူးလေ။ ယာဉ်ထိန်းရဲက အချိန်မရွေး ဖမ်းသွားမှာ။ နောက်ပြီး လိုင်စင်ကိုလည်း နယ်လိုင်စင်နဲ့ လိမ်ရောင်းထားတယ်” ဟု ဦးဝင်းမြင့်က ဆန္ဒပြရသည့် အကြောင်းရင်းကို ပြောသည်။
ယင်းဖြစ်စဉ်နှင့် ပတ်သက်၍ BEST AUTO ကားကုမ္ပဏီမှ တာဝန်ရှိသူအား မေးမြန်းရန် သွားရောက်ခဲ့သော်လည်း လက်ခံဖြေကြားပေးမည့်သူ မရှိဟု ကုမ္ပဏီဝန်ထမ်းတစ်ဦးက ပြောကြားခဲ့ပြီး ကုမ္ပဏီညွှန်ကြားရေးမှူး ဦးစိုးတင့်၏ လက်ကိုင်ဖုန်းလေးလုံးသို့ ထပ်မံဆက်သွယ်ခဲ့သော်လည်း သုံးလုံးမှာ ဖုန်းပိတ်ထားပြီး တစ်လုံးမှာ ဖွင့်ထားသော်လည်း ဖုန်းပိုင်ရှင်မှာ ဦးစိုးတင့်မဟုတ်ကြောင်း ငြင်းဆိုခဲ့သည်။
EMG
