Mobile Banking ကိုယ်စားလှယ် ဆောင်ရွက်လိုပါက သတ်မှတ်ကိုယ်ပိုင်ငွေကြေးတစ်ခုကို ဘဏ်တွင် အပ်ထားနိုင်ရမည်ဟုဆို

ပို့စ်တင်ချိန် - 3/17/2014 09:13:00 PM

Mobile Banking ကိုယ်စားလှယ် ဆောင်ရွက်လိုပါက သတ်မှတ်ကိုယ်ပိုင်ငွေကြေးတစ်ခုကို ဘဏ်တွင် အပ်ထားနိုင်ရမည်ဖြစ်ကြောင်းဟု သမဝါယမဘဏ်၏ ဒုတိယအထွေထွေမန်နေဂျာ ဦးဦးသိန်းမြင့်က ပြောသည်။

ကိုယ်စားလှယ်အဖြစ် ဆောင်ရွက်ရန်မှာ အများပြည်သူအပေါ်၌ ရိုးသားရန်လိုအပ်ကြောင်း ဆိုသည်။ “လုပ်လိုတဲ့သူတွေအနေနဲ့ အများပြည်သူပေါ်မှာ ရိုးသားဖို့လိုတာပေါ့။ စီးပွားရေးကောင်းသလားဆိုတာ ကြည့်ရတယ်။ ဆိုင်တစ်ဆိုင်တော့ ရှိရမယ်လေ။ အဲဒီလူက အနည်းဆုံးဘဏ်မှာ ကျွန်တော်တို့ သတ်မှတ်ထားတဲ့ ငွေကြေးတစ်ခု အပ်ထားနိုင်ရမယ်။ သတ်မှတ်ချက်ကတော့ သူ သိန်း၁၀၀ လောက် လည်ပတ်ချင်တယ်ဆိုရင် သိန်းတစ်ရာတော့ ထည့်ထားရမယ်လေ။ ဘာလို့လဲဆိုတော့ သူ့အကောင့်က နှုတ်ပြီးတော့ သူများကိုလွှဲပေးမှာကိုး။ အဲဒီနည်းနဲ့ လုံခြုံရေးကို ထိန်းထားတယ်” ဟု ပြောကြားသည်။ အများပြည်သူ ယုံကြည်စိတ်ချရသောသူ၊ ဘဏ်မှ ယုံကြည်စိတ်ချရသောသူဆိုပါက မိုဘိုင်းဘဏ်စနစ် ကိုယ်စားလှယ်များ ပေးအပ်သွားမည်ဖြစ်ကြောင်း သိရသည်။

မိုဘိုင်းဘဏ်လုပ်ငန်း ဆောင်ရွက်ရန်အတွက် လုပ်ငန်းတစ်ခုပြရန် လိုအပ်ကြောင်း မိုဘိုင်းဘဏ်ကိုယ်စားလှယ်အဖြစ် လျှောက်ထားသူတစ်ဦးက ပြောသည်။ “ဆိုင်ခန်းရှိရမယ်လို့ သတ်မှတ်ထားပါတယ်။ လုပ်ငန်းဓာတ်ပုံသုံးပုံ၊ လုပ်မယ့်နေရာရဲ့ဓါတ်ပုံ၊ လုပ်ငန်းလိုင်စင်မိတ္တူ၊ အိမ်ထောင်စုစာရင်းမိတ္တူ၊ မှတ်ပုံတင်မိတ္တူတွေနဲ့ နီးစပ်ရာ ဘဏ်မှာ လျှောက်ထားရတာပါ” ဟု သမဝါယမဘဏ်တွင် လျှောက်ထားခဲ့သည့် ယင်းကပြောသည်။ မိုဘိုင်းဘဏ်လုပ်ငန်းကို ပြည်တွင်းဘဏ်အချို့မှ စတင်အကောင်အထည်ဖော်လျှက်ရှိသည်။ မိုဘိုင်းဘဏ်စနစ်ဆောင်ရွက် ချက်တစ်ခုအနေဖြင့် Mobile Banking Application ကို ဖြန့်ချိပေးလျက်ရှိကြောင်း၊ အွန်လိုင်းမှလည်း ရယူနိုင်ကြောင်း AGD Bank မှ မေးမြန်းသိရှိရသည်။

“မိုဘိုင်းဘဏ်စနစ်လုပ်ချင်တဲ့သူက ဘဏ်ကိုလာရမယ်။ သတ်မှတ်တဲ့ ဖောင်တွေဖြည့်ရမယ်။ ဖြည့်ပြီးမှ Saving Account သို့မဟုတ် Current Account ဖွင့်ရမယ်။ အဲ့လိုဖွင့်တဲ့အခါကျရင် Saving စာအုပ်ပေးမှာပေါ့လေ။ Current ဆိုရင် ချက်စာအုပ်ပေးမယ်။ အဲ့ဒီလူဟာ မိုဘိုင်းဌာနမှာ သွားပြီးတော့ အဲဒီဆော့ဖ်ဝဲ Application ကို ထည့်ရမယ်။ အဲ့လိုထည့်ပေးလိုက်တာနဲ့ Pin ကုတ်ပေးမယ်။ အဲ့လိုပေးလိုက်တာနဲ့ သူ့ Saving အကောင့်မှာ ထုတ်လို့ရမယ်။ Current မှာရှိတဲ့ အကောင့်ကို ထုတ်လို့ရတယ်။ အဝေးတစ်နေရာကနေ ကြည့်လို့ရတယ်။ အကောင့်လွှဲတာတွေ ဆောင်ရွက်နိုင်မှာဖြစ်ပါတယ်” ဟု ဘဏ်တစ်ခု၏ တာဝန်ရှိသူက ရှင်းပြသည်။ ATM အကောင့်များကိုလည်း ငွေလွှဲနိုင်မည်ဖြစ်ကြောင်း၊ Master, Visa ကတ်များတွင် ငွေကုန်ပါက မိုဘိုင်းဘဏ် စနစ်ကိုသုံးကာ Master, Visa ရှိ အကောင့်ကို ဖြည့်စွက်၍ရမည်ဖြစ်ကြောင်း ဆက်လက်ပြောကြားသည်။

“မိုဘိုင်းဘဏ်က ATM, POS တွေထက် ဘာသာလဲဆိုတော့ ATM, POS ထဲတို့မှာ အဲဒီကိုသွားနေရတယ်လေ။ မိုဘိုင်းဘဏ်စနစ်ကျတော့ ကိုယ့်အိတ်ထဲမှာ အမြဲတမ်းရှိတဲ့အတွက် အချိန်တိုင်းမှာ လွှဲလို့ရတယ်။ ကိုယ့်အကောင့်က လွှဲလို့ရသလို သူများအကောင့်ကိုလည်း လွှဲလို့ရတယ်” ဟု ဦးဦးသိန်းမြင့်က ပြောသည်။ သမဝါယမဘဏ်အနေဖြင့် မိုဘိုင်းဘဏ်လုပ်ငန်းအတွက် ကိုယ်စားလှယ်လုပ်ကိုင်လိုသူများအား ဖိတ်ခေါ်ထားခြင်းဖြစ်သည်။

ထွန်းထွန်း
Internet Journal