ဝက်နားရွက်ပြာ ရောဂါချိန် နီးကပ်လာပြီ ဖြစ်၍ ဝက်များ ကြိုတင်ရောင်းချ
ပို့စ်တင်ချိန်
- 3/24/2014 07:33:00 PM
ဥက္ကံ၊ မတ် ၂၃
ဝက်နားရွက်ရောဂါ ဖြစ်ပွားလေ့ရှိသော အချိန်နှင့် နီးကပ်လာပြီ ဖြစ်၍ တိုက်ကြီးမြို့နယ် အတွင်းရှိ ကျေးရွာများတွင် စီးပွားဖြစ် မွေးမြူကြသူများနှင့် တစ်နိုင်တစ်ပိုင် မွေးမြူကြသူများသည် မတ်လအတွင်း ဝက်ကြိုတင် ရောင်းချမူများ ပြုလုပ်လျှက် ရှိကြောင်း ဝက် ရောင်းဝယ်ရေး သမားများထံမှ စုံစမ်းသိရှိရသည်။
ဝက်နားရွက်ပြာ ရောဂါများသည် မန္တလေးတိုင်းဒေသကြီးတွင်၂၀၁၂-၂၀၁၃ ခုနှစ်များအတွင်း ဧပြီလမှ ဇူလိုင်လများအထိ ဖြစ်ပွားခဲ့ပြီး ရန်ကုန်တိုင်းဒေသကြီး အတွင်းရှိ မြို့များတွင် ဇွန်လမှ စက်တင်ဘာလများတွင် ဖြစ်ပွားခဲ့ရာ မွေးမြူရေးသမားများ အရှုံးပေါ်ခဲ့ပြီး ဝက်သား တစ်ပိဿာလျှင် တစ်ထောင်ကျပ်အထိ ရောင်းချခဲ့ရသည့် အပြင် ရောဂါကြောင့် သေဆုံးသော ဝက်များကိုပါ မြေမြှုတ်ခဲ့ရသည့်အတွက် ယခုနှစ်တွင် အဆိုပါရောဂါ ပြန်လည် ဖြစ်ပွားမည်ကို စိုးရိမ်ပြီး ခြံလုံးကျွတ် ရောင်းချခြင်း ဖြစ်ကြောင်း ဥက္ကံမြို့ဝက်မွေးမြူသူ ကိုမင်းမင်းထွန်းက ပြောကြားသည်။
“ကျွန်တော်ကတော့ အရဲစွန့်ပြီး မထားရဲဘူး၊ ခုဝက်သား တစ်ပိဿာကို ၅ ထောင်ဈေး ပေးတယ်လေ။ ဒါကြောင့် အိမ်ကဝက်တွေကို အကုန်ရောင်းလိုက်တယ်” ဟု ရောဂါ ဖြစ်ပွားစဉ်က ခြံလုံးကျွတ် အရှုံးပေါ်ခဲ့ဖူးသူ ၎င်းကဆိုသည်။
ဝက်နားရွက်ပြာရောဂါ ဖြစ်ပွားလာပါက ဝက်များတွင် ဆီးချုပ်၊ ဝမ်းချုပ်ခြင်းများ၊ အပူဖျားများ ဖြစ်ပေါ်ခြင်း၊ အသက်ရှူမမှန်ခြင်း၊ အသက်ရှူးပြင်းခြင်းများ ဖြစ်ပေါ်လေ့ရှိပြီ မျိုးဝက်များမှာ ရက်မစေ့ဘဲ မွေးဖွားခြင်း၊ မွေးဖွားလျှင်လည်း ဝက်အသေကလေးများ မွေးခြင်းများ ဖြစ်လေ့ရှိကြောင်း၊ အဆိုပါ ရောဂါ ဖြစ်ပွားလျှင် ဝက် အကောင်တစ်ရာလျှင် ခုနစ်ဆယ့်ငါးကောင် သေဆုံးနိုင်ကြောင်း တိုက်ကြီးမြို့ရှိ တိရစ္ဆာန် ဆေးကုဆရာဝန် တစ်ဦးက ပြောကြားသည်။
ဝက်နားရွက်ပြာများ ဖြစ်ပွားနိုင်သောအချိန် နီးကပ်လာပြီ ဖြစ်သောကြောင့် မွေးမြူထားသည့် ဝက်များကို ကြိုတင် ရောင်းချရသော အခြေအနေ ဖြစ်နေပြီး မြန်မာနိုင်ငံ၏ အဓိက အသားစားအုပ်စုတွင် ပါဝင်သည့် ဝက်များ ခြံလုံးကျွတ် သေကျေခဲ့ဖူးရကြောင်း တိုက်ကြီးမြို့နယ်၊ ဥက္ကံမြို့ရှမ်းစု ကျေးရွာရှိ ဒေသခံများထံမှ သိရသည်။
The Voice Weekly Myanmar
