ဒဂုံမြို့သစ်တောင်ပိုင်းမြို့နယ်ရှိ အေးရတနာစက်ရုံ မီးလောင်မှုတွင် ပျောက်ဆုံးနေသော အလုပ်သမားတစ်ဦးမှာ မီးလောင်မှုကြောင့် သေဆုံးခဲ့ကြောင်း ရဲစခန်းက အတည်ပြု

ပို့စ်တင်ချိန် - 3/13/2014 12:26:00 PM

မတ် ၁၀ ရက် နံနက်ပိုင်းက အေးရတနာ(သံနန်းဆွဲ) စက်ရုံအား မီးလောင်ကျွမ်းမှုအပြီးတွင် တွေ့ရစဉ် (ဓာတ်ပုံ- အောင်ကျော်ထက်)

ဒဂုံမြို့သစ်(တောင်ပိုင်း)မြို့နယ် ၆၃ ရပ်ကွက်၊ ရွှေတောင်ကြား (၅)လမ်း၊ အမှတ် ၁၀၉၀ ပိုင်ရှင် ဦး---၏ အေးရတနာ(သံနန်းဆွဲ) စက်ရုံတွင် မတ် ၁၀ ရက် နံနက် ၂ နာရီ ၃၀ မိနစ်တွင် မီးလောင်ကျွမ်းမှုကြောင့် ပျောက်ဆုံးနေခဲ့သည့် အဆိုပါစက်ရုံမှ အလုပ်သမားဖြစ်သူ ရဲထွန်း(၂၀) နှစ်မှာ ယင်းနေ့ကတည်းက မီးလောင်မှုကြောင့် သေဆုံးသွားခဲ့ကြောင်း ဒဂုံမြို့သစ်(တောင်ပိုင်း) မြို့နယ် ရဲတပ်ဖွဲ့စခန်းမှ အတည်ပြုခဲ့သည်ဟု သိရသည်။

အဆိုပါ မီးလောင်မှုကြောင့် သင်္ဃန်းကျွန်းမြို့နယ် မီးသတ်ဖွဲ့စခန်းမှ လက်ထောက်မီးသတ်ဦးစီးမှူး ဦးဝင်းဦးနှင့် အလုပ်သမားတစ်ဦးလည်း ဒဏ်ရာရှိခဲ့ကြောင်း သိရသည်။

“ပျောက်ဆုံးနေတဲ့ အလုပ်သမားကို မတ် ၁၁ ရက် နံနက် ၁၁ နာရီလောက်မှာ ရှာတွေ့ခဲ့ပါတယ်။ သူက မီးလောင်ခံရပြီး သေဆုံးသွားတာပါ” ဟု ဒဂုံမြို့သစ်(တောင်ပိုင်း) မြို့နယ် ရဲတပ်ဖွဲ့စခန်းမှ တာဝန်ရှိသူတစ်ဦးက မတ် ၁၂ ရက် နေ့လယ်ပိုင်းတွင် The Daily Eleven သတင်းစာသို့ ပြောကြားသည်။

အေးရတနာ (သံနန်းဆွဲ)စက်ရုံတွင် စက်ရုံအတွင်း သွယ်တန်းထားသော ၀ါယာကြိုးများ ဟောင်းနွမ်းဆွေးမြည့်၍ အပူလွန်ကဲပြီး ပေါက်ပြဲပြုတ်ကျရာမှ အောက်ဖက်ရှိ လွှစာမှုန့်များသို့ မီးကူးစက်ရာမှ မီးစတင်လောင်ကျွမ်းခဲ့ခြင်းဖြစ်ကာ မီးလောင်မှုကြောင့် စက်ရုံအဆောက်အအုံနှင့် အတွင်းပိုင်းပစ္စည်းများ မီးလောင်ခံရပြီး ကျပ် ၁၁ သိန်းကျော်ခန့် ဆုံးရှုံးခဲ့ကြောင်း သိရသည်။

အဆိုပါစက်ရုံ မီးလောင်မှုအား မီးငြှိမ်းသတ်ယာဉ် စုစုပေါင်း ၂၃ စီးဖြင့် သန္ဓေမီးသတ်တပ်ဖွဲ့ဝင် ၁၅၇ ဦး အရန်မီးသတ်တပ်ဖွဲ့ဝင် ၇၃ ဦး ကြက်ခြေနီတပ်ဖွဲ့ဝင် ၄၂ ဦးတို့ဖြင့် မီးငြှိမ်းသတ်ခဲ့ရကြောင်း သိရသည်။

မီးလောင်မှုနှင့်ပတ်သက်၍ အေးရတနာ (သံနန်းဆွဲ) စက်ရုံပိုင်ရှင်ဖြစ်သူ ဦး...(၄၈)နှစ်အား ဒဂုံမြို့သစ်(တောင်ပိုင်း) မြို့နယ် ရဲတပ်ဖွဲ့စခန်းမှ(ပ) ၂၁၀/၂၀၁၄/ပုဒ်မ ၂၈၅၊ ၃၃၇၊ ၃၀၄ (က)ဖြင့် အမှုဖွင့် အရေးယူထားကြောင်း သိရသည်။

The Daily Eleven