ထိုင်းရောက် ဗီဇာသက်တမ်းကုန် မြန်မာသိန်းချီကို ရက်ပေါင်း ၁၈၀ ကျော် အဖမ်းအဆီး ရပ်ထားမည်

ပို့စ်တင်ချိန် - 3/26/2014 07:56:00 PM

ရန်ကုန်၊ မတ် ၂၅

ထိုင်းနိုင်ငံရောက် ဗီဇာသက်တမ်းကုန် မြန်မာလုပ်သား တစ်သိန်းဝန်းကျင်ကို ဗီဇာသက်တမ်းတိုးခွင့် ပြုထားသဖြင့် ရက်ပေါင်း ၁၈၀ ကျော် အဖမ်းအဆီး ရပ်ထားမည်ဟု ထိုင်းအစိုးရက မတ်လ ၂၅ ရက်နေ့တွင် တရားဝင် ကြေညာလိုက်ကြောင်း ထိုင်းနိုင်ငံအခြေစိုက် ရွှေ့ပြောင်း အလုပ်သမားများအတွက် အခွင့်အရေး ကွန်ရက် (MWRN) မှ ဒါရိုက်တာ တစ်ဦးဖြစ်သူ ဦးစိန်ဌေးက ပြောကြားသည်။

ဗီဇာသက်တမ်းကုန် မြန်မာလုပ်သားများ အပါအဝင် လာအို၊ ကမ္ဘောဒီးယား နိုင်ငံတို့မှ လုပ်သားများကိုပါ အဖမ်းအဆီး ရပ်ထားမည် ဖြစ်ကြောင်း ၎င်းကဆိုသည်။
“ဗီဇာသက်တမ်း တိုးဖို့အတွက် လုပ်တာ။ နောက်အစိုးရ တက်လာပြီး ပြင်ဆင်တာ မလုပ်သရွေ့ အတည်ဖြစ်တယ်” ဟု ဦးစိန်ဌေးက ပြောဆိုသည်။

ဗီဇာသက်တမ်းကုန် မြန်မာလုပ်သားများကို ရက်ပေါင်း ၁၈၀ ကျော် အဖမ်းအဆီး ရပ်ထားရန် မြန်မာနိုင်ငံ အလုပ်အမား၊ အလုပ်အကိုင်နှင့် လူမှုဖူလုံရေး ဝန်ကြီးဌာန ပြည်ထောင်စုဝန်ကြီးက ထိုင်းနိုင်ငံ အလုပ်သမား ဝန်ကြီးဌာန ဝန်ကြီးကို မေတ္တာရပ်ခံထားပြီး မြန်မာ သံအမတ်ကလည်း ထိုင်း အလုပ်သမား ဝန်ကြီးဌာနကို မေတ္တာ ရပ်ခံထားကြောင်း ထိုင်းနိုင်ငံဆိုင်ရာ မြန်မာအလုပ်သမား သံအရာရှိ ဦးကျော်ကျော်လွင်က ပြောကြားသည်။
“အဖမ်းအဆီး ရပ်ထားတယ်လို့ တရားဝင် အကြောင်းမကြားသေးဘူး” ဟု ၎င်းကဆိုသည်။

ထိုင်းနိုင်ငံတွင် မြန်မာအလုပ်သမား တစ်သိန်းဝန်းကျင် ဗီဇာသက်တမ်း ကုန်ဆုံးသည့် ပြဿနာနှင့် ရင်ဆိုင်နေရသည်။

ဗီဇာသက်တမ်းကုန် မြန်မာလုပ်သားများကို မတ်လ ၇ ရက်နေ့မှမှ စတင်ကာ ဗီဇာ သက်တမ်းတိုးခွင့်ပြု နေပြီဖြစ်ရာ ယာယီ နိုင်ငံကူးလက်မှတ် သက်တမ်း ၂ နှစ်နှင့် အထက်ရှိပါက ဗီဇာ သက်တိုးရုံသာ တိုးရမည် ဖြစ်ပြီး ယာယီနိုင်ငံကူး လက်မှတ် ၂ နှစ်အောက်သာ သက်တမ်းရှိပါ ယာယီအစား ပုံမှန်နိုင်ငံ ကူးလက်မှတ် (စာအုပ်အနီ) ကို မဖြစ်မနေ ပြောင်းလဲ ကိုင်ဆောင်ရမည် ဖြစ်ကြောင်း ထိုင်းနိုင်ငံရှိ မြန်မာသံရုံးက ထုတ်ပြန်ထားသည်။

ပုံမှန် နိုင်ငံကူးလက်မှတ် လုပ်မည်ဆိုပါက နိုင်ငံသား စိစစ်ရေးကတ်နှင့် သန်းခေါင်စာရင်း အပါအဝင် အထောက်အထား ၁၀ ခုကိုတင်ပြရမည် ဖြစ်ပြီး နိုင်ငံသား စိစစ်ရေးကတ်နှင့် သန်းခေါင်စာရင်း မရှိပါက မြန်မာနိုင်ငံသို့ ပြန်လာ၍ ပြုလုပ်ရမည် ဖြစ်ကြောင်း၊ ဗီဇာနှင့် ပုံမှန် နိုင်ငံကူး လက်မှတ် ထုတ်ပေးရေး ရုံးများကို မဲဆိုင်၊ မဲဆောက်၊ ရနှောင်း နယ်စပ်မြို့ သုံးခုတွင် ဖွင့်လှစ်ထားကြောင်း ယင်းထုတ်ပြန်ချက်အရ သိရှိရသည်။

ပုံမှန် နိုင်ငံကူးလက်မှတ် ပြုလုပ်လျှင် ထိုင်းဘတ် ၁၆၀၀ ကုန်ကျမည် ဖြစ်သည်။

ယာယီ နိုင်ငံကူးလက်မှတ်အစား နိုင်ငံကူးလက်မှတ် (စာအုပ်နီ) ပြောင်းလဲ လုပ်ဆောင်ရာတွင် ယာယီနိုင်ငံကူး လက်မှတ် ထုတ်ယူစဉ်က ပြုလုပ်ခဲ့သည့် အတိုင်း အထောက်အထားများကို တင်ပြရမည် ဖြစ်သဖြင့် အချိန်၊ ငွေကြေးများစွာ ကုန်ကျနိုင်ပြီး ရှုပ်ထွေးမှုများ ဖြစ်လာနိုင်ကြောင်း၊ လုပ်သား အများစုတွင် နိုင်ငံသား စိစစ်ရေးကတ်နှင့် သန်းခေါင်စာရင်း မရှိသဖြင့် အခက်အခဲ ကြုံတွေ့နေရပြီး ဗီဇာသက်တမ်း တိုးရာတွင် အလုပ်သမား ကိုယ်တိုင်လျှောက် အဆင်မပြေသဖြင့် ပွဲစားများကို အသုံးပြုနေရကြောင်း ဦးစိန်ဌေးက ပြောကြားသည်။
“ဗီဇာသက်တမ်း တိုးဖို့အတွက် ပွဲစားတွေက ဘတ် ၁၂,၀၀၀၊ ၁၈,၀၀၀ လောက်အော်နေ၊ ခေါ်နေကြတယ်။ တချို့လည်း ၂၀,၀၀၀ လောက် ခေါ်တယ်” ဟု ၎င်းကဆိုသည်။

ဗီဇာသက်တမ်းကုန် လုပ်သားများကို နိုင်ငံကူးလက်မှတ် ပြုလုပ်ပေးခြင်း မလုပ်ဘဲ ယာယီနိုင်ငံကူး လက်မှတ်ကိုသာ သက်တမ်းတိုးပေးရန်၊ ဗီဇာ သက်တမ်းတိုးရန် ရုံးများကို နယ်စပ်တွင် သာမက ထိုင်းနိုင်ငံ အတွင်းတွင် ဖွင့်ပေးရန်၊ ဗီဇာသက်တမ်း တိုးရာတွင် ပွဲစားနှင့် မဟုတ်ဘဲ အလုပ်ရှင်၊ လုပ်သားကိုယ်တိုင် ပြုလုပ်နိုင်သည့် စနစ်ဖြင့် လုပ်ရန်နှင့် ကြာမြင့်ချိန်များကို တိတိကျကျ သတင်းထုတ်ပြန်ရန် MWRN က တောင်းဆိုထားသည်။

The Voice Weekly