အောက်ကြည့်မြင်တိုင် ကမ်းနားလမ်းရှိ ဖိနပ်ဆိုင် ဖောက်ထွင်းခံရပြီး နိုင်ငံခြားဖိနပ်အရန် ၈၀ ကျော် ခိုးယူခံရ
ပို့စ်တင်ချိန်
- 3/27/2014 06:20:00 PM
 |
| ဖောက်ထွင်းခိုးယူခံခဲ့ရသည့် ဖိနပ်ဆိုင်အား မတ် ၂၆ ရက် နံနက်ပိုင်းက တွေ့ရစဉ် |
ကြည့်မြင်တိုင်မြို့နယ် ကမ်းနားလမ်းရှိ ဖိနပ်ဆိုင်တစ်ဆိုင် ဖောက်ထွင်းခံရပြီး နိုင်ငံခြားဖိနပ် အရန် ၈၀ ကျော် ခိုးယူခံခဲ့ရကြောင်း သိရသည်။
ဖြစ်စဉ်မှာ မတ် ၂၆ ရက် နံနက် ၇ နာရီခန့်တွင် သရက်တောလမ်း သရက်တောတောင်ရပ်ကွက် ကြည့်မြင်တိုင်မြို့နယ်နေ ကို.....သည် အောက်ကြည့်မြင်တိုင်ကမ်းနားလမ်း၊ သရက်တောတောင်ရပ်ကွက်၊ ဆင်မလိုက်အဝေးပြေး ကားမှတ်တိုင်အနီးရှိ ၎င်း၏ “စူပါပါဝါ” နိုင်ငံခြားဖိနပ်မျိုးစုံ အရောင်းဆိုင်အား ဖွင့်ရန်သွားရောက်ခဲ့ကြောင်း သိရသည်။
ထိုသို့သွားရောက်ပြီး ဆိုင်အားဖွင့်စဉ် ဆိုင်အတွင်း၌ ပစ္စည်းများ ပြန့်ကျဲနေကြောင်း တွေ့ရှိရသဖြင့် စစ်ဆေးကြည့်ရာ ကျပ်သိန်း ၄၀ ကျော်တန်ဖိုးရှိ နိုင်ငံခြားဖိနပ်အရန် ၈၀ ကျော်မှာ ပျောက်ဆုံးနေကြောင်း တွေ့ရှိခဲ့ရသည်။
“ကျွန်တော်တို့ သားအမိနှစ်ယောက်တည်း ဒီဆိုင်ကို ရောင်းနေတာပါ။ လွန်ခဲ့တဲ့ သုံးရက်လောက်က တောင်ကြီး-အင်းလေးကို ခရီးထွက်ပြီး ဆိုင်ပိတ်ထားခဲ့တယ်။ ဒါပေမဲ့ မတ် ၂၃ ရက်နေ့မှာ ပြန်ရောက်ပြီး ၂၄၊ ၂၅ ရက်နေ့တွေမှာ ဆိုင်ဖွင့်တော့ ဘာမှမဖြစ်သေးဘူး။ ဒီနေ့မနက် လာဖွင့်တော့ အခုလို ဖောက်ထွင်းခိုးယူခံရတာကို တွေ့ရတာပါ။ ဆိုင်ရဲ့ ဘေးဘက်လမ်းကြားက၀င်ပြီး ဆိုင်ဘေးဘက် အလူမီနီယံ တွန်းတံခါးမှာကို ကာထားတဲ့ သံပန်းကို သံတူရွင်းနဲ့ ကလန့်ပြီးတော့ ခိုးသွားတဲ့ပုံစံပါ။ အကောင်းစား ဖိနပ်တွေကိုပဲ ရွေးခိုးသွားခဲ့ကြတာပါ” ဟု ဆိုင်ပိုင်ရှင်ကို...... က မတ် ၂၆ ရက် နံနက်ပိုင်းတွင် ပြောကြားသည်။
ကြည့်မြင်တိုင် မြို့မရဲစခန်းမှ တာဝန်ရှိသူများက ကျူးလွန်သူ ဖမ်းဆီးရမိရေး စုံစမ်းနေကြောင်း သိရသည်။
EMG
