မြန်မာ့လေကြောင်း ဝန်ထမ်းအိမ်တွင် ရတနာပစ္စည်းများ ဖောက်ထွင်းခံရ

ပို့စ်တင်ချိန် - 3/17/2014 09:13:00 PM

ရန်ကုန်၊ မတ် ၁၆
ဒဂုံမြို့သစ် (တောင်ပိုင်း) မြို့နယ်၊ အမှတ် (၂၅) ရပ်ကွက်၊ ပြည်ထောင်စု လမ်းရှိ မြန်မာလေကြောင်းမှ လက်ထောက် ကြီးကြပ်ရေးမှူး၏ နေအိမ်တွင် မတ်လ ၁၅ ရက် (တပေါင်း လပြည့်နေ့) ညနေ ၅ နာရီ ခန့်က မိသားစုများ ရွှေတိဂုံ ဘုရားဖူး သွားနေချိန် ကျပ်သိန်း ၃၀၀ ကျော်ဖိုး လက်ဝတ်ရတနာ ပစ္စည်းများ ဖောက်ထွင်း ခံရကြောင်း ရန်ကုန်တိုင်းဒေသကြီး ရဲတပ်ဖွဲ့မှူးရုံးမှ သိရှိရသည်။
အဆိုပါ အရာရှိနှင့် ၎င်း၏ မိသားစုဝင်များက ယင်းနေ့ နေ့လယ်ပိုင်းတွင် အိမ်တံခါး သော့ပိတ်ပြီး ရွှေတိဂုံ ဘုရားဖူး သွားခဲ့ပြီးနောက် အိမ်ပြန်ရောက်စဉ် နေအိမ် ခြေရင်းဘက်ရှိ ပြတင်းပေါက်၌ တပ်ဆင်ထားသော သံတိုင်၊ သံဆန်ခါများ ပျက်စီးလျက် ရှိပြီး အိပ်ခန်းအတွင်း ဗီရိုတွင် သိမ်းဆည်းထားသော ကျပ် ၃၀၂ သိန်းကျော်ရှိ လက်ဝတ် ရတနာ ပစ္စည်းများ ပျောက်ဆုံးနေကြောင်း ဒဂုံမြို့သစ် (တောင်ပိုင်း) မြို့မ ရဲစခန်းမှ ရဲအရာရှိ တစ်ဦးက ပြောကြားသည်။
အဆိုပါ ပျောက်ဆုံးခဲ့သော လက်ဝတ် ရတနာ ပစ္စည်းများမှာ စိန်စီထားသော နာရီ၊ ပတ္တမြား နားကပ်တစ်ရန်၊ စိန်နားကပ် တစ်ရန်၊ ရွှေအခေါက်တုံး တစ်တုံး၊ ရွှေဆွဲကြိုး၊ ရွှေနားကပ်၊ ရွှေနာရီ အပါအဝင် လက်ဝတ် ရတနာ ပစ္စည်း ၁၃ မျိုး ဖြစ်ကြောင်း ရန်ကုန်တိုင်း ဒေသကြီး ရဲတပ်ဖွဲ့မှူး ရုံးထံမှ သိရှိရသည်။
“ပြတင်းပေါက်က သံတိုင်ကို သံဖြတ်လွှနဲ့ ဖြတ်ပြီး အိမ်ထဲက ပစ္စည်းတွေ အကုန်လုံး မွှေနှောက်ရှာပြီးမှ တန်ဖိုးကြီး လက်ဝတ် လက်စားတွေကို ယူသွားတာ။ အိမ်ဖောက်ထွင်းမှုနှင့် ပတ်သက်ပြီး မသင်္ကာသူတွေကို ခေါ်စစ်ဆေးနေတယ်” ဟု ဒဂုံမြို့သစ် (တောင်ပိုင်း) မြို့မရဲစခန်းမှ ရဲအရာရှိ တစ်ဦးက ပြောကြားသည်။
သိန်းသုံးရာကျော် လက်ဝတ်ရတနာများ ဖောက်ထွင်းမှုနှင့် ပတ်သက်၍ ဒဂုံမြို့သစ် (တောင်ပိုင်း) မြို့မ ရဲစခန်းမှ (ပ)၂၃၉/၁၄၊ ပုဒ်မ ၃၈၀ ဖြင့် အမှုဖွင့်ကာ စုံစမ်းလျက် ရှိကြောင်း ရန်ကုန်တိုင်း ဒေသကြီး ရဲတပ်ဖွဲ့မှူး ရုံးထံမှ သိရသည်။

The Voice Weekly