မြောင်းမြမြို့တွင် ဘုန်းကြီးကျောင်းတစ်ကျောင်းရှိ ယောဂီဆောင်ပြုပြင်ရာမှ ပြိုကျပြီး တစ်ဦးသေ၊ တစ်ဦးဒဏ်ရာရ

ပို့စ်တင်ချိန် - 3/18/2014 01:14:00 PM

(မြောင်းမြမြို့ ကံကော်မြိုင်ရပ်ကွက် မြဂုဏ်ရည်လမ်းရှိ ပညာဇေယျုံ ဘုန်းကြီးကျောင်းဝင်းအတွင်း ပြိုကျခဲ့သော ယောဂီဆောင်အား တွေ့ရစဉ်)

မြောင်းမြမြို့ ကံကော်မြိုင်ရပ်ကွက် မြဂုဏ်ရည်လမ်းရှိ ပညာဇေယျုံ ဘုန်းကြီးကျောင်းဝင်းအတွင်း မတ် ၁၇ ရက်၊ မွန်းလွဲ ၁ နာရီ ၄၅ မိနစ်ခန့်က ပြုပြင်ဆဲ အမျိုးသားယောဂီနှင့် ဒုလ္လဘများ အဆောင်ပြိုကျရာမှ ပန်းရန်လုပ်သားတစ်ဦး ပွဲချင်းပြီး သေဆုံးပြီး တစ်ဦးပြင်းထန်စွာ ဒဏ်ရာရရှိခဲ့ကြောင်း သတင်းရရှိသည်။

ဖြစ်စဉ်မှာ အလျား ၅၁ ပေ၊ အနံ ၁၈ ပေ၊ အမြင့် ၁၅ ပေရှိ အဆိုပါအဆောက်အအုံပြုပြင်ရန်အတွက် ပန်းရန်လုပ်သားသုံးဦးမှ အဆောက်အအုံဘေးနံရံများကို ဖြိုဖျက်နေစဉ် မျက်နှာချင်းဆိုင်ရှိ အုတ်နံရံပြိုကျရာမှ ပန်းရန်လုပ်သားတစ်ဦးဖြစ်သူ သားချစ် (ဘ) ဦးဇော်ဝင်း အသက် (၁၆) နှစ်မှာ အုတ်နံရံများနှင့်ပိမိပြီး နေရာတွင် ပွဲချင်းပြီးသေဆုံးခဲ့ကြောင်း၊ ယင်းနှင့်အတူ အလုပ်လုပ်နေသူ မောင်အောင်ကို (ဘ) ဦးစိုးဝင်း အသက်(၁၈)နှစ်မှာ ဒဏ်ရာပြင်းထန်စွာရရှိခဲ့ပြီး မြောင်းမြဆေးရုံသို့ တင်ပို့ဆေးကုသလျက်ရှိပြီး အသက်အန္တရာယ် စိုးရိမ်ရကြောင်း သတင်းရရှိသည်။

ယင်းဖြစ်စဉ်နှင့်ပတ်သက်၍ မြောင်းမြရဲစခန်းက သွားရောက်စစ်ဆေးခဲ့ပြီး ဟောင်းနွမ်းအဆောက်အအုံပြုပြင်စဉ် မတော်တဆပြိုကျခဲ့မှု ဖြစ်ပွားခဲ့ကြောင်း ပေါ်လွင်ခြင်းကြောင့် သေမှုသေခင်း ရေးဖွင့်ဆောင်ရွက်လျက်ရှိကြောင်း သတင်းရရှိသည်။



Eleven Media Group