သမ္မတဦးသိန်းစိန်ဘာမှားခဲ့သလဲ

ပို့စ်တင်ချိန် - 3/26/2014 07:50:00 PM

သမ္မတဦးသိန်းစိန် ဦးဆောင်သော အစိုးရ တက်လာပြီးနောက် အဓိက လုပ်ဆောင်မည်ဟု ပြောထားသည့် ကဏ္ဍကြီးသုံးခုရှိသည်။ နိုင်ငံရေး ပြုပြင်ပြောင်းလဲမှု၊ စီးပွားရေး ပြုပြင်ပြောင်းလဲမှုနှင့် ပြည်တွင်းငြိမ်းချမ်းရေး တို့ဖြစ်သည်။ ထိုကဏ္ဍသုံးခုကို အကောင်အထည် ဖော်ဆောင်ရန် မှန်ကန်သည့် ဆုံးဖြတ်ချက်များ ချမှတ် နိုင်ခဲ့သည်ရှိသလို မှားယွင်းမှုများလည်း ရှိနေခဲ့သည်။ ထို့ကြောင့်လည်း အဆိုပါ ကဏ္ဍကြီးသုံးခုကို အကောင်အထည် ဖော်ရာတွင် မျှော်မှန်းထား သလောက် အောင်မြင်မှု မရခဲ့သေးပေ။

သမ္မတဦးသိန်းစိန် တက်လာပြီးနောက် အချိန်တိုအတွင်း မှန်ကန်သည့် လုပ်ဆောင်ချက်များလည်း ရှိခဲ့သည်။ မြစ်ဆုံစီမံကိန်းရပ်ဆိုင်းရန် ဆောင်ရွက်ခဲ့ခြင်း၊ နိုင်ငံရေးအကျဉ်းသားအားလုံးနီးပါး လွတ်ငြိမ်းခွင့်ပြုခဲ့ခြင်း၊ မီဒီယာလွတ်လပ်ခွင့်ပေးခဲ့ခြင်း၊ နိုင်ငံတကာပိတ်ဆို့မှုများ ဖယ်ရှားပေးရန် ဆောင်ရွက်နိုင်ခဲ့ခြင်း၊ ကုန်သွယ်ရေးလုပ်ငန်းများ လွယ်ကူလာရန် ဆောင်ရွက်ပေးခြင်း၊ ကားဈေးနှင့် ဖုန်းဆင်းမ်ကတ်များ ဈေးနှုန်းသက်သာရန် စသည်တို့ကို စွမ်းဆောင်နိုင်ခဲ့သည်။

သမ္မတဦးသိန်းစိန် ကျူးလွန်ခဲ့သော အမှားများထဲတွင် မကြာသေးမီက ပြည်ထောင်စုလွှတ်တော်နာယကထံသို့ ကိုးကွယ်ရာဘာသာပြောင်းခြင်းဆိုင်ရာဥပဒေ ၊လက်ထပ်ထိမ်းမြားခြင်းဆိုင်ရာဥပဒေ၊ တစ်လင်တစ်မယားစနစ် ကျင့်သုံးခြင်းဆိုင်ရာဥပဒေနှင့် လူဦးရေတိုးပွားနှုန်းထိန်းညှိခြင်းဆိုင်ရာဥပဒေ စသည့်ဥပဒေလေးခု လိုအပ်လျှင် ပြဋ္ဌာန်းပေးရန် သ၀ဏ်လွှာပေးပို့ခြင်းသည်လည်း မှားယွင်းသောကိစ္စဖြစ်ကြောင်း နိုင်ငံရေးလေ့လာသူများနှင့် တိုင်းရင်းသားခေါင်းဆောင်အချို့က သုံးသပ်ကြသည်။

‘‘အမျိုးဘာသာသာသနာဥပဒေပြဋ္ဌာန်းဖို့ သမ္မတဦးသိန်းစိန်လုပ်တာ အင်မတန်မှမှားတယ်လို့ ကျွန်တော်မြင်တယ်’’ဟု တစ်နိုင်ငံလုံး အပစ်အခတ်ရပ်စဲရေး ညှိနှိုင်းရေးအဖွဲ့မှ အကြံပေး ချင်းတိုင်းရင်းသားဖြစ်သူ ဒေါက်တာဆလိုင်းလျန်မှုန်းဆာခေါင်းက ဆိုသည်။

တိုင်းရင်းသားများအနေဖြင့် နှစ်ပေါင်း ၆၀ ကျော်ကြာ အစိုးရအား တော်လှန်တိုက်ခိုက်ခဲ့သည်မှာ မြန်မာနိုင်ငံမှ အမျိုးသားနိုင်ငံရေးလမ်းစဉ် ထူထောင်ခြင်းကြောင့်ဖြစ်သည်ဟု ၎င်းကပြောသည်။

 ပါလီမန်ဒီမိုကရေစီခေတ်တွင် ၀န်ကြီးချုပ်ဦးနုအနေဖြင့် မဲဆွယ်ရန် ဗုဒ္ဓဘာသာကို နိုင်ငံတော်ဘာသာအဖြစ် ဖွဲ့စည်းပုံအခြေခံဥပဒေတွင် ထည့်သွင်းခဲ့သည်။ ထိုအချက်ကို လွှတ်တော်က အတည်ပြုပေးခဲ့သဖြင့် ကချင်တိုင်းရင်းသားများနှင့် ချင်းတိုင်းရင်းသားများ တောခိုခဲ့ကြသည့် သမိုင်းဖြစ်ရပ်တစ်ခုရှိခဲ့သည်။ ယခုအချိန်ထိပင် ကေအိုင်အေနှင့် အပစ်အခတ်ရပ်စဲရေး သဘောတူညီမှု မရရှိသေးပေ။

မြန်မာနိုင်ငံအနေဖြင့် တိုင်းရင်းသားပေါင်းစုံဖြင့် ဖွဲ့စည်းထားသော ပြည်ထောင်စုမြန်မာနိုင်ငံဖြစ်ပြီး တိုင်းရင်းသားများထဲတွင် ကချင်၊ ချင်းနှင့် ကရင်တိုင်းရင်းသားအများစုမှာ ခရစ်ယာန်ဘာသာကိုးကွယ်ကြသူများဖြစ်သည်။

 အဆိုပါဥပဒေလေးခုအား သံဃာတော်များအပါအ၀င် ပြည်သူတစ်သန်းကျော်က ဥပဒေအဖြစ် ပြဋ္ဌာန်းပေးရန် နိုင်ငံတော်သမ္မတထံ ပေးပို့ခဲ့ခြင်းဖြစ်သည်။

သို့သော် အဆိုပါဥပဒေလေးခုမှာ လက်ရှိတည်ဆဲဥပဒေများတွင် ပြဋ္ဌာန်းပြီးသားဖြစ်သဖြင့် ထိုဥပဒေများတွင် ပြဋ္ဌာန်းထားသော အချက်အလက်များအား လိုက်နာဆောင်ရွက်ရန်သာလိုကြောင်း ဥပဒေပညာရှင်များကဆိုသည်။

‘‘၁၉၅၄ ခုနှစ် မြန်မာ့ဓလေ့ ထုံးတမ်းအစဉ်အလာဥပဒေဆိုတာ ဘယ်သူ့ကိုမှမထိပါးဘဲနဲ့ မြန်မာအမျိုးသမီးတွေရဲ့ လက်ထပ်ထိမ်းမြားခြင်းအတွက် အခွင့်အရေးကို အပြည့်အ၀ကာကွယ်ပေးထားတဲ့ ဥပဒေပဲ’’ဟု တရားလွှတ်တော်ရှေ့နေ ဦးသန်းစိုး(ထွန်း)ကဆိုသည်။ အလားတူ ၁၉၈၂ နိုင်ငံသားဥပဒေတွင်လည်း အချို့အချက်အလက်များပါဝင်သည်။

 ထို့ကြောင့် သမ္မတဦးသိန်းစိန်အနေဖြင့် အဆိုပါဥပဒေကြမ်းလေးခု ပြဋ္ဌာန်းပေးရန် လွှတ်တော်သို့ တင်ပြခြင်းသည် ယေဘုယျအားဖြင့် မလိုအပ်ကြောင်း ဦးသန်းစိုး(ထွန်း)က သုံးသပ်သည်။

သမ္မတဦးသိန်းစိန်အနေဖြင့် တိုင်းရင်းသားလက်နက်ကိုင်အဖွဲ့များနှင့် ငြိမ်းချမ်းရေးဆွေးနွေးရာတွင်လည်း တိုင်းရင်းသားလက်နက်ကိုင်အဖွဲ့ ၁၄ ဖွဲ့နှင့် အပစ်အခတ်ရပ်စဲရေး သဘောတူညီမှုရရှိပြီး ကချင်လွတ်လပ်ရေးအဖွဲ့ KIO နှင့် တအောင်းအမျိုးသား လွတ်မြောက်ရေးတပ်မတော်နှင့်မူ အပစ်အခတ်ရပ်စဲရေး သဘောတူညီမှုမရရှိသေးပေ။  အပစ်အခတ်ရပ်စဲရေး သဘောတူညီထားသည့် အဖွဲ့များနှင့်ပင် တိုက်ပွဲများ ပြန်လည်ဖြစ်ပွားမှုများ ရှိနေခဲ့သည်။

 ‘‘ဖြစ်သင့်တာက အရင်စကားပြောပြီးမှ သဘောတူလက်မှတ်ထိုးဖြစ်ရမှာ။ အခုတော့ အရင်လက်မှတ်ထိုးမယ်။ ပြီးမှ နိုင်ငံရေးစကားပြောမယ်ဆိုတော့ စကားပုံအနေနဲ့ ပြောမယ်ဆိုရင် နွားရှေ့ထွန်ကျူးပေါ့’’ဟု မြန်မာအရေးကျွမ်းကျင်သူ ဆွီဒင်နိုင်ငံသား ကမ္ဘာကျော်သတင်းစာဆရာ ဘာတေးလ်လင့်တနာကဆိုသည်။

 ယခင်တပ်မတော်အစိုးရ လက်ထက်တွင်လည်း တိုင်းရင်းသားလက်နက်ကိုင်အဖွဲ့များနှင့် အပစ်အခတ်ရပ်စဲရေး ဆောင်ရွက်နိုင်ခဲ့သော်လည်း နိုင်ငံရေးဆွေးနွေးပွဲများ မပြုလုပ်နိုင်ခဲ့သဖြင့် တိုက်ပွဲများပြန်လည်ဖြစ်ပွားခဲ့သည်။ ထို့ကြောင့်လည်း သမ္မတဦးသိန်းစိန်အနေဖြင့် တစ်နိုင်ငံလုံး အပစ်အခတ်ရပ်စဲရေး လက်မှတ်ရေးထိုးပြီးနောက် နိုင်ငံရေးဆွေးနွေးပွဲများ ပြုလုပ်ပေးမည် ပြောကြားနေသော်လည်း တိုင်းရင်းသားများအနေဖြင့် ယုံကြည်မှုနည်းနေသည်။

 အစိုးရနှင့် တိုင်းရင်းသားလက်နက်ကိုင်အဖွဲ့များ ချုပ်ဆိုရန်ပြင်ဆင်နေသော တစ်နိုင်ငံလုံး အပစ်အခတ်ရပ်စဲရေးစာချုပ်တွင် အပစ်အခတ်ရပ်စဲရေးပြီးနောက် နိုင်ငံရေးဆွေးနွေးပွဲများ ပြုလုပ်ပေးရန် အာမခံသည့် အချက်အလက်များကို တိုင်းရင်းသားများက ထည့်သွင်းရေးဆွဲနေသဖြင့် ယခုချိန်ထိပင် တစ်နိုင်ငံလုံး အပစ်အခတ်ရပ်စဲရေးမူကြမ်း တစ်ခုမရရှိသေးပေ။

အစိုးရအနေဖြင့် နိုင်ငံရေးသဘောတူညီမှုမရမီ တိုင်းရင်းသားဒေသများတွင် အပစ်အခတ်ရပ်စဲရေးနှင့် ဖွံ့ဖြိုးရေးလုပ်ငန်းများ တွဲလုပ်နေခြင်းသည် မှားယွင်းသော လုပ်ဆောင်ချက်တစ်ခု ဖြစ်ကြောင်းလည်း တိုင်းရင်းသားခေါင်းဆောင်အချို့က သုံးသပ်ကြသည်။

သမိုင်းကြောင်းအရ ကချင်လွတ်မြောက်ရေးအဖွဲ့ KIO နှင့် အပစ်အခတ်ရပ်စဲပြီးနောက် လမ်းများ၊ တံတားများ၊ စာသင်ကျောင်းများနှင့် ဆေးရုံများ တည်ဆောက်ခဲ့သည်။ သို့သော် နိုင်ငံရေးအရ သဘောတူညီမှုမရရှိ၍ တိုက်ပွဲပြန်လည်ဖြစ်ပွားသဖြင့် တံတားများ၊ လမ်းများအား မိုင်းထောင်ဖောက်ခွဲဖျက်ဆီးခဲ့ရပြီး ဆေးရုံနှင့် စာသင်ကျောင်းများ ပစ်ထားခဲ့ရသည့် သာဓကများလည်းရှိခဲ့သည်။

‘‘ငြိမ်းချမ်းရေးမှာ နိုင်ငံရေးဆွေးနွေးပွဲကို ပထမအဆင့်ထားပြီး လုပ်ရမယ့်အစား အပစ်အခတ်ရပ်စဲရေး တစ်နိုင်ငံလုံး အပစ်အခတ်ရပ်စဲရေးကို ဦးစားပေးလိုက်တာမှားတယ်’’ဟု နိုင်ငံရေးလေ့လာသူ ဦးဇာဂနာကသုံးသပ်သည်။

တိုင်းရင်းသားများနှင့် ငြိမ်းချမ်းရေးဆွေးနွေးရာတွင် လိုအပ်ချက်များ မှားယွင်းမှုများရှိသလို တရားဥပဒေစိုးမိုးရေး ဆောင်ရွက်ခြင်း အကျင့်ပျက်ခြစားမှုတိုက်ဖျက်ရေး၊ လာဘ်ပေးလာဘ်ယူ တိုက်ဖျက်ရေးနှင့် သိမ်းဆည်းခံလယ်မြေပြဿနာများ ဖြေရှင်းခြင်းတွင် အားနည်းမှုများ၊ မှားယွင်းမှုများရှိကြောင်းလည်း ဝေဖန်မှုများရှိသည်။

 ‘‘သမ္မတအနေနဲ့ ကျန်တဲ့ ဒုသမ္မတတွေ၊ ဝန်ကြီးတွေ၊ တိုင်းဒေသကြီးနဲ့ ပြည်နယ်ဝန်ကြီးချုပ်တွေကို ခန့်ပြီးတဲ့အချိန်ကစပြီး ငါတို့တွေ လစာအလုံအလောက်ရတဲ့အတွက် ငါတို့ သန့်ရှင်းအောင်လုပ်ကြမယ်။ တစ်ပြားတစ်ချပ်မှ မယူဘူးဆိုပြီး ကျမ်းသစ္စာဆိုလိုက်ရမှာ’’ဟု ရှမ်းတိုင်းရင်းသားများ ဒီမိုကရက်တစ်ပါတီမှ ပြည်သူ့လွှတ်တော်အမတ် ဦးရဲထွန်းကဆိုသည်။

အစိုးရအဖွဲ့ ပိုင်ဆိုင်မှုများကြေညာရမည့် အစီအစဉ်ကို သမ္မတက မလုပ်ခဲ့ဘဲ လာဘ်ပေးလာဘ်ယူအတွက် ကော်မတီ၊ ကော်မရှင်များ မကြာခဏ ဖွဲ့စည်းခဲ့သော်လည်း သုံးနှစ်တာကာလအတွင်း ထိရောက်စွာ လုပ်ကိုင်နိုင်ခဲ့ခြင်းမရှိပေ။

သမ္မတဦးသိန်းစိန် ဦးဆောင်သော အစိုးရအဖွဲ့ တက်လာပြီးနောက် လယ်ယာမြေသိမ်းဆည်းသည့် ပြဿနာများမှာ မြန်မာနိုင်ငံအနှံ့တွင် ဖြစ်ပွားခဲ့သည်။ အဆိုပါပြဿနာ ဖြေရှင်းရန် လွှတ်တော်မှ ကော်မတီတစ်ရပ် ဖွဲ့စည်း၍ ဆောင်ရွက်ခဲ့သော်လည်း သမ္မတဦးသိန်းစိန်အနေဖြင့် ထိုကိစ္စအား ထိထိရောက်ရောက် ဆောင်ရွက်ပေးနိုင်ခဲ့ခြင်းမရှိပေ။

နိုင်ငံရေးနှင့် ငြိမ်းချမ်းရေးပိုင်းတွင် မှားယွင်းသော လုပ်ဆောင်မှုများရှိနေသလို စီးပွားရေးပြုပြင်ပြောင်းလဲရေး လုပ်ဆောင်ရာတွင်လည်း မှားယွင်းသော လုပ်ဆောင်ချက်များရှိနေသည်ဟု စီးပွားရေးပညာရှင်များနှင့် စီးပွားရေးလုပ်ငန်းရှင်များက သုံးသပ်ကြသည်။

အထူးသဖြင့် စီးပွားရေးတွင် ခရိုနီချယ်လှယ်မှုအား မတွန်းလှန်နိုင်သေးခြင်း သမ္မတအနားတွင်ရှိသော စီးပွားရေးနှင့်ပတ်သက်၍ အကြံပြုနေသူများမှာလည်း ကိုယ်ကျိုးစီးပွားအတွက်သာ အဓိကလုပ်ဆောင်နေကြကြောင်း ဝေဖန်ထောက်ပြကြသည်။

‘‘အစိုးရရဲ့ စီးပွားရေးပြုပြင်ပြောင်းလဲမှုက အရမ်းကိုမြန်လွန်းနေတယ်။ ပြီးတော့ အကောင်အထည်ဖော်တဲ့ပုံစံတွေကလည်း ဦးတည်ချက်သိပ်မရှိဘဲ ရှိသမျှအားလုံး လိုက်လုပ်နေတော့ အဲဒါက ပြဿနာဖြစ်နေတယ်’’ဟု နိုင်ငံတော်သမ္မတ၏ စီးပွားရေးအကြံပေးအဖွဲ့ခေါင်းဆောင် ဒေါက်တာဦးမြင့်ကသုံးသပ်သည်။

နှစ်ပေါင်း ၅၀ နီးပါး အဆင်မပြေဖြစ်ခဲ့သော မြန်မာ့စီးပွားရေးကို အချိန်တိုအတွင်း ဆောင်ရွက်ရန်မှာ မဖြစ်နိုင်ကြောင်း ဒေါက်တာဦးမြင့်ကဆိုသည်။

‘‘စီးပွားရေးမှာ အိုင်တီကိုမဖွံ့ဖြိုးအောင် လုပ်ထားတာပဲ။ အိုင်တီမဖွံ့ဖြိုးတော့ ငွေကြေးကဏ္ဍက မဖွံ့ဖြိုးတော့ဘူး။ အကြောက်တရားကို ရှေ့တန်းမှာထားနေရင် စီးပွားရေးမဖွံ့ဖြိုးနိုင်ဘူး’’ဟု ဘဏ်ပညာရှင်တစ်ဦးဖြစ်သူ ဦးမျိုးဦးကဆိုသည်။

ထိုကဲ့သို့ မှားယွင်းမှုများမှာ သမ္မတအနီးအနားတွင် ရှိနေသူများနှင့် သမ္မတအကြံပေးအဖွဲ့ဝင်များ၏ အားနည်းချက်ကြောင့် ဖြစ်ကြောင်းလည်း နိုင်ငံရေးလေ့လာသူများက သုံးသပ်ကြသည်။

သမ္မတအနီးအနားတွင် ရှိသူများနှင့် သမ္မတအကြံပေးအများစုမှာ သူတို့အာဏာ ဆက်လက်တည်တံ့ရေးအတွက် သမ္မတဦးသိန်းစိန်အား နောက်ရွေးကောက်ပွဲတွင် ဆက်လက်ယှဉ်ပြိုင်စေလိုသဖြင့် နိုင်ငံဖွံ့ဖြိုးရေးထက် မဲရရှိရေးကိုသာ ဦးစားပေးနေကြကြောင်း သုံးသပ်သူအချို့ကဆိုသည်။

‘‘အကြံပေးအဖွဲ့တွေ ဖွဲ့ထားပေမယ့် အဲဒီအဖွဲ့တွေရဲ့ လုပ်ရည်ကိုင်ရည်ပိုင်း၊ အောက်ခြေနဲ့ ထိတွေ့ဆက်ဆံနိုင်မှုအပိုင်းတွေမှာ အားနည်းလွန်းတာကို တွေ့ရပါတယ်။ နောက် သမ္မတကိုယ်တိုင်ကလည်း ဆုံးဖြတ်ချက်တွေချတဲ့နေရာမှာ အတော်အားနည်းတာကို တွေ့ရပါတယ်’’ဟု ဒေါက်တာရန်မျိုးသိမ်း (မြန်မာ့နိုင်ငံရေး သုံးသပ်ဆောင်းပါးများ ရေးသားသူ)က သုံးသပ်သည်။

ရွေးကောက်ပွဲနီးလာသည်နှင့် သမ္မတဦးသိန်းစိန်မှာ ပြုပြင်ပြောင်းလဲရေးသမားနှင့် မတူတော့ပဲ နိုင်ငံရေးသမားပုံစံ ပေါက်လာသည်ဟုလည်း နိုင်ငံတကာ ဥပဒေပညာရှင်တစ်ဦးက သုံးသပ်သည်။

သမ္မတဦးသိန်းစိန် ဦးဆောင်သော အစိုးရအဖွဲ့တက်လာသည့် ရက်ပိုင်းအတွင်း သုံးနှစ်ပြည့်တော့မည်ဖြစ်သဖြင့် မြန်မာ့နိုင်ငံရေးအခြေအနေမှာ ဟန်နီးမွန်းကာလ ပြီးဆုံးသွားခဲ့လေပြီ။ ရှေ့လာမည့်ကာလများတွင် မှန်ကန်သည့်လုပ်ဆောင်ချက်များ မပြုလုပ်နိုင်ပါက အခက်အခဲများ စိန်ခေါ်မှုများနှင့် ရင်ဆိုင်ရဖွယ်ရှိသည်။

ထို့ကြောင့် နိုင်ငံတော်သမ္မတ၏ စီးပွားရေးအကြံပေး အဖွဲ့ခေါင်းဆောင် ဒေါက်တာဦးမြင့်က ‘‘အမှားလုပ်မိမှာကို မကြောက်နဲ့ အရေးကြီးတာက မှန်တာတွေက မှားတာတွေထက် ပိုများဖို့လိုတယ်’’ဟု အကြံပြုသည်။

အောင်သူရ
7Day News Journal  အတွဲ (၁၃)၊ အမှတ်(၄)