လွှတ်တော်အမတ်များ ခွင့်ယူပျက်ကွက်မှုများနေခြင်း ပါတီများက ထိန်းကျောင်းရန် ပြည်ထောင်စုလွှတ်တော်နာယက သတိပေး ပြောကြား
ပို့စ်တင်ချိန်
- 3/06/2014 07:53:00 PM
ပြည်ထောင်စုလွှတ်တော် အစည်းအဝေး ကျင်းပနေစဉ် ဓာတ်ပုံ − ဂျေမောင်မောင် (အမရပူရ)
ခွင့်ယူပျက်ကွက်သည့် လွှတ်တော်ကိုယ်စားလှယ် များပြားနေမှုကို သက်ဆိုင်ရာပါတီများက ထိန်းကျောင်းကြရန် ပြည်ထောင်စုလွှတ်တော် နာယက သူရဦးရွှေမန်းက သတိပေးပြောကြားလိုက်သည်။
မတ် ၄ ရက်က ပြုလုပ်သည့် ပြည်ထောင်စုလွှတ်တော်အစည်းအဝေးတွင် ခွင့်ယူပျက်ကွက်သူ တစ်ရာကျော်ရှိသဖြင့် ပြည်ထောင်စုလွှတ်တော်နာယကက သတိပေး ပြောကြားခဲ့ခြင်းဖြစ်သည်။
‘‘အစည်းအဝေးတက်ရောက်လာတဲ့ ကိုယ်စားလှယ်တွေရှေ့မှာ ပြောရတာဖြစ်ပေမယ့် မတက်ရောက်တဲ့ လွှတ်တော်ကိုယ်စားလှယ်တွေကို အဓိက ရည်ညွှန်းပြောဆိုခြင်း ဖြစ်ပါတယ်။ အစည်းအဝေးမတက်ရောက်တဲ့ လွှတ်တော်ကိုယ်စားလှယ်များကို သက်ဆိုင်ရာပါတီအသီးသီးက အသိပေးဆောင်ရွက်ဖို့လိုပါတယ်’’ဟု သူရဦးရွှေမန်းကဆိုသည်။
ပြည်ထောင်စုလွှတ်တော်အစည်းအဝေးတွင် အရေးကြီးဥပဒေကြမ်းများဖြစ်သည့် စီမံကိန်း အရအသုံးဆိုင်ရာဥပဒေကြမ်း၊ အခွန်အကောက်ဆိုင်ရာ ဥပဒေကြမ်း၊ ကုန်သွယ်လုပ်ငန်းခွန်ဥပဒေကြမ်း စသည့် ဥပဒေများ မဲခွဲဆုံးဖြတ်ရာတွင် ပြည်သူ့ကိုယ်စားလှယ်များအနေဖြင့် ဆန္ဒမဲပေးနိုင်ကြရန် လိုသော်လည်း အစည်းအဝေး ပျက်ကွက်သူများနေသဖြင့် အခက်အခဲဖြစ်လာနိုင်ကြောင်း လွှတ်တော်နာယကကဆိုသည်။
‘‘အခုနောက်ပိုင်း အစည်းအဝေးတွေက ကြာလာလို့လားမသိဘူး။ ပျက်တဲ့သူတွေများလာတယ်။ ဒီလိုပျက်ကွက်တာများလာရင် မဲခွဲဆုံးဖြတ်တဲ့နေရာမှာ ကွဲလွဲမှုတွေဖြစ်လာနိုင်တယ်။ ဆိုလိုတာက တပ်မတော်သား ကိုယ်စားလှယ်တွေက ပျက်ကွက်တာနည်းတယ်လေ။ သူတို့နဲ့ သဘောကွဲလွဲတဲ့အချက်တွေဆိုရင် ဒီဘက်ကလည်း ပျက်တဲ့သူများရင် ကျွန်တော်တို့ ရှုံးသွားနိုင်တယ်’’ဟု ပြည်ထောင်စုလွှတ်တော်ကိုယ်စားလှယ်တစ်ဦးက ပြောကြားသည်။
မတ် ၄ ရက် ပြည်ထောင်စုလွှတ်တော်အစည်းအဝေးတွင် တက်ရောက်ခွင့်ရှိသူ ၆၄၀ ဦး အနက် ၄၄၄ ဦးသာ တက်ရောက်ခဲ့ပြီး ၁၉၆ ဦးမှာ ခွင့်တိုင်ကြား ပျက်ကွက်ခဲ့သည်။ ရာခိုင်နှုန်းအားဖြင့် ၆၉ ဒသမ ၃၈ ရာခိုင်နှုန်းသာရှိပြီး လွှတ်တော်အစည်းအဝေးသက်တမ်းတစ်လျှောက် အစည်းအဝေးတက်ရောက်မှုအနည်းဆုံးရက်များတွင် ပါဝင်ခဲ့သည်။
7 Day Daily
