၁၆ မိုင်စစ်ဆေးရေးဂိတ်တွင် တရုတ်ပို့မည့် အဆိပ်ပြင်းမြွေကောင်ရေ ၃၀၀ နီးပါးနှင့် ကျောက်စိမ်းတုံးများ ဖမ်းမိ

ပို့စ်တင်ချိန် - 3/26/2014 07:59:00 PM

မန္တလေး၊ မတ် ၂၅

မန္တလေးတိုင်းဒေသကြီး ပုသိမ်ကြီးမြို့နယ် အုန်းချောကျေးရွာ ၁၆ မိုင် စစ်ဆေးရေးဂိတ်တွင် မတ်လ ၂၄ ရက်နေ့ တစ်ရက်အတွင်း တရုတ်ပြည်သူ့ သမ္မတနိုင်ငံသို့ တင်ပို့မည့် အဆိပ်ပြင်း မြွေအကောင်ရေ ၃၀၀ နီးပါးနှင့် ကျပ်သိန်း ၄၀ ကျော် တန်ဖိုးရှိ ကျောက်စိမ်းတုံးများ ဖမ်းဆီးရမိခဲ့ကြောင်း အုန်းချောမြို့နယ် ရဲတပ်ဖွဲ့စခန်း တာဝန်ရှိသူတစ်ဦးက ပြောကြားသည်။

ယင်းနေ့က စဥ့်ကိုင်မြို့နယ် ပလိပ်မှ တရုတ်နိုင်ငံဘက်သို့ သွားရောက်မည့် မတ်တူးအဖြူရောင် ကားတစ်စီးကို ၁၆ မိုင် စစ်ဆေးရေးဂိတ်တွင် စစ်ဆေးရာ ယာဉ်ပေါ်တွင် အဝတ်စဖြင့် ချုပ်ထားသည့် အထုပ် ၁၄ ထုပ်အတွင်းမှ လင်းမြွေ ၉၉ ကောင် (အရှင် ၈၄၊ အသေ ၁၅)၊ မြွေပွေး ၁၅၉ ကောင် (အရှင် ၁၂၉၊ အသေ ၃၀)၊ မြွေဟောက် ၃၆ ကောင် (အရှင်) တို့ကို ဖမ်းဆီးရမိခဲ့ကြောင်း အဆိုပါ ရဲတပ်ဖွဲ့စခန်း မှတ်တမ်းများအရ သိရသည်။

အဆိုပါ ဖမ်းဆီးရမိသော မြွေများ၏ ကာလပေါက်ဈေးများမှာ လင်းမြွေ တစ်ကောင်လျှင် ၁၀၀၀ ကျပ်နှုန်းဖြင့် ၉၉,၀၀၀ ကျပ်၊ မြွေပွေးတစ်ကောင်လျှင် ၇၀၀ ကျပ်နှုန်းဖြင့် ၁၁၁,၃၀၀ ကျပ်၊ မြွေဟောက် တစ်ကောင်လျှင် ၁၀၀၀ ကျပ်နှုန်းဖြင့် ၃၆,၀၀၀ ကျပ် အသီးသီး ပေါက်ဈေးရှိကြောင်း အဆိုပါ ရဲတပ်ဖွဲ့မှူးရုံးထံမှ ထပ်မံသိရှိရသည်။

အဆိုပါမြွေများကို သယ်ဆောင်လာသည့် ယာဉ်မောင်းကို အုန်းချောမြို့နယ် မြို့မရဲတပ်ဖွဲ့စခန်းတွင် (ပ) ၇၁/၂၀၁၄ အရအမှုဖွင့်ကာ တောရိုင်း တိရစ္ဆာန်နှင့် သဘာဝအပင်များ ထိန်းသိမ်း ကာကွယ်ရေး ဥပဒေပုဒ်မ ၃၆ (က)/၃၇(က) အရ ထပ်မံအမှုဖွင့် ဖမ်းဆီးစစ်ဆေးလျက်ရှိပြီး ဖမ်းဆီးရမိသော မြွေများကို မန္တလေးရတနာပုံ တိရစ္ဆာန် ဥယျာဉ်သို့ ပို့ဆောင်ထားကြောင်း ကျောက်စိမ်းတုံး ကျပ်သိန်း ၄၀ ကျော်ဖိုး ဖမ်းမိခြင်းနှင့် ပတ်သက်၍ အဆိုပါ ယာဉ်မောင်းကို အုန်းချောမြို့နယ် မြို့မရဲစခန်းက (ပ) ၇၂/၂၀၁၄ ကျောက်မျက်ပုဒ်မ ၄၂ (က) အရ အမှုဖွင့် စစ်ဆေးလျက် ရှိကြောင်း မန္တလေးတိုင်းဒေသကြီး ရဲတပ်ဖွဲ့မှူးရုံး တာဝန်ရှိသူတစ်ဦးက ပြောကြားသည်။

The Voice Weekly