သာကေတမြို့နယ်တွင် ခိုက်ရန်ဖြစ်ပွားကာ ဓါးဖြင့်ထိုးခဲ့၍ (၁)ဦးသေ၊ (၂)ဦးဒဏ်ရာရ

ပို့စ်တင်ချိန် - 3/13/2014 11:31:00 PM

ရန်ကုန်၊ မတ် ၁၃

၁၂.၃.၂၀၁၄ ရက်နေ့ ၂၃၃၀ အချိန်ခန့်တွင် တာမွေမြို့နယ်နေ ကိုကျော်ထင်ဦးသည် သာကေတမြို့နယ်ရှိ အလူမီနီယံလုပ်ငန်း၌ အတူလုပ်ကိုင်ကြသည့် သူငယ်ချင်းများဖြစ်ကြသော ၀င်းထက်အောင်၊ သီဟ၊ ချစ်စမ်းမောင်၊ ဝေယံစိုး၊ ဘိုတိုးတို့နှင့်အတူ သာကေတမြို့နယ် ရန်ပြေထိပ်အနီးရှိ အရက်ဆိုင်တွင် အတူအရက်သောက်ခဲ့ကြပြီး
ပြန်လာခဲ့ကြကြောင်း၊ ထိုသို့ပြန်လာကြစဉ် ၀င်းထက်အောင်မှာ
နောက်တွင်ကျန်နေခဲ့ပြီး ချစ်စမ်းမောင်ထံသို့ဖုန်းဆက်ကာစောင့်နေရန် ဆဲဆိုပြောသဖြင့် ချစ်စမ်းမောင်မှလည်း ဖုန်းဖြင့်ပြန်ဆဲခဲ့ကြောင်း၊ ထိုကဲ့သို့ချစ်စမ်းမောင်မှ အချင်းချင်း ဆဲဆိုကာပြောသည်ကို အနီးရှိလမ်းဘေးတွင်ထိုင်နေကြသော အမျိုးသားတစ်ဦးနှင့် အမျိုးသမီး တစ်ဦး တို့က ၎င်းတို့ကိုဆဲသည်ဟုထင်ကာ နှစ်ဖက်စကားများကြစဉ် အမျိုးသား(၂)ဦးထပ်မံရောက်ရှိလာပြီး ချစ်စမ်းမောင်အား လက်သီးဖြင့် ၀ိုင်းဝန်းထိုးကြိတ်ခဲ့ကြကြောင်း၊ ထိုစဉ်၎င်းလူများထံ၌်ဓါးပါကြောင်း
တွေ့ရ၍ ထွက်ပြေးခဲ့စဉ် ချစ်စမ်းမောင်မှာလဲကျကျန်နေခဲ့သဖြင့် သွားရောက်တွဲခေါ်ရာ ယာပခုံးရှေ့ နှင့်ယာလက်ပြင်တို့တွင် ပြတ်ရှ ဒဏ်ရာ(၁)ချက်စီရရှိထားသည်ကိုတွေ့ရ၍ အလုပ်လုပ်ကိုင်ရာ
အလူမီနီယံဆိုင်သို့ပိုထားခဲ့ကြောင်း၊ ပြီးနောက် ၀င်းထက်အောင်ရှိရာ ရန်ပြေ(၂၂)လမ်းထိပ်သို့သွားကြည့်သည့်အခါ လမ်းပေါ်တွင် ဝေယံစိုးမှာ ရင်ဘတ်၌ ထိုးသွင်းဒဏ်ရာဖြင့် လဲကျသေဆုံးနေသည်ကိုတွေ့ရပြီး၊ ၀င်းထက်အောင်တွင်လည်း ခါးတွင်ထိုးသွင်းဒဏ်ရာရရှိထားသည်ကို
တွေ့ရှိရကြောင်း၊ ဒဏ်ရာရသူ ချစ်စမ်းမောင်နှင့် ၀င်းထက်အောင်တို့အား ရန်ကုန်ဆေးရုံကြီးသို့ပို့အပ်ကုသခဲ့ရာ ချစ်စမ်းမောင်မှာ အတွင်းလူနာ (စိုးရိမ်ရ)အဖြစ်လည်းကောင်း၊ ၀င်းထက်အောင်မှာ ပြင်ပလူနာအဖြစ် လည်းကောင်း ကုသမှုခံယူခဲ့ရကြောင်းနှင့် ယင်းကဲ့သို့ပြစ်မှုကျူးလွန်ခဲ့သူ များကို စုံစမ်းအရေးယူပေးပါရန် ကိုကျော်ထင်ဦးမှတိုင်တန်းခဲ့သဖြင့် သာကေတမြို့မရဲစခန်း(ပ)၁၁၃/၂၀၁၄၊ ပုဒ်မ ၃၀၂/ ၃၂၆/၁၁၄ ဖြင့် အမှုဖွင့်ကာ ပြစ်မှုကျူးလွန်သူများကို ဖော်ထုတ်ဖမ်းဆီးရမိရေး
ဆောင်ရွက်လျက်ရှိကြောင်း သတင်းရရှိပါသည်။

Yangon Police