ရင်နင့်စာ

ပို့စ်တင်ချိန် - 3/19/2014 04:56:00 PM

ရေးသားသူ- ငြိမ်းချမ်း

‘‘(၁) အမေကို အိမ်နဲ့ခြံနဲ့ထားချင်တယ်။ (၂) ငါလဲ ကိုအိုးကိုအိမ်နဲ့ အေးအေးချမ်းချမ်းနေချင်တယ်။ ဒါကြောက် ငွေရှာမှဖြစ်မယ် ငွေရှိမှလဲ လုပ်ချင်တာကို လုပ်လိုရမှာဖြစ် ငွေကိုရအောင်ရှာရမယ်’’
(မူရင်းစာလုံးပေါင်းအတိုင်းသာ ဖြစ်ပါသည်။)

၂၀၁၃ နိုဝင်ဘာ ၂၄ ရက်က သမီးဖြစ်သူ နှင်းကေခိုင် ရေးသားထားသောစာကို မိခင်ဖြစ်သူ ဒေါ်အေးကြွယ်ဖတ်လိုက်ရသည့်နေ့က သမီးသေဆုံးပြီး ခြောက်ရက်အကြာ ၂၀၁၄ မတ်လ ၄ ရက်နေ့ပင်။

ခုနစ်နှစ်အရွယ်ကတည်းက ကွဲကွာသွားသောသမီးကို ဒေါ်အေးကြွယ်တွေ့လိုက်ရသည်က အသက်(၂၉)နှစ်အရွယ် သမီးငယ်နှင်းကေခိုင် ပြိုကျနေသော အုတ်ပုံကြား သေဆုံးနေသည့်ဓာတ်ပုံသာဖြစ်သည်။

မိခင်ဖြစ်သူဒေါ်အေးကြွယ်နှင့်အတူ နေထိုင်လိုသူ နှင်းကေခိုင်သည် ထိုင်းနိုင်ငံရှိ အီတာလျံထိုင်း ဆောက်လုပ်ရေးလုပ်ငန်းခွင် အဆောက်အအုံပြိုကျမှုကြောင့် သေဆုံးသူ ၁၅ ဦးအနက် တစ်ဦးဖြစ်သည်။ ဖေဖော်ဝါရီလ ၂၆ ရက်တွင် နှင်းကေခိုင် သေဆုံးရခြင်းဖြစ်သည်။

‘‘အုတ်ပုံကြားက သမီးအလောင်းဓာတ်ပုံကိုမြင်တော့ ကျွန်မသမီးမှန်း ချက်ချင်းသိတယ်’’ဟု သမီးဖြစ်သူ၏ ပတ်စပို့စာအုပ်ကိုကြည့်ကာ ဒေါ်အေးကြွယ်က ငိုရင်းပြောသည်။

နှင်းကေခိုင်ခုနစ်နှစ်အရွယ်တွင် မိခင်ဒေါ်အေးကြွယ်၏ သူငယ်ချင်းတစ်ယောက်က ရန်ကုန်မြို့ရှစ်မိုင်ရှိ ဒေါ်အေးကြွယ်၏ ညီမတစ်ဝမ်းကွဲထံ ပို့ပေးခဲ့သည်။ အဒေါ်ဝမ်းကွဲဖြစ်သူထံတွင် ကလေးအပ်ထားသည်ကို ဒေါ်အေးကြွယ်အား အသိမပေးခဲ့သဖြင့် ကလေးပျောက်ပါသည်ဟူ၍သာ နှင်းကေခိုင်မိခင်က သိထားခဲ့သည်။ နောက်ခုနစ်နှစ်အကြာ နှင်းကေခိုင် (၁၅)နှစ်အရွယ်ရောက်မှ သမီးဖြစ်သူသတင်းကို ကြားသဖြင့် ရှစ်မိုင်အဒေါ်အိမ်မှ သမီးကိုပြန်ခေါ်ပြီး သုံးနှစ်ခန့်အတူနေခဲ့သည်ဟု အသက် (၆၄)နှစ်အရွယ် ဒေါ်အေးကြွယ်ကပြောသည်။ သုံးနှစ်ခန့်အတူနေရင်း ဆင်းဆင်းရဲရဲနေထိုင်ရခြင်းကို မမြင်ရက်သဖြင့် ရှစ်မိုင်အဒေါ်အိမ်သို့ ပြန်ပို့ခဲ့သည်။ အဒေါ်ဝမ်းကွဲနေအိမ်တွင် စိတ်ချလက်ချထားခဲ့ပြီး သားအမိနှစ်ယောက် အဆက်အသွယ်ပြတ်နေခဲ့သည်။ ယခုကဲ့သို့ သမီးဆုံးသွားကြောင်း သတင်းရမှသာ ထိုင်းနိုင်ငံသို့ရောက်ရှိနေကြောင်း သိရှိခဲ့ရသည်ဟုဆိုသည်။ နှင်းကေခိုင်၏ အဒေါ်က ထိုင်းနိုင်ငံသို့ ပို့ဆောင်ခဲ့ခြင်းဖြစ်သည်။ နှင်းကေခိုင် (၂)နှစ်သမီးအရွယ်တွင် ၎င်းဖခင်သေဆုံးသွားပြီးနောက် ဒုတိယတန်းထိသာ ပညာသင်ပေးခဲ့ကြောင်း ဒေါ်အေးကြွယ်ကဆိုသည်။

‘‘ကျွန်မသိရင် သူများနိုင်ငံကိုမပို့ပါဘူး။ အတူတူကို ကောင်းကောင်းမနေရသေးဘူး။ သူသေသွားတယ်’’ဟု ဒေါ်အေးကြွယ်ကပြောသည်။

ပြီးခဲ့သည့်နှစ်အတွင်းက ထိုင်းနိုင်ငံတွင် အလုပ်လုပ်ရင်း ပျောက်ဆုံးနေသည့်မိခင်ကို ရှာဖွေရင်း အသတ်ခံရသည့် အမျိုးသမီးတစ်ယောက်အကြောင်း မီဒီယာများတွင် ရေးသားခဲ့ဖူးသည်။

၂၀၁၃ ဧပြီ ၁၃ ရက်တွင် ထိုင်းနိုင်ငံ၌ အသတ်ခံလိုက်ရသော မမြင့်မြင့်အေးသည် မိခင်ဖြစ်သူကိုတွေ့ဖူးချင်၍ အမေပျောက်ရှာဖွေနေသူဖြစ်သည်။ ၎င်းမသေဆုံးမီ ၁၀ ရက်အလိုက သင်္ကြန်အလုပ်ပိတ်ရက်ဖြစ်၍ မိခင်အိမ်ထံပြန်ချင်ကြောင်း၊ ထို့ကြောင့် အမေကိုလိုက်ရှာနေကြောင်း စသည့်စာများကိုရေးသား၍ အမေပျောက်လိုက်ရှာရင်း ထိုင်းနိုင်ငံတွင် အသတ်ခံခဲ့ရသူဖြစ်သည်။

နှင်းကေခိုင်သည် ထိုင်းနိုင်ငံသို့ရောက်ရှိပြီး ကိုသက်မောင်မောင်ဆိုသူနှင့် အိမ်ထောင်ကျခဲ့သည်မှာ တစ်နှစ်ခွဲခန့်ပင်ကြာပြီဖြစ်ကြောင်း နှင်းကေခိုင်သေဆုံးမှုနှင့်ပတ်သက်၍ ကူညီစောင့်ရှောက်ပေးခဲ့ပြီး ထိုင်းနိုင်ငံရောက် မြန်မာလုပ်သားများအား ကူညီပေးနေသော မဦးကပြောသည်။ နှင်းကေခိုင်သည် ၎င်း၏မိခင် ဒေါ်အေးကြွယ် မင်္ဂလာဒုံမြို့နယ်တွင် နေထိုင်နေသည်ဟုသာသိရှိပြီး နေရပ်လိပ်စာကို တိတိပပမသိရှိပေ။

ဒေါ်အေးကြွယ်တွင် နောက်ထပ်သားတစ်ယောက်ရှိကာ အလွန်ဆိုးသွမ်းသောကြောင့် ပစ်ထားခဲ့သည်မှာ ဆယ်နှစ်ခန့်ရှိနေပြီး ယခုအခါ သူ၏သား ဘယ်ဆီရောက်နေသည်ကို ဒေါ်အေးကြွယ် မသိရှိပေ။ ခင်ပွန်းဖြစ်သူသေဆုံးပြီး သမီးဖြစ်သူနှင့် ထပ်မံကွဲကွာရာ သားဖြစ်သူနှင့်ပါ ကွဲကွာနေသော ဒေါ်အေးကြွယ်သည် မင်္ဂလာဒုံမြို့နယ် ရှမ်းကြီးဝရပ်ကွက်ရှိ ကျောင်းဆရာမတစ်ဦး၏အိမ်တွင် အိမ်ဖော်လုပ်ကိုင်နေသည်။

နွေရာသီကျောင်းပိတ်ရက်များတွင် အဆိုပါ ကျောင်းဆရာမအိမ်၌မနေဘဲ ရပ်ကွက်အတွင်းရှိ အိမ်များတွင် အ၀တ်လျှော်ခြင်း၊ ထမင်းဟင်းချက်ခြင်းဖြင့် သူ့တစ်ဝမ်းတစ်ခါးအတွက် ရှာဖွေစားသောက်ဖြေရှင်းနေခြင်းဖြစ်သည်။

‘‘ကျောင်းပိတ်ရက်ဆိုတော့ အလုပ်လည်းသိပ်မရှိတော့ ဆရာမအိမ်မှာမနေတော့ဘူး။ သူများအိမ်တွေမှာ လိုက်ပြီးနေတယ်။ ကျောင်းတွေပြန်ဖွင့်မှ ဆရာမအိမ်ကိုပြန်သွားတယ်’’ဟု ပြောသည်။ ဒေါ်အေးကြွယ် ယခုလို အသက်မွေးဝမ်းကျောင်း ပြုလုပ်နေသည်မှာ ၁၀ နှစ်ဝန်းကျင်ခန့် ရှိနေပြီဖြစ်သည်။

ဆောက်လုပ်ရေးကုမ္ပဏီက လျော်ကြေးငွေ ဘတ်တစ်သိန်းပေးမည်ဟုပြောဆို၍ နှင်းကေခိုင်၏နာရေးကို ကူညီစောင့်ရှောက်ပေးခဲ့သော မဦးသည် ထိုငွေမှာ နှင်းကေခိုင်၏မိခင်နှင့်သာ ထိုက်တန်သည်ဟုဆိုကာ ဒေါ်အေးကြွယ်ကို လူမှုကွန်ရက်မှတစ်ဆင့် ရှာဖွေခဲ့သည်။

ထိုသတင်းကို မင်္ဂလာဒုံမြို့နယ်၊ ရှမ်းကြီးဝရပ်ကွက်မှ ဒေါ်အေးကြွယ် အ၀တ်လျှော်ပေးနေသည့် အိမ်တစ်အိမ်မှ ဒေါ်လဲ့လဲ့ဝင်းက ကြားသိပြီး ဒေါ်အေးကြွယ်အားပြောပြကာ မှတ်ပုံတင်စသည်တို့ကို ထိုင်းနိုင်ငံရှိ မဦးထံပေးပို့ရာမှ ငွေရရှိခြင်းဖြစ်သည်။

သမီးဖြစ်သူ သေဆုံးမှုအတွက် အီတာလျံထိုင်းဆောက်လုပ်ရေးကုမ္ပဏီမှ လျော်ကြေး ထိုင်းဘတ်ငွေတစ်သိန်း (မြန်မာကျပ်ငွေပျမ်းမျှ ၃၂ သိန်းဝန်းကျင်)
ဒေါ်အေးကြွယ်ရရှိခဲ့ပါပြီ။ ထိုဘတ်ငွေတစ်သိန်းထဲမှ နှစ်သောင်းကို သမက်ဖြစ်သူကို သက်မောင်မောင်က နုတ်ယူထားခဲ့သည်။ ထိုသို့နုတ်ယူထားကိုလည်း ကျေနပ်ပါသည်ဟု ဒေါ်အေးကြွယ်ကဆိုသည်။ ထိုသို့ရရှိသည့်ငွေများကို မသုံးရက်၍ နေထိုင်သော ရပ်ကွက်အတွင်းနှင့် ရွှေတိဂုံစေတီ၊ အခြားနေရာများကို သမီးဖြစ်သူအတွက် အလှူအတန်းများ ပြုလုပ်ပေးနေပါသည်။

‘‘သမီး အသက်နဲ့ရင်းပြီးရှာပေးတဲ့ပိုက်ဆံကို ထိုက်ထိုက်တန်တန် လှူပေးမယ်လို့ စိတ်ကူးထားတယ်။ အဲဒီငွေကို မသုံးရက်ပါဘူး’’ဟု ဒေါ်အေးကြွယ်က ငိုသံဖြင့်ပြောသည်။

‘‘သူ့နောင်ရေးအတွက်ဆိုပြီး ဘဏ်မှာ ၁၀ သိန်းအပ်ထားတယ်။ ရပ်ကွက်ထဲက လမ်းခင်းဖို့အတွက်ရယ်၊ နောက် သူက ရွှေတိဂုံစေတီမှာ သီလရက္ခိတအသင်းဝင်ဖြစ်လို့ ရွှေတိဂုံစေတီမှာ လှူချင်တယ်ပြောတယ်။ သူ့ကိုလည်း မြန်မာနိုင်ငံအနှံ့ ဘုရားဖူးပို့ပေးဖို့စီစဉ်နေပါတယ်’’ဟု ဒေါ်အေးကြွယ်၏ငွေများကို ထိန်းသိမ်းထားသော မလဲ့လဲ့ဝင်းကပြောသည်။

အသက်(၂၉)နှစ်အရွယ်ထိ ၁၀ နှစ်သာ အတူနေထိုင်လာခဲ့ရသော သမီးဖြစ်သူက အမေကို အိမ်နဲ့ထားချင်တယ်၊ အေးအေးချမ်းချမ်းနေချင်တယ်ဟု ရေးသားထားသောစာကို ဖတ်ရသည့်ညက ဒေါ်အေးကြွယ် အိပ်မပျော်ခဲ့ပါ။

‘‘နောင်ဘ၀ဆက်တိုင်းမှာ ဒီလိုဘ၀မျိုးတွေနဲ့မကြုံပါရစေနဲ့လို့ ဆုတောင်းပါတယ်။ ဒီလိုသမီးလေးနဲ့ ဘ၀ဆက်တိုင်းမှာ အတူတူနေရပါစေ။ သမီးလေးကောင်းရာမွန်ရာရောက်ပါစေလို့ အမြဲဆုတောင်းနေပါ့မယ်’’ဟု ၀မ်းနည်းစွာဖြင့် ဒေါ်အေးကြွယ်ကပြောသည်။

ဓာတ်ပုံ- နစ်ကီ

7Day News Journal