White Card ကိုင်သူတွေကို မဲပေးခွင့်မပြုဖို့ ဆန္ဒပြ

ပို့စ်တင်ချိန် - 2/09/2014 11:54:00 PM

လာမယ့် ၂၀၁၅ ရွေးကောက်ပွဲမှာ White Card လို့ခေါ်တဲ့ အဖြူရောင်ယာယီ သက်သေခံလက်မှတ် ကိုင်ဆောင်ထားသူတွေကို မဲပေးခွင့်မပြုဖို့ ထောင်နဲ့ချီတဲ့ ဒေသခံတွေက ဒီနေ့ ရခိုင်ပြည်နယ် မြောက်ဦးမြို့မှာ ဆန္ဒပြတောင်းဆိုကြပါတယ်။

အဲဒီလို မဲပေးခွင့်မပြုဖို့အပြင် ၁၉၈၂ ခုနှစ် မြန်မာနိုင်ငံသား ဥပဒေကို အမြန်ဆုံး အကောင်အထည်ဖော်ပေးဖို့၊ UN အပါအဝင် နိုင်ငံတကာ လူမှုအဖွဲ့အစည်းတွေ ဒေသတွင်းကနေ ထွက်ခွာသွားပေးဖို့ စတဲ့အချက်တွေကိုလည်း တောင်းဆိုကြတယ်လို့ ဆန္ဒပြပွဲကို ဦးဆောင်သူတစ်ဦးဖြစ်တဲ့ မြောက်ဦးမြို့ ရခိုင်လူမှုကွန်ရက်က ကိုထွန်းထွန်းက RFA ကို ပြောပါတယ်။

“၁၉၈၂ ဥပဒေကို ကျနော်တို့ တောင်းဆိုတာကကြာပြီ ဘာမှအကောင်အထည် မဖော်ပေးသေးဘူး၊ ၁၉၈၂  ခုနှစ် နိုင်ငံသားဥပဒေကို လွှတ်တော်ကနေ အမြန်ဆုံး အကောင်အထည်ဖော်ပေးဖို့၊ နောက် white card နဲ့ အရွေးခံတာတွေရှိတယ်၊ နိုင်ငံသားမှ မဲပေးခွင့်ရရမှာ အခုဟာက နိုင်ငံသားမဟုတ်တဲ့သူက မဲပေးခွင့်ရနေတယ်၊ ပြီးတော့ လွှတ်တော်ထဲကို ရောက်နေတယ်၊ အဲဒါဆို မြန်မာနိုင်ငံဟာ ဘယ်လိုဖြစ်သွားမလဲ၊ နောက်ဆိုရင် နိုင်ငံသားမဟုတ်တဲ့သူတွေ သမ္မတတို့ လွှတ်တော်ဥက္ကဌတို့ ဖြစ်လာရင် ဘယ်လိုလုပ်မလဲ”

ဒါ့အပြင် ရခိုင်ပြည်နယ်မှာ တာဝန်ထမ်းဆောင်နေကြတဲ့ ရဲတပ်ဖွဲ့ဝင်တွေရဲ့လုပ်ပိုင်ခွင့်တွေကို တိုးမြှင့်ပေးဖို့၊ ရခိုင်တိုင်းရင်းသားတွေရဲ့ လုံခြုံရေးကို တာဝန်ယူပေးဖို့နဲ့ သီတင်းတစ်ပတ်အတွင်း  ရခိုင်ပြည်နယ်ကနေ MSF ခေါ် နယ်စည်းမခြား ဆရာဝန်များအဖွဲ့ ထွက်ခွာပေးဖို့ စတဲ့အချက်တွေကိုလည်း တောင်းဆိုခဲ့ကြပါတယ်။

အလားတူ တောင်းဆိုမှုတွေကို ပြီးခဲ့တဲ့ရက်ပိုင်းက စစ်တွေနဲ့ ဘူးသီးတောင်မြို့ ဒေသခံတွေက ဆန္ဒပြတောင်းဆိုခဲ့ကြပါတယ်။

RFA Burmese