ပြည်သူ့ဆန္ဒနှင့်မညီသည့်စီမံကိန်းများ ဆိုင်းငံ့၊ ပယ်ဖျက်မည်ဟု လွှတ်တော်ကော်မတီဆို

ပို့စ်တင်ချိန် - 2/01/2014 07:29:00 PM

ဓာတ်ပုံ - မြစ်ဆုံ စီမံကိန်း

ဉဏ်လှိုင်လင်း၊ အောင်သူရထွန်း|ဇန်န၀ါရီ ၃၁၊ သောကြာနေ့၊ ၂၀၁၄ ခုနှစ်

အစိုးရအဖွဲ့တင်ပြထားသည့် ၂၀၁၄-၂၀၁၅ ဘဏ္ဍာနှစ် အမျိုးသားစီမံကိန်း ဥပဒေကြမ်းဆိုင်ရာ ဆွေးနွေးမှု များကို ပြည်ထောင်စုလွှတ်တော်၌ စတင်လိုက်ပြီဖြစ်ပြီး အချိန်တိုအတွင်း ပြည်သူ့ဆန္ဒနှင့် မကိုက်ညီဘဲ နိုင်ငံ့အကျိုးဖြစ်ထွန်းမှု မရှိစေသည့် စီမံကိန်းများကို ဆိုင်းငံ့ပယ်ဖျက်နိုင်ရေး ဆောင်ရွက်ရန် ဥပဒေကြမ်း ပူးပေါင်းကော်မတီဝင် ဦးမြင့်ထွန်းက ဇန်န၀ါရီ ၃၀ ရက် တွင် လွှတ်တော်သို့ တိုက်တွန်းပြောဆိုခဲ့သည်။

“၂၀၁၄-၂၀၁၅ ဘဏ္ဍာရေးနှစ်တွင် ဆောင်ရွက်ရန်လျာထားသော စီမံကိန်းများမှ ပြည်သူ့ဆန္ဒနှင့် မကိုက် ညီသော နိုင်ငံ့အကျိုးဖြစ်ထွန်းမှုမရှိသော စီမံကိန်းများကို ဆိုင်းငံ့၊ ပယ်ဖျက်၍ ပြည်သူများ လိုလားချက်ရှိ သော စီမံကိန်းများကို အချိန်တိုအတွင်း ပြီးမြောက်အောင် ဆောင်ရွက်ပေးရပါမယ်”ဟု ၎င်းကပြောသည်။

အမျိုးသားစီမံကိန်း ဥပဒေကြမ်းအပေါ် ဥပဒေကြမ်း ပူးပေါင်းကော်မတီ၏ လေ့လာစိစစ်တွေ့ရှိချက်နှင့် သဘောထားမှတ်ချက် အစီရင်ခံစာတင်သွင်းရင်း ဦးမြင့်ထွန်းက ပြောဆိုလိုက်ခြင်းဖြစ်သည်။

အစီရင်ခံစာတွင်မူ နိုင်ငံ၏စီးပွားရေး ဖွံ့ဖြိုးတိုးတက်မှုသည် ရင်းနှီးမြှုပ်နှံမှုနှင့် အကျိုးအမြတ် ပြန်လည်ရရှိ မှုပေါ်တွင် မူတည်သော်လည်း စီးပွားရေးတွက်ခြေကိုက်မှုအပြင် လူမှုရေးအကျိုး ဖြစ်ထွန်းမှုကိုလည်းထည့် သွင်းစဉ်းစားရန် လိုသည်ဟု သုံးသပ်ထားသည်။

ထို့ပြင် အစိုးရအဖွဲ့ တင်ပြလာသည့် လုပ်ငန်းများတွင် စီမံကိန်းအခြေအနေ အချုပ်ဖော်ပြသည့် အချက် အလက်များ မပါဝင်သည့်အတွက် လွှတ်တော်အနေဖြင့် အဆိုပါဘဏ္ဍာနှစ်အတွင်း ပြီးစီးနိုင်မည့် စီမံကိန်း အခြေအနေကို မသိရှိနိုင်ဟုလည်း အစီရင်ခံစာကဆိုသည်။ ထို့ကြောင့် စီမံကိန်းများကို သတ်မှတ်ကာလ အတွင်း ဘတ်ဂျက် ထည့်သွင်းရေးဆွဲ၍ အပြီးဆောင်ရွက်ရန် ၀န်ကြီးဌာနအလိုက် ဦးစားပေး အစီအစဉ် များ ချမှတ်ထားပြီး ဘဏ္ဍာငွေ ခွင့်ပြုနိုင်သည့်အနေအထားတွင် မူတည်၍ စီမံကိန်းအသစ်များဆောင်ရွက် ရန် ကော်မတီက အကြံပြုထားသည်။

ဝန်ကြီးဌာနနှင့် အဖွဲ့အစည်းပေါင်း ၃၄ ခုရှိသည့်အနက် ၀န်ကြီးဌာန ရှစ်ခုသာ ဆောင်ရွက်မည်ဖြစ်ပြီး ကျပ် ၂,၃၅၆ ဘီလီယံရှိ စီမံကိန်း ၅၀၃ ခုထိရှိသည်။ ယင်းတို့ အနက် ကာကွယ်ရေးဝန်ကြီးဌာနက အများ ဆုံးဖြစ်ပြီး စုစုပေါင်း နိုင်ငံပိုင်ဆောင်ရွက်မည့် လုပ်ငန်းစီမံကိန်းများနှင့် ရင်းနှီးမြှုပ်နှံမှု လျာထားချက်၏ ၁၇ ဒသမ ၇ ရာခိုင်နှုန်းကို သုံးစွဲမည်ဖြစ်သည်။

ဇန်န၀ါရီ ၃၀ ရက်တွင် ပထမနေ့ ၃၀ဦး ဆွေးနွေးမှုများ မစတင်မီ နိုင်ငံတော် လျှို့ဝှက်ချက်နှင့် လုံခြုံရေး ဆိုင်ရာကိစ္စများ ထုတ်ဖော်ဆွေးနွေးခြင်းမပြုရန် ပြည်ထောင်စု လွှတ်တော်နာယကက သတိပေးခဲ့သေး သည်။

အစိုးရအဖွဲ့၏ အမျိုးသားစီမံကိန်းတွင် မတ် ၃၁ရက်တွင် ကုန်ဆုံးတော့မည့် ယခု ဘဏ္ဍာနှစ်ထက် လယ် ယာ၊ သားငါး၊ စွမ်းအင်၊ ပို့ဆောင်ရေး၊ဆက်သွယ်ရေးကဏ္ဍများ တိုးတက်ရန် ရည်မှန်းထားသည်။သို့သော် သတ္တုနှင့် တွင်းထွက်၊ လျှပ်စစ်၊ ဆောက်လုပ်မှု၊ ငွေရေးကြေးရေး၊ လူမှုရေး နှင့် စီမံခန့်ခွဲရေး၊ ငှားရမ်းခ ၊ သစ်တောနှင့် အခြားဝန်ဆောင်မှုကဏ္ဍများတွင်မူ ယခု ဘဏ္ဍာနှစ်အောက် လျော့နည်းလျာထားကြောင်း တွေ့ရသော်လည်း ကော်မတီ၏ အစီရင်ခံစာတွင် အသေးစိတ်မပါဝင်ပေ။

ပြည်နယ်၊ တိုင်းတို့တွင် အမျိုးသား စီမံကိန်း တိုးတက်မှုနှုန်းလျာထားချက်တွင် ကယား၊ ကရင်၊ ချင်း၊ စစ်ကိုင်း၊ တနင်္သာရီ၊ ပဲခူး၊ မကွေး၊ မန္တလေး၊ မွန်၊ ရန်ကုန်၊ ဧရာဝတီတို့တွင် တိုးတက်မည်ဟု သုံးသပ် ထားသော်လည်း ကချင်၊ ရခိုင်၊ ရှမ်းတို့ကိုမူ ယခုဘဏ္ဍာနှစ်ထက် လျော့နည်းလျာထားသည်ဟု အစီရင် ခံစာက ဆိုသည်။

ယင်းအပေါ် သက်ဆိုင်ရာ ပြည်နယ်လွှတ်တော် ကိုယ်စားလှယ်အချို့က ကျေနပ်မှု မရှိကြခြင်းဖြစ်သည်။ အမျိုးသား စီမံကိန်း တိုးတက်မှုနှုန်းလျာထားချက်တွင် ကချင်ပြည်နယ်ကို ယခင် ၈ ဒသမ ၄ မှ ၂ ဒသမ ၀၊ ရခိုင်ပြည်နယ်ကို ယခင် ၆ ဒသမ ၂ မှ ၅ ဒသမ ၇ ၊ ရှမ်းပြည်နယ်ကို ယခင် ၆ ဒသမ ၁မှ ၅ ဒသမ ၀ ရာခိုင်နှုန်းတို့၏ လျှော့ချမျှော်မှန်းထားခြင်း ဖြစ်သည်။

အစိုးရ၏ အမျိုးသားစီမံကိန်း ရည်မှန်းချက်တွင် နိုင်ငံရေး၊ စီးပွားရေး၊ လူမှုရေး၊ အုပ်ချုပ်ရေး မျှော်မှန်းချက် များ အကောင်အထည်ဖော်နိုင်ရန်၊ တိုင်း၊ ပြည်နယ်များ အချိုးကျမျှတစွာ ဖွံ့ဖြိုးတိုးတက်ရန်၊ ဆင်းရဲချမ်း သာကွာဟမှု လျော့နည်းရန် စသဖြင့် ပါဝင်သည်။

အစိုးရအဖွဲ့က တင်ပြလာသည့် အမျိုးသားစီမံကိန်း ဥပဒေကြမ်းတွင် လာမည့် ဘဏ္ဍာနှစ် (၂၀၁၄-၂၀၁၅) ၌ အသက် ၁၅-၅၉ နှစ်အကြား အလုပ်လုပ်နိုင်မည်သူ ၃၈ ဒသမ ၇သန်း၊ စုစုပေါင်း လူဦးရေ ၆၂ ဒသမ ၂သန်း၏ ၆၂ ဒသမ ၂ ရာခိုင် နှုန်းရှိမည်ဟု မျှော်မှန်းထားပြီး စီးပွားရေးတိုးတက်မှုနှုန်းကို ၉ ဒသမ ၁ ရာ ခိုင်နှုန်းဖြစ်ပေါ်စေရန် ရည်မှန်းဆောင်ရွက်မည်ဟု ဆိုထားသည်။

လာမည့် ဘဏ္ဍာနှစ်၌ ထုတ်လုပ်မှု ကဏ္ဍတွင် ၆၃ ဒသမ ၆ရာခိုင်နှုန်း၊ ၀န်ဆောင်မှုကဏ္ဍတွင် ၁၇ ဒသမ ၅ ရာခိုင်နှုန်း၊ ကုန်သွယ်မှုကဏ္ဍတွင် ၁၈ ဒသမ ၉ ရာခိုင်နှုန်း၊ လယ်ယာကဏ္ဍ ၂၈ ဒသမ ၆ ရာခိုင်နှုန်း၊ စက်မှုကဏ္ဍ ၃၅ ဒသမ ၀ ရာခိုင်နှုန်း၊ ၀န်ဆောင်မှုကဏ္ဍ ၃၆ ဒသမ ၄ ရာခိုင်နှုန်း တိုးတက်ရန်လည်း မျှော် မှန်းထားသည်။

Mizzima Burmese