နိုင်ငံရေးအထိမ်းအမှတ်နေ့များထက် ချစ်သူများနေ့က ပိုရေပန်းစား
ပို့စ်တင်ချိန်
- 2/11/2014 08:44:00 AM
+(Cu4z33.jpg)
“...ဖေဖော်ဝါရီလ ၁၃ ရက်နေ့က ဗိုလ်ချုပ်အောင်ဆန်း မွေးနေ့လို့ ပြောတယ်။ ငယ်ငယ် တုန်းကတော့ ဒီအကြောင်းတွေကို သင်ဖူးတယ်။ အခု မမှတ်မိတော့ဘူး...”
၂ဝ၁ဝ ဖေဖော်ဝါရီ ၁ဝ ရက်နေ့က ဧရာဝတီမှာ တင်ခဲ့တဲ့ ချစ်သူများနေ့ဆိုင်ရာသတင်းကို ပြန်လည် ဖော်ပြပါတယ်။
မြန်မာနိုင်ငံ၏ အမျိုးသား ခေါင်းဆောင်ကြီး ဗိုလ်ချုပ် အောင်ဆန်း၏ မွေးနေ့ကိုကျော်ပြီး ချစ်သူများနေ့ (Valentine's day) ကို ပြည်တွင်း ပြည်ပရှိ မြန်မာလူငယ် အများစုက စိတ်ဝင်တစား စောင့်မျှော်နေ ကြသည်။
“ကျမကတော့ ဖေဖော်ဝါရီလ ၁၄ ရက်နေ့ valentine's day ပဲသိတယ်။ ဒါပေမယ့် သူငယ်ချင်း တယောက် ဆီကနေ သိရတာကတော့ ဖေဖော်ဝါရီလ ၁၃ ရက်နေ့က ဗိုလ်ချုပ်အောင်ဆန်း မွေးနေ့လို့ ပြောတယ်။ ငယ်ငယ် တုန်းကတော့ ဒီအကြောင်းတွေကို သင်ဖူးတယ်။ အခု မမှတ်မိတော့ဘူး” ဟု ချင်းမိုင်မြို့တွင် ကျောင်းတက် နေသော နန်းထွေးခမ်းက ဧရာဝတီသို့ ပြောသည်။
မြန်မာနိုင်ငံတွင် ဖေဖော်ဝါရီလ ၁၃ ရက်နေ့ ဗိုလ်ချုပ်အောင်ဆန်း မွေနေ့ကို ကလေးများနေ့ အဖြစ်သတ်မှတ် ခဲ့ကြသော်လည်း ယခုအခါ ကလေးများနေ့ အခမ်းအနားကျင်းပ ပြုလုပ်ခြင်းများကို မတွေ့ရကြောင်း ရန်ကုန်မြို့ခံ လူငယ်တချို့က ပြောသည်။
“ကလေးများနေ့ကိုတော့ ကြားဖူးတယ်။ ဒါပေမယ့် ဘယ်သူတွေ ဘာလုပ်ကြလည်း ဆိုတာကိုတော့ တခါမှ တွေ့ဖူးဘူးဟု” ဟု စမ်းချောင်း မြို့နယ်မှ တက္ကသိုလ် ကျောင်းသူ တဦးက ပြောသည်။
ဗိုလ်ချုပ်အောင်ဆန်းကို ၁၉၁၅ခုနှစ် ဖေဖော်ဝါရီလ ၁၃ရက်နေ့ ၌ မကွေးတိုင်း၊ နတ်မောက်မြို့တွင် မွေးဖွားခဲ့သည်။ ဗိုလ်ချုပ်အောင်ဆန်း၏ ငယ်နာမည်မှာ မောင်ထိန်လင်းဖြစ်ပြီး နယ်ချဲ့ ကိုလိုနီ နှင့် ဖက်ဆစ်ဂျပန် တို့၏ လက်အောက်မှ မြန်မာနိုင်ငံ လွတ်လပ်ရေး အတွက် ဦးဆောင် တိုက်ပွဲဝင်ခဲ့သူဖြစ်သည်။
“ဖေဖော်ဝါရီ ၁၄ရက်နေ့က ချစ်သူများနေ့လေ။ ၁၂ရက်နေ့နဲ့ ၁၃ရက်နေ့ကိုတော့ ကျနော် မသိဘူး” ဟု ထိုင်း - မြန်မာနယ်စပ် မဲဆောက်မြို့တွင် အလုပ်လုပ်ကိုင်သော ကိုလာပို ပြောသည်။
“အခုခေတ် လူငယ်တွေ ဗိုလ်ချုပ်ရဲ့ မွေးနေ့ကို မသိကြတာ မထူးဆန်းပါဘူး ။ အစိုးရကိုယ်တိုင်က ဗိုလ်ချုပ်အောင်ဆန်းရဲ့ ကဏ္ဍကို ဖျောက်ဖျက်ဖို့ ကြိုးစားနေတာဖြစ်တယ်။ ဗိုလ်ချုပ်အောင်ဆန်း လွတ်လပ်ရေးကြိုးပမ်းခဲ့တဲ့ သမိုင်းတွေ ဆိုတာ အပြင်က စာစောင်တွေနဲ့ ကျောင်းသုံးစာအုပ်တွေမှာ မရှိသလောက် ရှားပါးနေတယ်” ဟု ချင်းမိုင်မြို့ရှိ မြန်မာရွှေ့ပြောင်း အလုပ်သမားကျောင်း တကျောင်းတွင် စာသင်နေသော ဆရာဦးသိန်းဝင်းက ပြောသည်။
ဗိုလ်ချုပ်အောင်ဆန်းသည် ၁၉၄၇ခုနှစ် ဇူလိုင်လ ၁၉ရက်နေ့ သူ၏ အသက် ၃၂နှစ် အရွယ်တွင် လုပ်ကြံခံရပြီး ကျဆုံးခဲ့သည်။
“အခုလို လူငယ်တွေဟာ ကိုယ့်ရဲ့ အမျိုးသားခေါင်းဆောင်ကြီး အကြောင်းကို သိခွင့်မရတဲ့အတွက် တိုင်းပြည်ရဲ့ အနာဂတ် ကို အများကြီး ထိခိုက်နိုင်တယ်။ ဘယ်တိုင်းပြည်မှာပဲ ဖြစ်ဖြစ် တိုင်းပြည်ရဲ့ အမျိုးသားခေါင်းဆောင်ကြီးတွေ ရဲ့ ကျေးဇူးတရားကို သိတတ်အောင်၊ သူတို့ကို စံထားပြီး အတုယူနိုင်အောင်၊ သူတို့လိုကျင့်ကြံနိုင်အောင် ဒီပုဂ္ဂိုလ်တွေရဲ့ အကြောင်းကို သင်ပေးကြတယ်” ဟု ပြည်ထောင်စု မြန်မာနိုင်ငံ အမျိုးသား ညွန့်ပေါင်း အစိုးရ အလုပ်သမားရေးရာ ၀န်ကြီး ဦးခွန်မြင့်ထွန်းကပြောသည်။
ယနေ့ခေတ် မြန်မာလူငယ်များအတွက် အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ အတုယူထိုက်သော အရည်အချင်းများကို သင်ယူလေ့လာခွင့်၊ အတုယူခွင့်စသည့် အခွင့်အရေးများ ဆုံးရှုံးနေသည်ဟု သူက ဆက်ပြောသည်။
ယခုလက်ရှိ နေအိမ်အကျယ်ချုပ် ကျခံနေရသော မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်သည် ဗိုလ်ချုပ်အောင်ဆန်း၏ သမီးဖြစ်သည်။
-
ဝါးရှီးဖော
The Irrawaddy
