အများပိုင် ကုမ္ပဏီများတွင် ကြီးမားစွာ ရင်းနှီးမြှုပ်နှံမှု မလုပ်ရန် ဘဏ္ဍာရေးဒုဝန်ကြီး သတိပေး

ပို့စ်တင်ချိန် - 2/17/2014 02:05:00 PM

မြစ်ကြီးနား၊ ဖေဖော်ဝါရီ ၁၆

မြန်မာနိုင်ငံတွင် အစိုးရသစ် တက်လာပြီး နောက်ပိုင်း အများအပြား ပေါ်ပေါက်လာသော အများပိုင် ကုမ္ပဏီများတွင် ပြည်သူများ အနေနှင့် အစုရှယ်ယာ ရင်းနှီးမြှုပ်နှံမှု အများအပြား မပြုလုပ်ရန် ပြည်ထောင်စု အစိုးရ အဖွဲ့ဘဏ္ဍာရေးနှင့် အခွန်ဝန်ကြီးဌာန ဒုတိယဝန်ကြီး ဒေါက်တာ မောင်မောင်သိမ်းက ဖေဖော်ဝါရီလ ၁၅ ရက်နေ့တွင် မြစ်ကြီးနား မြို့တော်ခန်းမ၌ ဒေသခံ ပြည်သူများနှင့် တွေ့ဆုံစဉ် သတိပေး ပြောကြားသည်။

မြန်မာနိုင်ငံတွင် လွန်ခဲ့သော ၁၀ နှစ် ကျော်အချိန်ခန့်က ပေါ်ပေါက် ခဲ့သည့် ငွေစုငွေချေး အသင်းများပေါ်တွင် ပြည်သူများ ယုံကြည်၍ ငွေကြေး အမြောက်အမြား ရင်းနှီးမြှုပ်နှံမှု ပြုလုပ်ခဲ့ကြပြီး ဆုံးရှုံးနစ်နာခဲ့ရသည့် သာဓကများ ရှိသည့်အတွက် ယခုနောက်ပိုင်း ပေါ်ပေါက်လာသော အများပိုင် ကုမ္ပဏီများ အပေါ်တွင်လည်း ရင်းနှီးမြှုပ်နှံမှု အများအပြား မပြုလုပ်ရန် သတိပေးခြင်း ဖြစ်ကြောင်း ဒုတိယဝန်ကြီးက ဆက်လက် ပြောကြားသည်။
“အများပိုင် ကုမ္ပဏီတွေ ထောင်ထားကြပေမယ့် အချိန်မရွေး ထွက်လို့ရအောင် လေယာဉ်လက်မှတ် ဝယ်ထားပြီး အရေးအကြောင်းဆိုရင် ယိုးဒယား ထွက်ပြေးမယ်။ စင်ကာပူ ထွက်ပြေး လို့ရအောင် လုပ်ထားတဲ့ လူတွေချည်းပဲ။ ငွေတွေထည့်ပြီးမှ သူ့တို့ ကိုတရားစွဲဖို့ မစဉ်းစားနဲ့။ ငွေစုငွေချေး အသင်းတုန်းကလည်း တရားစွဲဖို့ ကြိုးစားတာပဲ။ ဘယ်သူမှ မအောင်မြင်ဘူး။ အမှုနိုင်သွားပေမယ့် ဘာပစ္စည်းမှ မရဘူး။ အခုအဲဒါမျိုးတွေ ပေါနေတယ်။ ဒါကြောင့် စဉ်းစားဆင်ခြင်ပြီးမှ လုပ်ကြပါ” ဟု ဒုဝန်ကြီးက ဆိုသည်။

အဆိုပါ ဖြစ်စဉ်များမှာ မြန်မာနိုင်ငံ၌သာ ဖြစ်ပျက်နေခြင်း မဟုတ်ဘဲ ကမ္ဘာ့နိုင်ငံကြီး များတွင်လည်း စတော့ရှယ်ယာ ကုမ္ပဏီများ စတင်ပေါ်ပေါက်လာသည့် အချိန်မှစတင်ကာ ယင်းကဲ့သို့သော အဖြစ်အပျက်များ အများအပြား ပေါ်ပေါက်ခဲ့ကြောင်း ၎င်းကဖြည့်စွက် ပြောကြားသည်။

လက်ရှိ အများပိုင် ကုမ္ပဏီများသည် နိုင်ငံတော်၏ ပြောင်းလဲလာသည့် မူဝါဒများအရ နိုင်ငံတော်၏ အားပေးမှုကြောင့် ကုမ္ပဏီများ အက်ဥပဒေဖြင့် စနစ်တကျ တရားဝင် ဖွဲ့စည်းထားရှိသည့် ကုမ္ပဏီများ ဖြစ်ရာ ပြည်ထောင်စု ဒုတိယဝန်ကြီး၏ ပြောဆိုမှုမှာ ပြည်သူများ ပါဝင်နိုင်သည့် အခန်းကဏ္ဍများ ဖော်ဆောင်ပေးရန် ဆိုသည့် အစိုးရ၏ မူဝါဒကို ထိခိုက်သွားနိုင်သည်ဟု မြင်ကြောင်း ပြည်ထောင်စု ဒုဝန်ကြီးနှင့် တွေ့ဆုံပွဲသို့ တက်ရောက်ခဲ့သည့် ကချင်ပြည်နယ် အများပိုင်ကုမ္ပဏီ ဥက္ကဋ္ဌ ဒေါ်ဂျာဆိုင်းခွန်က ဆိုသည်။

“ဒုဝန်ကြီးပြောတဲ့ ငွေစုငွေချေး လုပ်ငန်းတွေဆိုတာ စနစ်တကျ ဖွဲ့စည်းထားတဲ့ လုပ်ငန်းတွေ မဟုတ်ဘူး။ ပြီးတော့ ဒုဝန်ကြီးက IKBZ အာမခံ ကုမ္ပဏီရုံးချုပ် ဖွင့်ပွဲကို လာတာဆိုတော့ အဲဒီ အာမခံ လုပ်ငန်းအပိုင်းကို အမွှန်းတင်ရင်းနဲ့ ဒီဘက်ကို လက်လွတ်စပယ် ပြောသွား တယ်လို့ မြင်တယ်။ ပြည်ထောင်စုဒုဝန်ကြီး တစ်ဦးအနေနဲ့ ဒီလို မပြောသင့်ပါဘူး” ဟု ကချင်ပြည်နယ် အများပိုင် ကုမ္ပဏီ ဥက္ကဋ္ဌက မှတ်ချက်ပြု ပြောဆိုသည်။

လက်ရှိ ကချင်ပြည်နယ် အများပိုင် ကုမ္ပဏီကို ကချင်ပြည်နယ် ဝန်ကြီးချုပ်က ဦးဆောင်ကာ ကုမ္ပဏီ စည်းမျဉ်းစည်းကမ်းများနှင့်အညီ ဖွဲ့စည်းထားခြင်း ဖြစ်ပြီး လုပ်ငန်းအချို့ စတင်လည်ပတ်နေပြီ ဖြစ်ကြောင်း ကချင်ပြည်နယ် အများပိုင် ကုမ္ပဏီထံမှ သိရသည်။

The Voice Weekly