နောင်ချိုမြို့ ဟော်တော် ကျောင်းတိုက်ရှိ ဆင်းတုတော် တစ်ဆူပျောက်ဆုံး

ပို့စ်တင်ချိန် - 2/26/2014 10:44:00 PM

ဆင်းတုတော် ပျောက်ဆုံး နေပြီးနောက် သီတင်းသုံးခဲ့သော ပလ္လင်ကို ဖေဖော်ဝါရီ ၂၅ ရက်က တွေ့ရစဉ် ဓာတ်ပုံ − နောင်ချိုသား

ရှမ်းပြည်နယ်မြောက်ပိုင်း နောင်ချိုမြို့ ဟော်တော်ကျောင်းတိုက်မှ အမြင့်သုံးပေရှိ ဆင်းတုတော်တစ်ဆူပျောက်ဆုံးမှု ဖြစ်ပွားခဲ့ပြီး နောင်ချိုမြို့နယ်တွင် ခုနစ်လအတွင်း ဘုရားဆင်းတုတော် ရှစ်ဆူမြောက် ပျောက်ဆုံးမှုဖြစ်ကြောင်း သတင်းရရှိသည်။

ဖေဖော်ဝါရီ ၂၅ ရက်နံနက်တွင် နောင်ချိုမြို့ ဟော်တော်ကျောင်းတိုက်အတွင်းရှိ စေတီတစ်ဆူ၌ သီတင်းသုံးနေသော ပလာစတာဖြင့် ပြုလုပ်ထားသည့် အမြင့် သုံးပေရှိ ဆင်းတုတော်တစ်ဆူ ပျောက်ဆုံးမှုဖြစ်ပွားခဲ့ကြောင်း ဟော်တော်ကျောင်းတိုက်ဆရာတော်၊ နောင်ချိုမြို့နယ် သံဃနာယကဥက္ကဋ္ဌဆရာတော် ဦးဝါသေဋ္ဌက မိန့်သည်။

            ‘‘နံနက် ၁ နာရီလောက်မှာ ပျောက်သွားတာဖြစ်နိုင်တယ်။ ဦးပဉ္စင်းတို့ကျောင်းက ဆရာတော်တွေ သုံးနာရီမှာကြည့်တော့ မရှိတော့ဘူးဖြစ်နေတယ်။ ဘုန်းကြီးကျောင်းကလည်း အုတ်တံတိုင်းခတ်ထားတယ်။

အပေါ်ကနေ လူအများနဲ့ယူသွားတာ ဖြစ်နိုင်တယ်’’ဟု ဆရာတော် ဦးဝါသေဋ္ဌကမိန့်သည်။

ဆင်းတုပျောက်ဆုံးမှုနှင့် ပတ်သက်ပြီး မြို့နယ်ရဲစခန်းတွင် အမှုဖွင့်တိုင်ကြားထားကြောင်း ဆရာတော်က ဆက်လက်မိန့်ကြားသည်။

အဆိုပါဆင်းတုပျောက်ဆုံးမှုနှင့်ပတ်သက်ပြီး နောင်ချိုမြို့ နယ်ရဲတပ်ဖွဲ့သို့ ဆက်သွယ်မေးမြန်းရာ ဆင်းတုတော်ပျောက်ဆုံးခြင်းကို မသိရှိကြောင်း နောင်ချိုမြို့နယ်ရဲတပ်ဖွဲ့မှ တာဝန်ရှိသူတစ်ဦးက ဖြေကြားသည်။

အလားတူ ၂၀၁၃ စက်တင်ဘာအတွင်းကလည်း နောင်ချိုမြို့နယ်၊ သုံးဆယ်ကျေးရွာ ရွှေစံဦးစေတီရှိ ကြေးဆင်းတုတော်လေးဆူ နောင်ချိုမြို့နယ် နားရိုးကျေးရွာ စေတီတော်အတွင်းရှိ အမြင့်ခြောက်ပေရှိ ရှေးဟောင်း ဆင်းတုတော်သုံးဆူပျောက်ဆုံးမှု ဖြစ်ပွားခဲ့သည်။ အဆိုပါဆင်းတုတော်များ ပျောက်ဆုံးမှုမှာလည်း တရားခံ ဖမ်းဆီးနိုင်ခြင်းမရှိသေးပေ။

            ‘‘အရင်လတွေကလည်း ဆင်းတုတော်တွေပျောက်တာ။ အခု နောင်ချိုမြို့နယ်မှာ ခဏခဏပျောက်နေလို့ သတိထားကြရမယ်။ ရဲစခန်းကလည်း ဖမ်းမိတဲ့အသံ မကြားသေးဘူး’’ဟု ဆရာတော် ဦးဝါသေဋ္ဌက မိန့်ကြားသည်။

            ‘‘ဒီနယ်မှာ ဘုရားခိုးဂိုဏ်း ရှိနေလောက်တယ်။ ပျောက်တဲ့ဘုရားတွေက အသေးလေးတွေ မဟုတ်ဘူး။ ဘုရားအကြီးကြီးတွေ ပျောက်နေတာ။ ဒီဘုရားတွေဆို သယ်ရတာမလွယ်ဘူး’’ ဟု နောင်ချိုမြို့ ဘူတာရပ်ကွက်မှ အသက် (၃၀)၀န်းကျင် လူငယ်တစ်ဦးက ပြောသည်။

Author: ငြိမ်းချမ်း
7day Daily