စိတ်မနှံ့သူများနှင့် ၀န်းကျင်ဂယက်
ပို့စ်တင်ချိန်
- 2/20/2014 08:39:00 AM
ရေးသားသူ- အောင်သစ်လွင်
“ကိုယ့်ဘက်ကမှားပြီးမှတော့ ဘာမှဆူဆူပူပူမလုပ်ဘဲ သူတို့ခေါ်သွားတဲ့ အချုပ်ခန်းထဲရောက်ရင် ဘုရား၊ တရားကိုသာ အာရုံပြုပြီး စိတ်တည်ငြိမ်အောင်ထားဖို့ မှာလိုက်နိုင်တာပဲ တတ်နိုင်ပါတော့တယ်”ဟု ရဲလက်သို့ ၎င်း၏သားဖြစ်သူကို ကိုယ်တိုင်အပ်လိုက်သော ဦးမောင်ရွှေ(အမည်ပြောင်း)က ပါးပြင်ပေါ် ရုတ်တရက်စီးကျလာသည့် မျက်ရည်စီးကြောင်းကို သုတ်ရင်းပြောသည်။
လွန်ခဲ့သည့်ငါးနှစ်ခန့်က စိတ်ရောဂါကုဆရာဝန်နှင့် ပြသခဲ့ဖူးသည့် ဦးမောင်ရွှေ၏ အသက်(၂၅)နှစ်အရွယ် သားဖြစ်သူမှာ ညအချိန် ထမင်းလက်စုံစားနေသည့် အိမ်နီးချင်းမိသားစုတစ်စုကို နေအိမ်အတွင်းသို့ တုတ်ဖြင့်ဝင်ရိုက်သောကြောင့် ရပ်ကွက်လူကြီးများနှင့် ရဲများ၏ဖမ်းဆီးခြင်းကိုခံရပြီး စိတ်ရောဂါကုဆရာဝန်၏အကြံပြုချက်ဖြင့် ရွာသာကြီးစိတ်ကျန်းမာရေးဆေးရုံမှုခင်းဆောင်တွင် ထိန်းသိမ်းခံထားရကာ ဆေးကုသမှုခံယူနေရသူဖြစ်သည်။
ထင်မှတ်မထားသည့်အခြေအနေတွင် ရုတ်တရက်စိတ်ဖောက်ပြန်ကာ ပတ်ဝန်းကျင်ကို ရန်ပြုတိုက်ခိုက်ခြင်းကြောင့် လူသေဆုံးမှုများအထိဖြစ်ပေါ်ပြီး အရေးယူခဲ့ရသည့်အမှုများမှာ ၂၀၁၄ ဇန်န၀ါရီလမှ ဖေဖော်ဝါရီတတိယပတ်အတွင်းမှာပင် ၂၀ မှုအထက်သို့ ရှိသွားပြီဖြစ်ကြောင်း နေပြည်တော်ရဲချုပ်ရုံးမှတ်တမ်းများအရသိရသည်။
မြန်မာနိုင်ငံတွင် ၂၀၀၉ ခုနှစ်ကပြုလုပ်ထားသော စစ်တမ်းအရ စိတ်ဝေဒနာရှင်သုံးသိန်းခန့်ရှိနေပြီး အဓိကဆေးရုံကြီးဖြစ်သည့် ရွာသာကြီးဆေးရုံသို့ အတွင်းလူနာအဖြစ် တစ်နှစ်လျှင် ဝေဒနာရှင် ၈၀၀၀ နီးပါးသာ လာရောက်ကုသမှုခံယူနေသည့်အတွက် လူမှုစီးပွားပြဿနာမျိုးစုံ ကြုံတွေ့နေရသော နိုင်ငံမျိုးတွင် စိတ်မကျန်းမာသူများစောင့်ရှောက်မှုတွင် လိုအပ်ချက်ကွက်လပ်မှာ ကြီးမားနေဆဲဖြစ်သည်။
“စိတ်ကျန်းမာရေးဆေးရုံတွေကို အကြောင်းအမျိုးမျိုးကြောင့် ရောက်မလာနိုင်တဲ့သူတွေ အများကြီးရှိနေသေးတယ်”ဟု ရွာသာကြီးစိတ်ကျန်းမာရေးဆေးရုံ တာဝန်ခံဆရာဝန်တစ်ဦးကပြောသည်။
ထို့ကြောင့် မိမိတို့ရင်ဆိုင်နေရသော လူမှုရေး၊ စီးပွားရေးပြဿနာမျိုးစုံဖြင့် ရုတ်တရက်စိတ်ဝေဒနာခံစားရကာ ပတ်ဝန်းကျင်ကို စိတ်ထဲရှိသည့်အတိုင်းတုံ့ပြန်ရန် ပြုနိုင်မည့်သူများအား ကူညီစောင့်ရှောက်မှုနည်းလမ်းကို အဖြေရှာသင့်နေပြီဖြစ်သည်။
“အဓိကအရေးကြီးဆုံးကတော့ ကာယကံရှင်မိသားစုပါပဲ။ အကြောင်းမျိုးစုံကြောင့် ကိုယ့်မိသားစုဝင်တစ်ဦးဦး စိတ်ပိုင်းဆိုင်ရာပြဿနာ ရင်ဆိုင်နေရပြီဆိုရင် သူတို့ရဲ့ပြောင်းလဲသွားတဲ့အမူအရာကို မိသားစုဝင်အချင်းချင်းပဲ ချက်ချင်းသိနိုင်တာ။ သူ့ကို တစ်ယောက်တည်းပစ်ပယ်မထားဘဲ ဖေးဖေးမမနေပေးရင်းနဲ့ ပြဿနာတွေဟာ အကြီးကြီးတွေမဟုတ်ပါဘူးဆိုတဲ့အသိ ပေးနိုင်ဖို့လိုပါတယ်”ဟု ရန်ကုန်တက္ကသိုလ်စိတ်ပညာဌာန အငြိမ်းစားစိတ်ပညာပါမောက္ခ ဒေါက်တာခင်မြင့်ကအကြံပြုပါသည်။
ပတ်ဝန်းကျင်အသိုင်းအ၀ိုင်းကို အဓိကအန္တရာယ်ပေးနိုင်သူမှာ စိတ်ကြွရောဂါခံစားနေရသူများဖြစ်ပြီး စိတ်ဝေဒနာခံစားလာရချိန်တွင် သာမန်လူအဖြစ်မှ အသိစိတ်ကင်းမဲ့သွားသည့် ရူးသွပ်သွားသူအဖြစ် ရုတ်တရက်ပြောင်းလဲသွားတတ်ကြောင်း ဒေါက်တာခင်မြင့်ကပြောသည်။ စိတ်ကျရောဂါ၏သဘာဝမှာ တစ်စုံတစ်ယောက်သည် ဝေဒနာခံစားနေရပါက တစ်ဦးတည်းသီးသန့်နေလေ့ရှိကာ မိမိကိုယ်ကိုယ်နည်းမျိုးစုံဖြင့် သတ်သေရန်ကြိုးစားခြင်းဖြစ်ပြီး စိတ်ကြွဝေဒနာခံစားနေရသူများမှာ မိမိပတ်ဝန်းကျင်ရှိ တွေ့ရာလူကို အန္တရာယ်ပြုရန်ကြိုးစားခြင်းဖြစ်ကြောင်း ၎င်းကဆိုပါသည်။
“အိမ်မှာလည်း အရင်က ၀င်ထွက်သွားလာနေသူပါ။ ဘာရန်ငြိုးရန်စမှမရှိဘဲ ၀င်ရိုက်သွားတာ။ အဲဒီအဖြစ်အပျက်ကို နားမလည်နိုင်သေးဘူး”ဟု ဦးမောင်ရွှေ၏သားက ရိုက်နှက်ခြင်းကိုခံခဲ့ရကာ ဆေးရုံတွင်ကုသနေရဆဲ အမည်မဖော်လိုသည့်အမျိုးသားက ၎င်းရင်ဆိုင်ခဲ့ရသည့်အဖြစ်အပျက်ကိုပြောသည်။
စိတ်ဝေဒနာရှင်မျိုးရိုးဗီဇမရှိသည့်အပြင် လူမှုပတ်ဝန်းကျင်တွင် ပုံမှန်အခြေအနေအတိုင်း ရပ်တည်လာခဲ့သူတစ်ယောက် ရုတ်တရက်စိတ်ကစဥ့်ကလျားဖြစ်စေသည့် အကြောင်းအရာမှာ အရက်သေစာနှစ်ရှည်လများ သောက်သုံးခဲ့ခြင်းနှင့် မူးယစ်ဆေးဝါးအလွန်အကျွံသုံးစွဲခြင်းတို့ကြောင့်ဖြစ်ကြောင်း စိတ်ပညာရှင်ဒေါက်တာမြင့်သိန်းကပြောသည်။ ထို့အပြင် မျှော်လင့်မထားသည့် လူမှုရေးနှင့် စီးပွားရေးအခြေအနေဆိုးများကြောင့် ရုတ်တရက် စိတ်ကစဥ့်ကလျားဖြစ်သွားသူများလည်းရှိကြောင်း ၎င်းကဆိုပါသည်။
မြန်မာနိုင်ငံတွင် စိတ်ကျန်းမာရေးဆေးရုံအဖြစ် ရန်ကုန်(ရွာသာကြီး)နှင့် မန္တလေးမြို့တွင်သာရှိသေးပြီး ဝေဒနာရှင်ထောင်ဂဏန်းကိုသာ ကုသစောင့်ရှောက်မှုပေးနိုင်သည်။
“ဟိုးတုန်းကတော့ စိတ်မနှံ့သူတွေရှိတဲ့အကြောင်း အကြောင်းကြားရင် လာပြီးခေါ်သွားတာပဲ။ ဆေးကုပေးတာပေါ့လေ။ လမ်းပေါ်ကလူတွေကို”ဟု ရန်ကုန်မြို့ခံတစ်ဦးကပြောသည်။
ပြီးခဲ့သည့်လက ပဲခူးတိုင်းဒေသကြီး အုတ်ဖိုမြို့နယ်တွင် မိဘများလယ်ထဲဆင်းနေခိုက် နေအိမ်တွင်ထားရစ်ခဲ့သည့် အသက်(၅)နှစ်အောက် ကလေးနှစ်ဦးအား အရက်သောက်ကာ ရုတ်တရက်စိတ်ဖောက်ပြန်သွားသူ အိမ်နီးချင်းအမျိုးသားတစ်ဦးက ဓားဖြင့်ခုတ်သတ်မှုဖြစ်ပွားခဲ့သည်။ ရခိုင်ပြည်နယ် စစ်တွေမြို့တွင်လည်း ဖခင်ထံအရက်ဖိုးတောင်းရာ မပေးသောကြောင့် သားက အဖေကို ရိုက်သတ်မှုဖြစ်ပွားခဲ့သည်။ ပြီးခဲ့သည့်နှစ်က မန္တလေးမြို့ မောင်ကိန်းရွှေဆိုင်အား ဓားပြတိုက်ခဲ့သည့်အမျိုးသားမှာလည်း ဓားပြမတိုက်မီအချိန်ပိုင်းက ဆေးခြောက်နှင့်ဘီယာကို ရောသောက်ထားကာ ရုတ်တရက်စိတ်ဖောက်ပြန်၍ ပြစ်မှုကျူးလွန်ခြင်းဖြစ်ကြောင်း
ဆရာဝန်၏ဆေးစာကိုကိုးကား၍ မြန်မာနိုင်ငံရဲတပ်ဖွဲ့မှ အရာရှိကြီးတစ်ဦးကပြောကြားထားသည်။
ထို့ကြောင့် လူ့အဖွဲ့အစည်းတွင် သာမန်လူသားတစ်ယောက်အဖြစ် ရပ်တည်နေရာမှ အကြောင်းမျိုးစုံဖြင့် စိတ်ရောဂါဝေဒနာရှင်ဖြစ်သွားရသူများမှာ ၎င်းတို့စိတ်ခံစားချက်အတိုင်း ပတ်ဝန်းကျင်ကို မထင်ရင်မထင်သလို ရန်ပြုလေ့ရှိခြင်းကြောင့် မကြာခဏဆိုသလိုပင် ၀မ်းနည်းစရာမှုခင်းဖြစ်စဉ်များ တွေ့မြင်နေရသည်။ စိတ်ဝေဒနာရှင်အစစ်အမှန်ဖြစ်ပြီး စိတ်ပညာကျွမ်းကျင်ဆရာဝန်များက ရူးသွပ်နေသူဖြစ်ကြောင်း ထောက်ခံချက်ပေးထားသူများမှာ ပတ်ဝန်းကျင်တွင် ပြဿနာထွေထွေထူးထူးမရှိဘဲ မှုခင်းဖြစ်စဉ်များကို အဓိကဖန်တီးသူများမှာ ရုတ်တရက်စိတ်ကစဥ့်ကလျားဖြစ်သွားသူများဖြစ်နေသည်။
“အရက်မူးနေတဲ့သူကို အပြင်မှာ တစ်ယောက်ချင်းရင်ဆိုင်ရဲတယ်။ သူက အနည်းနဲ့အများတော့ weak ၀ိ(ခ်)ဖြစ်နေနိုင်တယ်လေ။ ရုတ်တရက် စိတ်ထဖောက်တဲ့သူကတော့ ကိုယ့်ကိုအချိန်မရွေးအန္တရာယ်ပြုနိုင်လို့ အရမ်းကြောက်တယ်”ဟု မကြာခဏစိတ်ဖောက်ပြန်ကာ အိမ်နီးချင်းများကို ရန်ရှာလေ့ရှိသူနှင့် အိမ်ချင်းကပ်လျက်နေထိုင်သူ ကမာရွတ်မြို့နယ်မှ ကျောင်းဆရာမတစ်ဦးကပြောပါသည်။
စိတ်ရောဂါဝေဒနာခံစားနေရသူကို စိတ်ပညာအရ လွဲမှားသောယုံကြည်မှုကြောင့် ဝေဒနာခံစားရခြင်းနှင့် အာရုံလှုံ့ဆော်မှုကြောင့် ဝေဒနာခံစားရခြင်းဟူ၍ ပညာရှင်များက နှစ်မျိုးခွဲခြားထားသည်။ လွဲမှားသောယုံကြည်မှုကြောင့် စိတ်ကစဥ့်ကလျားဖြစ်သည့်ဖြစ်စဉ်တွင် ကာယကံရှင်က မြင်သမျှအရာတိုင်းအား ရန်သူသဖွယ်သတ်မှတ်ကာ တိုက်ခိုက်ခြင်းဖြစ်သည်။ အာရုံလှုံ့ဆော်မှုဖြစ်စဉ်တွင်တော့ ပုဂ္ဂိုလ်တစ်ဦးတစ်ယောက်က ၎င်းအား ရန်ပြုတော့မည်ဟု ကာယကံရှင်ကိုယ်တိုင်ခံစားနေရကာ လက်ဦးမှုရယူ၍ တိုက်ခိုက်ခြင်းဖြစ်သည်။
“ကျွန်တော့်စိတ်ကို ကျွန်တော် အစိုးမရခဲ့ဘူး။ ဒီလူက ကျွန်တော့်ကို သတ်တော့မယ်လို့ထင်ပြီး ကိုယ်ကအရင်ဦးအောင်ရိုက်ခဲ့တာ။ အဲဒီတုန်းကအခြေအနေကို မမှတ်မိတော့ပါဘူး။ ဒီလိုနဲ့ ဆေးရုံရောက်ခဲ့ပေမယ့် အခု ကျွန်တော် မရူးပါဘူး။ ကျွန်တော့်ကို မိသားစုကနေ ပြန်လာခေါ်စေချင်ပြီ”ဟု ရွာသာကြီးစိတ်ကျန်းမာရေးဆေးရုံ လူနာဆောင်တွင် တွေ့ခဲ့ရသည့် အမျိုးသားတစ်ဦးက အခြားစိတ်ဝေဒနာရှင် ၃၀ ခန့်နှင့်အတူ သော့ဖြင့်ပိတ်ထားသည့် အခန်းတစ်ခုတည်းတွင်နေရသည်ကို ကြောက်ရွံ့ဟန်ဖြင့်ပြောသည်။
အဆိုပါအမျိုးသားသည် မြေလတ်ပိုင်းဒေသ မြို့နယ်တစ်ခုတွင် နေထိုင်ခဲ့သူဖြစ်ပြီး အိမ်နီးချင်းအမျိုးသမီးတစ်ယောက်အား အကြောင်းမဲ့ရိုက်နှက်ခဲ့သောကြောင့် စိတ်ကျန်းမာရေးဆေးရုံသို့ ပို့ဆောင်ခံခဲ့ရသူဖြစ်သည်။ အဆိုပါဆေးရုံတွင် မနေလိုတော့ကြောင်း မိသားစုအားဆက်သွယ်ပေးရန် ဂဏန်းကိုးလုံးပါ ဖုန်းနံပါတ်ကို လွယ်လွယ်ကူကူပင် ပြောပြခဲ့ပြီး ယင်းဖုန်းနံပါတ်တွင်လည်း သူ၏မိသားစုမှာ အမှန်တကယ်ရှိနေခဲ့သည်။ ထို့ကြောင့် စိတ်ပညာရှင်ဆရာဝန်များကိုယ်တိုင် ရူးသွပ်နေသူဟု သတ်မှတ်ထားကာ ဆေးကုပေးနေသည့်လူနာမှာ သာမန်လူကောင်းများအတိုင်း ပြောဆိုဆက်ဆံနေနိုင်သောကြောင့် အခြေခံကျန်းမာရေးအသိပညာအားနည်းသော မြန်မာ့လူ့အဖွဲ့အစည်းတွင် ရုတ်တရက်စိတ်ကစဥ့်ကလျားဖြစ်သွားသူတို့မှာ အချိန်မရွေးပေါက်ကွဲနိုင်သော ဗုံးတစ်လုံးကဲ့သို့ ဖြစ်နေသည်။
“အချိန်အများစုတွေမှာ လူကောင်းအတိုင်းနေတာပါပဲ။ သူတို့ စိတ်အခန့်မသင့်ဖြစ်လာရင် ပတ်ဝန်းကျင်ကိုရန်ရှာတာမျိုးတွေလုပ်တယ်။ ဒါကြောင့် စိတ်ချရတဲ့အခြေအနေရောက်ကာမှ သက်ဆိုင်တဲ့ မိသားစုဝင်တွေကို လာခေါ်ဖို့ဆက်သွယ်ရတယ်။ အဓိကကတော့ ရောဂါသည် နေထိုင်တဲ့ ပတ်ဝန်းကျင်နဲ့ ကာယကံရှင်မိသားစုက သူ့အပေါ် ဘယ်လိုပြုမှုဆက်ဆံလဲဆိုတာက အရေးပါပါတယ်”ဟု ရွာသာကြီးစိတ်ကျန်းမာရေးဆေးရုံမှ သူနာပြုဆရာမတစ်ဦးကပြောသည်။
၂၀၁၃ နှစ်ကုန်ပိုင်းက ရွာသာကြီးစိတ်ကျန်းမာရေးဆေးရုံသို့ ကရင်ပြည်နယ်မှ လက်ဝှေ့ဝါသနာရှင်ညီအစ်ကိုနှစ်ယောက် လာရောက်ဆေးကုခဲ့ပြီး လူနာဆောင်တွင် အတူရှိနေသည့် အခြားစိတ်ဝေဒနာရှင်များအား မကြာခဏလိုက်လံထိုးကြိတ်လေ့ရှိသောကြောင့် ဆေးရုံဝန်ထမ်းများ အလုပ်ရှုပ်ခဲ့ရကြောင်း အဆိုပါသူနာပြုဆရာမက စိတ်ရောဂါဝေဒနာရှင်များ၏ စိတ်ထဲရှိသည့်အတိုင်းပြုမူတတ်သည့် အလေ့အထကို ရယ်ရွှင်ဖွယ်အတွေ့အကြုံအဖြစ် ပြောပြသည်။
စိတ်ရောဂါဆိုသည်မှာ စစ်တမ်းများအရ လူဆယ်ဦးလျှင်တစ်ဦး ဖြစ်လေ့ရှိသည့် ရောဂါဖြစ်သောကြောင့် မိမိတို့မိသားစုအတွင်း တစ်စုံတစ်ယောက်သည် စိတ်ဝေဒနာခံစားနေရပြီဟု သံသယရှိပါက ရှက်ရွံ့မနေဘဲ စိတ်ရောဂါကုဆရာဝန်နှင့် ချက်ချင်းပြသသင့်ကြောင်း ဒေါက်တာခင်မြင့်ကအကြံပြုပါသည်။
“ခန္ဓာရှိလို့ ရုပ်မှာရောဂါရှိသလို၊ စိတ်မှာလည်း ရောဂါရှိနိုင်တာပဲ။ လူတိုင်း စိတ်ရောဂါရနိုင်ပါတယ်။ ဆိုးရွားတဲ့ပြဿနာတွေ ရင်မဆိုင်ချင်ရင် ကျန်းမာရေးအမြင်ရှိရှိနဲ့ စိတ်ရောဂါကုဆရာဝန်တွေဆီမှာ အရင်ဦးဆုံးပြသဖို့ အကြံပေးချင်ပါတယ်”ဟု ပြောသည်။
စိတ်ရောဂါဝေဒနာရှင်ဆိုသည်ကို အဓိပ္ပာယ်ဖွင့်ဆိုရာတွင် အသိစိတ်လုံးဝကင်းမဲ့ကာ ရူးသွပ်နေသူများကိုသာ သတ်မှတ်ခြင်းမဟုတ်ဘဲ ညဘက်အိပ်မပျော်ခြင်း၊ တစ်ဦးတည်းအထီးကျန်နေထိုင်ခြင်း၊ စိုးရိမ်ထိတ်လန့်မှုများ ခံစားနေရခြင်းများသည်လည်း စိတ်ရောဂါဟုပင် သတ်မှတ်ထားကြောင်း စိတ်ပညာဆရာဝန်ကြီး ဒေါက်တာကျော်စိန်ရေးသားခဲ့သော စာအုပ်အချို့တွင် ဖော်ပြထားသည်။ ယင်းအခြေအနေကို လွဲမှား၍အံချော်နေသော အပြုအမှုပြဿနာ (သို့မဟုတ်) အနုစားစိတ်ရောဂါဟု သတ်မှတ်ထားပြီး ကုသမှုမခံယူပါက ဆိုးရွားသောအကျိုးဆက်များ ဖြစ်ပေါ်နိုင်ကြောင်း ရေးသားထားသည်။
မည်သည့်စေ့ဆော်မှုကြောင့် ရိုက်နှက်မှုကျူးလွန်ခဲ့သည်ကို ရဲတပ်ဖွဲ့မှ အဖြေမထုတ်နိုင်သေးဘဲ မိသားစုဝင်လေးဦး အကြောင်းမဲ့ရိုက်နှက်ခံခဲ့ရသည့်ဖြစ်စဉ်၏ နောက်ကွယ်တွင် ဒဏ်ရာရသူများ ဆေးရုံတွင်ကုသနေရဆဲဖြစ်သလို ရိုက်နှက်သူလည်း စိတ်ကျန်းမာရေးဆေးရုံအတွင်းရှိ မှုခင်းဆောင်တွင် ထိန်းသိမ်းခံထားရဆဲဖြစ်သည်။ နောင်တစ်ချိန် စိတ်ပုံမှန်ပြန်ဖြစ်လာပါက ကျူးလွန်ခဲ့သည့်အမှုကို တရားရုံးတွင် ရင်ဆိုင်ရဦးမည့်အပြင် ယခင်က ရင်းနှီးကျွမ်းဝင်ခဲ့သူ အိမ်နီးချင်းအချင်းချင်းများကြားတွင်လည်း လူဆိုးစာရင်းပေါက်သွားပြီဖြစ်သည်။
ရုတ်တရက်ရိုက်နှက်ခံရကာ မိသားစုလေးဦးလုံး ဒဏ်ရာရရှိခဲ့သည့်ဘက်ကလည်း ယခင်က ရပ်ကွက်ထဲတွင် သာမန်လူကောင်းအတိုင်းနေကာ ပြစ်မှုကျူးလွန်ပြီးကာမှ စိတ်ဖောက်ပြန်နေသည်ဟူသော ဆရာဝန်၏ဆေးစာဖြင့် စိတ်ကျန်းမာရေးဆေးရုံတွင် ကုသနေခြင်းမှာ ပြစ်မှုကိုရှောင်လွှဲလိုခြင်းကြောင့် ဟန်ဆောင်နေခြင်းဖြစ်ကြောင်း ယူဆထားသည်။
ဦးမောင်ရွှေကတော့ ရုတ်တရက်စိတ်ဖောက်ပြန်သွားသည့် သားဖြစ်သူကို စိတ်မချသောကြောင့် ရပ်ကွက်အတွင်းရှိ နေအိမ်သို့မပြန်တော့ဘဲ ရွာသာကြီးစိတ်ကျန်းမာရေးဆေးရုံရှိ ခုံတန်းလျားတစ်ခုပေါ်မှနေ၍ သားဖြစ်သူထိန်းသိမ်းခံထားရသည့် မှုခင်းဆောင်ဘက်သို့ ငေးမျှော်ကြည့်နေခဲ့သည်မှာလည်း ဆယ်ရက်ကျော်လာခဲ့ပြီဖြစ်သည်။ ။
ဓာတ်ပုံ- ဂျေမောင်မောင် (အမရပူရ)
7Day News Journal
