၂၀၁၃ ခုနှစ်တွင်း အာဖဂန်စစ်ပွဲ လူ ၃,၀၀၀ ကျော်သေဆုံး

ပို့စ်တင်ချိန် - 2/09/2014 09:49:00 AM

အာဖဂန်နစ္စတန် နိုင်ငံက စစ်ပွဲကြောင့် အရပ်သား သေဆုံးမှု တိုးနေပြီး ၁၂ နှစ်ကြာနေပြီ ဖြစ်တဲ့ စစ်ပွဲမှာ ပြီးခဲ့တဲ့နှစ်ဟာ အရပ်သား သေဆုံးမှု အများဆုံး ဖြစ်တယ်လို့ ကုလသမဂ္ဂက ပြောလိုက်ပါတယ်။

၂၀၁၃ ခုနှစ်အတွင်း အရပ်သား သေဆုံးမှု၊ ဒဏ်ရာရမှု၊ ၁၄% တိုးလာခဲ့ပြီး သေဆုံးသူ ၃ ထောင်နီးပါးနဲ့ ဒဏ်ရာရသူ ၅ ထောင့် ၆ ရာကျော်ရှိသွားပြီလို့ အာဖဂန်နစ္စတန်ဆိုင်ရာ ကုလသမဂ္ဂရဲ့ အကူအညီပေးရေး Mission အဖွဲ့ UNAMA က ဒီကနေ့မှာ အစီရင်ခံစာ ထုတ်ပြန်ပါတယ်။ တချိန်တည်းမှာပဲ အမျိုးသမီးနဲ့ ကလေးငယ်တွေ သေဆုံး ဒဏ်ရာရမှုဟာလည်း ၂၀၁၂ ခုနှစ်ကထက်စာရင် ၃ ပုံ ၁ ပုံကျော် တိုးလာခဲ့တယ်လို့ ပြောပါတယ်။

ခုလို အရပ်သားသေဆုံးမှု ၄ ပုံ ၃ ပုံက တာလီဘန်တွေနဲ့ အစိုးရဆန့်ကျင်သူတွေကြောင့်ဖြစ်တယ်လို့ UNAMA ရဲ့ အစီရင်ခံစာမှာ ထောက်ပြထားပါတယ်။ တာလီဘန်တွေနဲ့ လုံခြုံရေးတပ်ဖွဲ့တွေကြား တိုက်ခိုက်မှုက အရပ်သားတွေ ပိုပြီး ထိခိုက် အန္တရာယ်ဖြစ်နေတယ်ဆိုတာကိုလည်း ၂၀၁၃ ထဲမှာဖြစ်လာတဲ့ ထိတ်လန့်စရာအဖြစ် အစီရင်ခံစာက မီးမောင်းထိုးပြထားပါတယ်။

ဗွီအိုအေ (မြန်မာဌာန)